خمس خروجات اقتصادية في محيط الجيزة - الحياة في كايرو Feature - كايرو 360
 







خمس خروجات اقتصادية في محيط الجيزة
خمس خروجات اقتصادية في محيط الجيزة
اصدرت في: 27/09/2016

وسط الخنقة والزحمة والشوارع اللي فوق بعضها من كتر العربيات والناس بنحتاج مساحة نشم فيها نفسنا، ونحاول نخرج بيها من الدايرة الجهنمية اللي مابتخلصش بين الشغل والبيت والمسئوليات اللي مالهاش أول ولا آخر، القاهرة والجيزة من المدين الكئيبة في رأي كتير من المصريين خصوصًا المسجونين في إطار وسط المدنية، والقريبين من الشوارع الرئيسية زي شارع فيصل والتحرير وقصر العيني، ورمسيس.

بيزيد فوق ده كله، مأساة الارتفاع المخيف في الأسعار، واللي بتخلي أقل خروجة علشان أي عائلة تقدر تشم الهوا، بمبلغ وقدره، وسط كل ده، في شوية أماكن بيوفروا بديل معقول للخروج الاقتصادي والهادي، وبيسمحوا للناس تشم هوا وللأطفال أنها تلعب وتجري في مساحات مفتوحة بدون مبالغ وهمية، يعني عائلة كاملة ممكن تخرج وتتبسط بأقل من 20 جنيه للفرد.

 

نادي الرماية

على الرغم أنه منطقة الهرم، منطقيًا، مكان مفتوح وله امتداد صحراوي يدي له شوية هوا، لكن عمليًا ده مش حاصل، وسكان الهرم من أكثر الناس اللي حاسة بخنقة من كل الاتجاهات، عوادم بتطاردهم وزحمة واقفة في طريقهم، ولما بيفكروا لوهلة إنهم يروحوا في أي مكان، مختلف في المحيط مخهم بيتشل لأنه فعليًا مافيش حديقة عامة كبيرة متوفرة ليهم، وآخرهم يروحوا مول مقفول وزحمة، أو يستنوا للصبح علشان يقدروا يخرجوا في جنينة كويسة، لكن بعيدًا عن كل دا نادي الرماية بيوفر بديل أكتر من رائع للناس الزهقانين والمخنوقين من سكان فيصل والهرم.

النادي التابع للقوات المسلحة، بيوفر للمدنين فرصة دخوله والاستمتاع بالمساحات الواسعة اللي فيه، وبسعر بسيط للفرد خمس جنيه، ومن جوه بتتوفر خدمات كتير لطيفة وبأسعار مفاجأة، يعني في ترابيزات وكراسي وسط الخضرة للناس اللي حابة تقعد وتشم شوية هوا، وفي مشروبات بأسعار معقولة الشاي بتلاتة جنيه مثلًا، والعصير الفريش بـ 10، كمان في ملاهي للكبار والأطفال، سعر دخولها جنيه واحد، أيوة الرقم صحيح، جنيه واحد، واللعبة الواحدة بتلاتة جنيه ونص، إحنا فضلنا مبهورين فترة كبيرة الألعاب ظريفة سواء للأطفال أو الكبار، والمساحة كويسة، كمان في أنشطة كتير ممكن تتعمل زي ركوب الخيل، وزي الرسم على التمثايل الجير، وتأجير العجل، وكل ده بأسعار بسيطة جدًا.

 

نادي قصر الأهرام لضباط القوات المسلحة

النادي دي موقعه مثالي جدًا، وزي الرماية تذكرة دخوله معقولة، وبيوفر نفس الإمكانات اللي بيوفرها الرماية، أماكن لعب للأطفال ومساحات مفتوحة للتنزه والتنفس، وأسعار معقولة، لكن مشكلته الوحيدة في الزحمة خصوصًا في المناسبات وعلشان كمان بيوفر دروس سباحة للأطفال، فالإقبال عليه كبير ، لكن بخلاف المواسم والإجازت المكان مثالي للأصحاب اللي عاوزين يتقابلوا بدون ما يدفعوا كثير، أو العائلات اللي عاوزة تشم هوا وتشرب أو تاكل حاجة بره البيت بجودة كويسة وأسعار معقولة، بدون ما تتدبس في مبلغ وقدره.

