حاجات تعملها لو لقيت نفسك مقضي العيد في البيت - الحياة في كايرو Feature - كايرو 360
 







حاجات تعملها لو لقيت نفسك مقضي العيد في البيت
حاجات تعملها لو لقيت نفسك مقضي العيد في البيت
اصدرت في: 13/09/2016

عارفين أن أجازة العيد ده طويلة؛ وأجازة طويلة يعني سفر. بس أكيد فيه حد مسكين مضطر أنه يقضي أجازة العيد في البيت –مش مشكلة، في المقال ده هنكتب لك عن حاجات ممكن تعملها في البيت في العيد ده.

 

1 – فكك من مواقع التواصل الاجتماعي، الإنترنت أكبر من كده بكثير:

دعنا نعترف أن فيه جزء مننا "بينفسن" لما يلاقي الناس حاطة صورها وهي في مسافرة مش عارف فين، وهما بيعملوا مش عارف إيه في موسم الإجازات وحضرتك قاعد مع نفسك أو مع الموبايل ما بتعملش حاجة غير أنك بتدوس لايك وبتندب حظك. لو طلبت أنك تفتح الكومبيوتر أو حتى الموبايل؛ ليه ما تدخلش على موقع مفيد تطلع منه بمعلومة أو فكرة.

من المواقع المسلية والمفيدة في الوقت نفسه هي أراجيك - Arageek، وهي مجلة بتجمع مقالات عن مجالات زي الفن والعلوم وعالم التكنولوجيا. ممكن كمان تدخل على موقع ناشيونال جيوجرافيك تشوف حاجات عمرك ما شوفتها قبل كده، وحتي لو أنت ما لكش في العلوم وحاسس أنها هتبقى جد عليك، تأكد أنك مش هتندم لأن المعلومات متقدمة ببساطة فمش هتحس أنك قاعد في قاعة محاضرات.

أما لو كان نفسك تسافر للدرجة، تقدر تدخل على أيربانو – Airpano، وهو موقع مصور لك كل الأماكن المشهورة اللي موجودة في العالم بطريقة البانورامة 360 درجة، وكده هتكون سافرت ببلاش.

 

2- القراءة ثم القراءة:

صاحب كتاب يا أخي، ده ما فيش أحلى من كوباية قهوة أو شاي –أو مشروبك المفضل- مع موسيقى هادية في الخلفية وكتاب دمه خفيف، شعر يخليك تتأمل أو حتى رواية أحداثها تاخدك لمكان ثاني. إحنا شخصيًا عجبنا مجموعة كتب منها ديوان "لا جنة في الأرض" لـ شريف رشاد، ورواية "شرف" لإليف شافاك. ولو بتحب أدب الرحلات ممكن تقرأ "أوربا بتوقيت إمبابة" لمحمود زكي وهو كتاب دمه خفيف جدًا لأنه ساخر. وممكن تقلب هنا برضه هتلاقي اقتراحات كثيرة ممكن تختار منها.

 

3 – ألعب يوجا:

اليوجا من الحاجات اللي ممكن تتعمل في أي مكان وفي كل وقت، حتى وأنت قاعد على السرير. إحنا كتبنا مقال العيد اللي فات عن نصايح وطرق تمارس بيها رياضة اليوجا، واللي ممكن تلاقي لها فيديوهات تعليمية كثيرة على الإنترنت، شوف ده طيب.

 

4 – هو صحيح عيد اللحمة، بس جرب تطبخ

ما فيش أحلى من الأكل؛ والأحلى كمان لما تقرر أنك تطبخه بإيدك. إحنا عارفين طبعًا أن أنت مش الشيف شربيي، ولا حتى مدام خشاب بس جرب كده تجيب وصفة سهلة ما تاخدش منك 5 دقايق وتكون في مستكينة في معدتك. عندك مثلًا موقع ظريف اسمه محشي. كوم –أيوه أنت قريت صح، هتلاقي عليه وصفات ياما تقدر تنفذها في البيت... وبالهنا والشفا.

 

5 – اتفرج على أفلام العيد واحد ورا الثاني:

عندك بقى مش أقل من خمس أفلام نازلة العيد ده، زي "حملة فريزر" لشيكو وهشام ماجد، "كلب بلدي" لأحمد فهمي و"لف ودوران" لأحمد حلمي وأفلام ثانية كمان. نقي أنت بس سينما نضيفة علشان الزحمة. تقدر تشوف السينما العيد ده هيكون فيها إيه، والمواعيد برضه من هنا.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
دينا مختار
حرر بواسطة:
دينا مختار
تاريخ النشر:
13/09/2016
منسق تحريري.. الشخص اللى تلاقيه قاعد لوحده على القهوة الصبح بدري بـ يتفرج على الخلق، سيب لها قلم وورقة فاضية هـ ترجع تلاقيها إما كاتبة قصة قصيرة أو راسمة باب شعبي قديم، تطلعها من وسط مليون بلبسها المنقوش فى منقوش.