النهارده في القاهرة: عروض مسرح وفلكلور إسباني وسينما - الحياة في كايرو Feature - كايرو 360
 







النهارده في القاهرة: عروض مسرح وفلكلور إسباني وسينما
النهارده في القاهرة: عروض مسرح وفلكلور إسباني وسينما
اصدرت في: 14/08/2016

وسط موسم المهرجانات اللي شغال بقاله فترة بداية من المهرجان القومي للمسرح وبعده المهرجان الصيفي للموسيقى والغناء، ولسه الموسم هيكمل معانا شوية كمان بمهرجان القلعة اللي داخل علينا كمان كام يوم.. وسط ده فضلت الفعاليات المنفصلة برضه ليها طعم تاني وجمهور خاص، الجمهور اللي بيحب الفعاليات الحرة اللي مش مرتبطة بلون معين ولا فكرة محددة.. والنهارده النصيب متقسم بالنصف.. قسمة عدل بين الفعاليات اللي بتأتي ضمن مهرجانات والفعاليات المنفصلة، تعالوا نشوف عندنا إيه.

البداية من عرض مسرحي يحمل اسم "الصفحة رقم 13" وهو بيتعرض لليوم الثاني على التوالي على مسرح الهوسابير.. العرض هو جزء من المهرجان القومي للمسرح اللي بيودع خلاص، سعر تذكرة الحضور 20 جنيه، وبداية العرض هتكون الساعة 7:00 والمسرح هيفتح أبوابه لاستقبال الزوار من 6:30.

وضمن مهرجان آخر هو مهرجان الصيف للموسيقى والغناء بدار الأوبرا هيستضيف المسرح المكشوف الفرقة الإسبانية "منى بوركهارد" اللي هتقدم عرض موسيقي راقص من الفلكلور الإسباني.. يُذكر أن نفس الفرقة هتشارك في معرض القلعة بعرض آخر، بالإضافة لحفل مستقل في ساقية الصاوي بعد أيام.. سعر تذكرة الحضور 50 جنيه، والبداية في تمام الثامنة مساءً.

أما عن الفعاليات المنفصلة فعندنا عرض فيلم "Radio Days" من كلاسيكيات السينما الأمريكية هتعرضه "روم آرت سبيس" ضمن سلسلة فعالياتها: "Coffee And Film Night".. مافيش تذكرة للحضور لكن الحد الأدنى للطلب من قائمة المشروبات في روم بيكون 25 جنيه.. عرض الفيلم هيبدأ 8:00 مساءً.

ونختم مع فعالية أخرى من الفعاليات المنفصلة، وهي فعالية فارضة نفسها علينا من حبة ومكملة معانا حبة كمان.. هنرجع معاها للمسرح تاني لكن المرة دي عودة تقيلة شويتين.. العرض المسرحي "ليلة من ألف ليلة" للفنان الكبير "يحيى الفخراني" على المسرح القومي بالعتبة.. العرض مستمر طيلة أيام شهر أغسطس ماعدا يوم الأربعاء من كل أسبوع، أسعار التذاكر بتبدأ من 30 جنيه للبلكون.. و 50 و 60 و 100 للصالة، والعرض بيبدأ الساعة 9:30 مساءً.

تابعوا أجندتنا واعرفوا الجديد أول بأول.. وسيبوا ترتيب خروجاتكم علينا.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
14/08/2016
-