حاجات لازم تعرفها قبل ما تشتري خروف العيد - الحياة في كايرو Feature - كايرو 360
 







حاجات لازم تعرفها قبل ما تشتري خروف العيد
حاجات لازم تعرفها قبل ما تشتري خروف العيد
اصدرت في: 04/09/2016

عيد أضحى سعيد، والعيد يعني خروف وصوت مأمأة في الشوارع ليلة الوقفة، اعرف من موضوعنا ده شوية نصائح مهمة لازم تبقى عارفها قبل ما تقرر تشتري خروف العيد.

 

عمر الخروف!

أول حاجة لازم تبقى عارفها هي عمر الخروف اللي هتشتريه، ماينفعش أبدًا يكون عمره أقل من سنة، طب إزاي تعرف عمر الخروف؟

الخروف اللي عمره أقل من سنة بتكون جميع الأسنان الأربعة الأمامية من الفك السفلى لونها أبيض، وحجمها واحد، لكن لو عمره سنتين بتكون أحد الأسنان الأربعة اختلف شكلها وكبر حجمها.

لو وصل ل3 سنين ونص بيكون بدل زوجين من الأسنان اللبنية، وبيظهر له أربع أسنان طويلة في نص الفك السفلى، بيحاوطها من كل جانب سنتين صغيرين.

الوزن المثالي للخروف!

الوزن المثالي للخروف بيترواح من 50 إلى 60 كيلو، بلاش تجيب حاجة أقل من كدة.

 

نصيحة كايرو 360:

بعض التجار بيحاولوا يقوموا بعملية غش، بيعملوا إيه بقى؟ بيخلوا الخروف ياكل ملح كتير، وبالتالي يعطش ويشرب مياه بدون توقف، وده بيخليه منفوخ ووزنه تقيل، علشان تتأكد أنك بتشتري خروف وزني طبيعي اضغط على البطن من الجانبين هيبان لك كل شيء.

 

النشاط والحيوية!

لازم الخروف يكون نشيط أمامك، وأبعد عن الخروف اللي رجله مكسورة أو ودانه مجروحة، ومايكونش أعرج أو أعمى. وأوعى تشتري خروف قرونه مكسورة، لأن ده معناه أنه بيعاني من مرض.

أول يوم العيد!

بعد الذبح لازم تعمل تجميد سريع للحوم، وفيه عادة مش صحية بيقوم بها بعض الناس وهي وضع ملح طعام على اللحمة قبل التجميد، ده مش صح، كمان الأفضل تحط اللحمة قبل التجميد فى عبوات غير منفذة للهواء والرطوبة. ولازم تحط اللحوم في الثلاجة أو الديب فريزر بمجرد التقطيع علشان ماتكونش عرضه للتلوث بالميكروبات .

 

نصيحة كايرو 360:

أفضل حاجة تشتري من مزارع وفلاحين عندهم مقر ثابت، وبلاش تشتري من الباعة المتجولين لأنك مش هتبقى عارف مصدر تغذية الخرفان.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
04/09/2016
-