النهارده في القاهرة: عروض باليه ومسرح وأفلام - الحياة في كايرو Feature - كايرو 360
 







النهارده في القاهرة: عروض باليه ومسرح وأفلام
النهارده في القاهرة: عروض باليه ومسرح وأفلام
اصدرت في: 03/10/2016

الظاهر أنه أكتوبر قرر يمشي على خطى أخوه سبتمبر وجاي لنا إجازاته كتير، مشكلة الموضوع ده بس أننا مابنلحقش نرجع لتركيز الشغل بسهولة وسرعة فبنحس أننا دايمًا بالبلدي كده: مهنّجين ومحتاجين نعمل "ريفريش" كل شوية علشان نقدر نواصل.

النهارده بداية متأخرة للأسبوع بعد إجازة امبارح، فطبيعي جدًا أن الـ "تهنيج" اللي اتكلمنا عليه يبقى في أشد حالاته، وده علاجه المضمون خروجة لطيفة مع صحبة حلوة.

الوصفة الأولى هي وصفة ذات جرعة عالية حبتين من المادة الفعالة، تقدر تجيبها من دار الأوبرا، ومن المسرح الكبير تحديدًا في تمام الثامنة مساءً مع ثالث أيام عرض الباليه العظيم "سبارتاكوس" اللي هتقدمه فرقة باليه الأوبرا، وأسعار تذاكر حضوره 50، 75، 100 جنيه.

تاني الوصفات هتكون متوفرة في ساقية الصاوي في تمام السابعة مساءً من قاعة الحكمة مع عرض مسرحي يحمل اسم "حبيتك يا مصر" هتقدمه فرقة أحلام مصر، سعر تذكرة حضوره 20 جنيه لغير الأعضاء و 15 للأعضاء.

أما عن تالت الاختيارات فهتكون من مركز دال بجاردن سيتي اللي هيستضيف ضمن فعاليات نادي الكتاب التابع ليه عرض لفيلم "Bogowie" في تمام السادسة مساءً، وكالعادة الدعوة عامة والحضور مجاني.

في حين هتستمر عروض الدورة الثالثة لمهرجان الجيزويت للفيلم في جيزويت القاهرة برمسيس ابتداءً من الخامسة مساءً.

نتمنى لكم دوام السعادة والانبساط، وألف سلامة عليكم من التهنيج.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
03/10/2016
-