النهارده في القاهرة: حفلات وعروض مسرحية وفلكلورية ونادي لغوي - الحياة في كايرو Feature - كايرو 360
 







النهارده في القاهرة: حفلات وعروض مسرحية وفلكلورية ونادي لغوي
النهارده في القاهرة: حفلات وعروض مسرحية وفلكلورية ونادي لغوي
اصدرت في: 31/08/2016

آخر أيام أغسطس، نفوتك بعافية يا شهر، وشكرًا على واجب الختام.. واجب الختام النهارده مقسوم نصفين، نصف حفلات، ونصف عروض.

نصف الحفلات متضمن 3 حفلات كل واحدة فيهم وجبة تقيلة نعيش عليها زمن! الوجبة الأولى من مسرح قاعة الحكمة بساقية الصاوي اللي هيستضيف النهاردة حفل غنائي للفنان الكبير علي الحجار بداية من الساعة 9:00 مساءً، وأقل سعر لتذكرة الحضور هيكون 60 جنيه لغير الأعضاء و 55 للأعضاء.. أما الوجبتين الثانية والثالثة هيكونوا من مهرجان القلعة اللي لسه فعالياته مستمرة، وجبة الساعة 8:00 مساءً مع فرقة "بغدادي باند"، ووجبة الساعة 10:00 مساءً مع الفنان "خالد سليم"، وسعر تذكرة دخول الحفلات 5 جنيهات.

أما النصف الثاني وهو نصف العروض هيقدم لنا عرض التنورة في وكالة الغوري من الساعة 7:00 مساءً، بسعر 5 جنيهات لتذاكر الحضور للمصريين و 30 للأجانب.. وهيقدم لنا كمان عرضين مسرحيين بدرجة: متميزين جدًا، العرض الأول هيكون عرض "دقة بدقة" المأخوذ عن أحد النصوص المسرحية لـ "ويليام شكسبير" من على مسرح الفلكي بحرم الجامعة الأمريكية في التحرير، وده هيبدأ الساعة 8:00 مساءً وسعر تذكرة حضوره 40 جنيه، ويذكر أنه النهارده هيكون آخر أيام العرض، والعرض الثاني هيكون من مسرح الهوسابير وهو عرض "البروفة" اللي بيقدمه الفريق الشبابي "1980 و أنت طالع"، العرض هيبدأ الساعة 8:00 مساءً وتذكرة حضوره بـ 25 جنيه.

نختم الفعاليات بفعالية إضافية محايدة، لا هي تبع النصف الأولاني ولا الثاني، فعالية ذات طابع تعليمي تفاعلي شوية، من "روم آرت سبيس" في الزمالك اللي هتستضيف نادي لغوي للتفاعل وممارسة اللغات المختلفة، الفعالية هتبدأ 7:00 مساءً، والحد الأدنى للطلب من قائمة البوفيه في "روم" 25 جنيه.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
31/08/2016
-