النهارده في القاهرة: استمرار فعاليات مهرجان القلعة وعروض مسرحية ولقاء حكاوي سفر - الحياة في كايرو Feature - كايرو 360
 







النهارده في القاهرة: استمرار فعاليات مهرجان القلعة وعروض مسرحية ولقاء حكاوي سفر
النهارده في القاهرة: استمرار فعاليات مهرجان القلعة وعروض مسرحية ولقاء حكاوي سفر
اصدرت في: 22/08/2016

خلصت منافسات الأوليمبياد وانتهت الحاجة اللي كانت بتحلل قعدتنا في البيت قدام التليفزيون، والظاهر أن القاهرة متابعة كويس وواعية للدرجة اللي تخليها تاني يوم على طول من انتهاء منافسات الأوليمبياد تقوم نازلة بفعاليات غزيرة ومنوعة علشان تدينا اختيارات كتيرة، وتوفر لنا بديل فوري!

هيستمر مهرجان القلعة في تقديم وجبته اليومية الدسمة من ساعة ما بدأ.. والنهارده الدور هيكون على فرقة "افتكاسات" في الحفل الأول الساعة 8:00 مساءً، و على الفنان "محمد رشاد" في الحفل الثاني الساعة 10:00 مساءً.. سعر دخول حفلات المهرجان 5 جنيهات.

ومش هنبعد أوي عن القلعة ونروح لمنطقة الحسين اللي بتنتمي لنفس دايرة "القاهرة الإسلامية".. ونروح تحديدًا لوكالة الغوري اللي هتكون على موعد مع العرض الدوري المتكرر لفرقة التنورة التراثية، العرض هيبدأ الساعة 7:00 مساءً، وسعر التذكرة بيكون 5 جنيهات للمصريين و 30 للأجانب.

ومن الحسين للعتبة ومنطقة وسط البلد علشان نلاقي نفسنا على معاد مع 3 عروض مسرحية قوية.. الأول مستمر معانا من فترة وهو عرض "ليلة من ألف ليلة" للفنان الكبير يحيى الفخراني في المسرح القومي، العرض بيبدأ الساعة 9:30 والتذاكر بيتراوح سعرها من 30 لـ 100 جنيه.. والعرض التاني هيكون على مسرح الطليعة، عرض "الإنسان الطيب" اللي بيقدمه أبطاله من جديد بعد ما حقق نجاح ملفت في المهرجان القومي للمسرح، العرض هيبدأ الساعة 7:00 وسعر التذكرة 20جنيه.. أما العرض الأخير فهيكون على مسرح ساحة روابط في وسط البلد بتنظيم جمعية "من أحياها" التنموية، العرض هيكون بعنوان "العلبة دي فيها إيه" وهيقدمه أطفال البحاروة اللي كانوا من ضمن الشريحة المستهدفة لأعمال الجمعية من فترة، البداية هتكون الساعة 6:00 والدعوة عامة.

ونختم مع فعالية من نوع مختلف في وسط البلد برضه لكن المرة دي من "مساحة".. اللي هتستضيف لقاء بعنوان "حكاوي السفر من إثيوبيا"، اللقاء هيكون مع الصحفية الشابة "آية امان" وزميلها "هيثم" اللي قاموا برحلة لإثيوبيا من فترة قريبة بغرض تغطية أعمال سد النهضة الإثيوبي.. هيحكوا عن رحلتهم وعن تفاصيلها وعن اللي شافوه واللي عاشوه.. اللقاء هيبدأ 6:30 مساءً، والدعوة عامة.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
22/08/2016
-