أفكار مبهجة هتخلي عيدك أجمل - الحياة في كايرو Feature - كايرو 360
 







أفكار مبهجة هتخلي عيدك أجمل
أفكار مبهجة هتخلي عيدك أجمل
اصدرت في: 10/09/2016

لمة العيلة يوم الوقفة على الفطار، والسهر طول الليل فرحانين بالخروف وبنغني أغاني العيد سواء. يمكن دي حاجات بدأت تختفي شوية من مجتمعنا. وبقى فيه طقوس جديدة للعيد زي السفر لأماكن مختلفة من غير العيلة أو فطار مع الأصحاب بدل الأهل، وإن كان التغيير مطلوب إلا أن فيه حاجات غلاوتها وجمالها في لمة العيلة.

وإحنا هنا بنحاول نوفر لكم أفكار تساعدكم تحسوا بدفا العيلة والصحاب أكتر وكل سنة وأنتم طيبين.

بعد مغرب يوم الحد هتبدأ مراسم الأحتفال بالعيد، وأغاني "أهلًا أهلًا بالعيد" و"يا ليلة العيد أنستينا" وسعدنا بيها اللي كنا فاكرينه بني أدم اسمه "سعد نبيهة" لحد فترة قريبة جدًا.

ممكن تبدأ معانا خطة مختلفة أنك تقضي بيها العيد.

اشتري بلالين وبنبوني ووزعهم على الأطفال في الصلاة.

الأطفال بتفرح جدًا بالحاجات والكبار كمان والله.

وزع اللحمة بنفسك مع حد من أهلك أو صحابك

بحيث تبقوا بتعملوا حاجة جميلة سوا وتكون متأكد أنك وزعت للي يستحق.

اكتب ورقة على باب البيت الموبايلات ممنوعة وحط جنبها باسكت تحط فيه كل الموبايلات.

 وخلي كل اللي يدخل يحط موبايله علشان العيلة تتكلم مع بعض زي زمان واللي يمسك موبايله دفعه غرامة.

روح أقرب دار أيتام لبيتك أو مستشفى 57357 تاني أو ثالث يوم العيد مع أطفال عيلتك الصغيرين واشتروا لهم هدايا وافرحوا معاهم، بس يا ريت ماتكونش أخر زيارة.

جيبوا طيارات ورق وطيروهم من فوق سطح العمارة سوا.

نعيد فكرة الطبق اللي فيه حاجة حلوة ما بينا وبين جيراننا، طبق طالع نازل مليان حاجات بسيطة تقول لهم إحنا بنحبكم!

مافيهاش حاجة لو عملت صينية من أكل اليوم للسيكيورتي أو البواب فيه فتة وحاجة حلوة.

اعمل جدول بحيث كل يوم تعمل حاجة أنت بتحبها، ما بين خروج ما الناس اللي بتحبهم وراحة علشان تستمتع بكل دقيقة في أجازتك.

وكل سنة وإحنا فاكرين وشاكرين نعم ربنا علينا اللي منها لمة العيلة وحبهم لينا واللي فعلًا ما يتقدرش بمال.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
نجلاء أشرف
حرر بواسطة:
نجلاء أشرف
تاريخ النشر:
10/09/2016
محرر مساعد بالموقع العربي، حالمة جدًا وعايشة في كوكب ثاني وبـ تحب تكتب عن كل حاجة بـ تحصل لها، دائمًا بـ تضحك حتى في أصعب المواقف وبـ تحب البلالين والتيوليب والصحبة الحلوة.