النهارده في القاهرة: حفلات موسيقية منوعة وعروض أفلام - الحياة في كايرو Feature - كايرو 360
 







النهارده في القاهرة: حفلات موسيقية منوعة وعروض أفلام
النهارده في القاهرة: حفلات موسيقية منوعة وعروض أفلام
اصدرت في: 09/10/2016

بداية أسبوع جديد، ييجي معاها احتياجنا المتجدد لشحن جرعات طاقة إيجابية تخلينا نكمل بقية الأسبوع بشكل كويس، تعالوا ناخد لفتنا المعتادة في الأجندة بتاعتنا ونشوف ممكن نشحن انبساط منين النهارده!

ساقية الصاوي كالعادة حضورها مميز وتقيل، ومشاركة معانا النهارده بحفلتين من اللي القلب يحبهم، الأولى على مسرح قاعة الحكمة وهتكون عبارة عن حفل لأغنيات العندليب الأسمر الراحل عبدالحليم حافظ بأداء تمثيلي من فرقة مسرح عرائس الساقية، بداية العرض هتكون في تمام الساعة السابعة مساءً، وسعر تذكرة حضوره 15 جنيه.
أما الثانية فهتكون من على مسرح قاعة النهر اللي هيستضيف فرقة "مولاي" للإنشاد الصوفي اللي أعيدت صياغته في قالب حركي معاصر، سعر تذكرة الحضور 35 جنيهًا، والبداية هتكون في تمام السابعة والنصف مساءً.

ومن بيت السناري في السيدة زينب هنكون على معاد موسيقى آخر مميز لكن بلون آخر مختلف تمامًا، موسيقى الروك هيقدمها فريق "سلاسل باند" في حفلتهم اللي شايلة اسم "بروجريسف روك"، الدعوة عامة والحضور مجاني، والبداية هتكون في تمام السابعة مساءً.

وفي درب 17 18 بمنطقة مجمع الأديان في مصر القديمة هتستضيف سينما الفرن ضمن سلسلة فعالياتها "ليلة ألماني" عرض للفيلم الألماني "Welcome to Germany"، الدعوة عامة والحضور مجاني، وبداية العرض هتكون في تمام السابعة والنصف مساءً.

والختام هيكون مع فعالية مشابهة من روم آرت سبيس اللي هتستضيف برضه عرض لفيلم آخر، فيلم "full metal jacket"، من غير تذاكر دخول لكن بحد أدنى للطلب من قائمة البوفيه 25 جنيهًا، وبداية العرض في تمام الثامنة مساءً.

أسبوع سعيد وخفيف عليكم جميعًا.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
09/10/2016
-