 

حديقة الجزيرة

صحيح هي جغرافيًا مش واقعة في محافظة الجيزة لكنها عمليًا وبحسب خبرة أهل المدينة الزحمة تبعهم، هو هو نفس الميكروباص أو الأتوبيس اللي بيركبوه في طريقهم من كوبري الخشب (البحوث) لعبد المنعم رياض بيعدي بيهم على الدقي وعلى قصر النيل والتحرير، بالنسبة لأهل الميكروباص ده تحديدًا مافيش فرق بين القاهرة والجيزة لذلك تبقى حديقة الجزيرة بالنسبة ليهم من أملاكهم وضمن منطقتهم.

مكان أخضر على النيل، في أماكن آدمية للقعدة، وكمان في ملاهي صغيرة، ومنافذ للناس اللي عاوزة تركب مركب في النيل، شوية هوا حلوين مع قعدة وإضاءة كويسة، وتذكرة دخول خمسة جنيه، لكن العيب الوحيد فيه عدم وجود مأكولات أو مشروبات هناك، يعني اللي عاوزين يشربوا كوباية شاي أو ياخدو سندوتش يبجيبوا معاهم من بره.

الملاهي جوه صغيرة وبسيطة لكن ظريفة للناس اللي عاوزة تتبسط بفلوس قليلة، اللعبة تمنها خمسة جنيه، هم مش كتير لكن دمهم خفيف، عربيات وفناجين تنزل منها دايخ وتحقق لك المعنى الحقيقي للملاهي.

 

حديقة الأورمان

في رأينا الحديقة دي حقها رايح، وفعليًا ماحدش بيعرف عنها حاجة ولا اسمها بيذكر غير لما حديقة معرض الزهور السنوي يتعمل فيها، ناس كتير بتروحها علشان معرض الزهور بس، مش علشان الحديقة نفسها، المنافسة بينها وبين حديقة الحيوان القريبة جدًا منها، مش في صالحها بأي شكل، صحيح إنها مافيهاش حيوانات لكن في رأينا الانبساط فيها أكبر وأكتر من حديقة الحيوان.

تذكرة الدخول 3 جنيه، وفيه جوه كافيه لطيف جدًا، والمنيو معقول، بيبدأ من خمسة جنيه لحد عشرين، وكمان في أكلات سريعة زي البيتزا بسعر معقول ما بيزدش عن 15 جنيه، مساحات اللعب كبيرة والتمشية، ودي حاجة نادرة في الحقيقة، وسط الزحمة اللي مالهاش نهاية.

 

حديقة الحيوان

دي بقى أشهر حاجة في اللي قولناه، وإن كنا بنتحفظ على زيارتها بسبب الأوضاع الصعبة للحيوانات جواها، ناس كتير بتروح تتفرج وتخرج، لكن اللي مربي حيوانات أو بيفهم فيها بيحس قد إيه الحيوانات جوه الحديقة بتعاني فعلًا، الفيل اللي في الأصل حياته على الطينة والحشائش واقف على أرضية أسمنت، والروائح جوه قفص الضباع تسد النفس، وفعليًا حاجات كثير جدًا صعبة، لكن لو ماكنتوش زينا من محبي الحيوانات والمنادين بحقوقها هستمتعوا بمنظر القرد وهو عمال يتنطط والزرافة وهي بتوطي تاكل من على دماغ الناس الجزر، والأسد وهو بيزأر والسيد قشطة وهو بيكركر في المية، الحديقة تذكرتها بخمسة جنيه بس وخمسة جنيه زيهم للمتحف اللي تم افتتاحه مؤخرا ويكاد يكون هو الحاجة الوحيدة الحلوة في الحديقة للناس اللي بتقدر الجمال.

الحديقة طبعًا مساحتها شاسعة ومليانة كافيهات وأكشاك، فمش هيكون في أي مشكلة متعلقة بالأكل والشرب والبلالين والذي منه، كمان المساحات كبيرة وتسمح بالجري واللعب للصبح، لكن طبعا الحديقة دي بتحكم زوارها أنهم ييجوا الصبح وآخرها الساعة أربعة، يعني مش مكان للتنزه بعد الشغل.. من الآخر عاوزة يوم أجازة.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
27/09/2016
-