النهارده في القاهرة: لؤي في القلعة ومهرجان للتمثيل الصامت ومسرحيات وفن شعبي - الحياة في كايرو Feature - كايرو 360
 







النهارده في القاهرة: لؤي في القلعة ومهرجان للتمثيل الصامت ومسرحيات وفن شعبي
النهارده في القاهرة: لؤي في القلعة ومهرجان للتمثيل الصامت ومسرحيات وفن شعبي
اصدرت في: 23/08/2016

بعد يوم مزدحم بالفعاليات امبارح راجعة لنا القاهرة النهارده بلعب على الهادي مع مجموعة فعاليات مألوفة نسبيًا لينا. البداية زي ما اتعودنا الفترة دي لازم تكون من مهرجان القلعة، اللي هيقدم لنا النهارده فرقة عمدان النور في الحفل الأول الساعة 8:00 مساءً، وهيقدم لنا في الحفل الثاني الفنان "لؤي" الساعة 10:00 مساءً، وسعر تذكرة الدخول خمسة جنيهات زي ما عرفنا.

المحطة التانية هتكون "ساقية الصاوي" اللي هنكون فيها على معاد مع مهرجان من نوع آخر، مهرجان الساقية للتمثيل الصامت في دورته الـ 12، المهرجان هيضم مجموعة كبيرة من العروض التمثيلية الصامتة اللي هتكون مدة كل واحد منها 10 دقائق بحد أقصى، وهيستمر المهرجان على مدار يومين (النهارده وبكرة) وبعدين هيتم اختيار العرض الفائز بمشاركة الجمهور وتسليمه جائزة المهرجان. العروض هتبدأ في السادسة مساءً، وسعر تذكرة الحضور 15 جنيه لغير أعضاء الساقية، و 10 جنيهات للأعضاء.

ثالث محطاتنا هتكون من وسط البلد مع المركز المصري للثقافة والفنون "مكان" اللي معودنا على تقديم ألوان مختلفة من الفنون الشعبية والفلكلورية، هيستضيف النهارده فرقة الفنان الصعيدي "سيد ركابي" من جعافرة أسوان، وسعر تذكرة الحضور 30 جنيه، والعرض هيبدأ الساعة 8:00 مساءً.

ونختم مع الفعاليات المستمرة معانا من قبل كده زي مسرحية "ليلة من ألف ليلة" للفنان الكبير يحيى الفخراني على المسرح القومي بالعتبة، اللي هتبدأ الساعة 9:30 مساءً وسعر تذاكرها بيتراوح من 30 لـ 100 جنيه. وزي مسرحية "الإنسان الطيب" على مسرح الطليعة بالعتبة، اللي هيبدأ عرضها الساعة 7:00 مساءً وسعر تذكرة حضورها 20 جنيه.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
23/08/2016
-