تعليم الموسيقى في القاهرة
تعليم الموسيقى في القاهرة
اصدرت في: 21/04/2011

ناس كتير بـ تسألنا "أتعلم مزيكا فين؟" أصلي بفكر أشتري عود وعايز حد يعلمني!، انا بقى إشتريت جيتار ومش لاقي مكان أتعلم فيه! الحقيقة أن القاهرة مليانة مراكز تعليم مزيكا، مش مراكز بس ده فيه أفراد كمان بـ يدَّوا حصص ودروس خصوصية في أماكن عامة أو خاصة وفي البيوت، سواء بيت المدرس أو الدارس، هـ نحاول نلقي الضوء على أهم الأماكن اللي ممكن تتعلم فيها آلتك المفضلة، وهـ نحاول نقولك فين تتعلم الآلات الغير معتادة، اللي ممكن تلاقي صعوبة فعلاً في إنك تلاقي حد يعلمها لك زي آلات النفخ والدرامز والكونتراباص.

مراكز تعليمية كتيرة مرتبطة بمنافذ بيع آلات موسيقية ومعدات صوتية وأشهرها «مركز ياماها» في مصر الجديدة بس للأسف المركز نفسه مابقاش يعمل حصص تعليمية، بس ممكن تروح تاخد منهم أرقام وبيانات مدرسين لكل الآلات بـ يسيبوا الكارت بتاعهم هناك وتكلمهم وتظبط معاهم.

«معهد القيثارة» من أهم مراكز تعليم الفنون عامة والموسيقى خاصة، له فروع في مصر الجديدة ومدينة نصر والرحاب والتعليم فيه بـ يكون فردي، يعني انت والمدرس بس في حصة مدتها ساعة إلا ربع والإتفاق بـ يكون على 4 حصص مقدماً بسعر 100 جنيه وده لآلات البيانو والكمان والفلوت والجيتار والعود والتشيللو والقانون، و4 حصص للدرامز بـ200 جنيه، للأسف مفيش آلات نفخ نحاسية أو كونتراباص. المعهد شغال طول الأسبوع لحد الساعة 10 بالليل.

إستوديو ومحل «ديستينجو» في المعادي فيه مكان مخصص لتعليم المزيكا، بس بأسعار أعلى شوية من غيره من الأماكن، حصة الجيتار بـ90 جنيه وحصة الأورج بـ75 جنيه والدرامز بـ يكون يوم الثلاثاء بس و بـ90 جنيه الحصة برضه والميعاد انت بـ تحدده بالإتفاق مع إدارة المكان وحسب ظروفك أنت.

واحد من أهم الأماكن اللي ممكن تتعلم فيها – بالفرجة قبل الدروس – هو «ساقية الصاوي» وهناك ممكن تتعلم بيانو وجيتار بأسعار معقولة جداً وبـ تدفع مقدم 4 حصص أو إشتراك شهري، ولو عملت عضوية سنوية في الساقية السعر بـ يقل، والأهم انك ممكن تشترك في كورال الساقية للكبار أو الصغار لو بـ تحب الغناء أو عايز تتعلم الغناء، جرب مرة زيارة للساقية وإسأل في الإستعلامات عن كل الأنشطة الموسيقية للساقية.

بيت العود الموجود في «بيت الهراوي» في منطقة الحسين متخصص في تعليم العود، ممكن تشترك في البرنامج الموسمي للتعليم تحت قيادة الفنان العراقي «نصير شمة» أحد أفضل "العوادين" في العالم حالياً، وسعر الكورس ومواعيده بـ تختلف من موسم للتاني.

«المركز الثقافي الروسي» في الدقي بـ يعمل كورسات بيانو وكمان وإيقاع وجيتار وتدريب أصوات بس كله باللغة الإنجليزية عشان المدربين من روسيا ومش بـ يتكلموا عربي طبعاً، والحصة بـ75 جنيه ومدتها ساعة، وفيه كورسات تعليم للأطفال وهنا الـ4 حصص بـ250 جنيه والكورس بـ يبقى مرة في الأسبوع.

«دار الأوبرا المصرية» فيها تعليم خاص (Private) من خلال مدرسين متخصصين وممكن توصلهم من خلال مكتب الإستعلامات في الأوبرا وممكن تاخد الحصص هناك أو في مكان خاص والحساب بـ يكون بالحصة اللي سعرها بـ يبدأ من 30 جنيه، وطبعاً الآلات المتاحة هي البيانو والجيتار والكمان والتشيللو والكونتراباص وممكن تلاقي مدرسين آلات تانية بس مش طول الوقت.

التعليم الخاص أو العازفين اللي بـ يدوا حصص مزيكا ده عالم واسع جداً، والموضوع بـ يكون محتاج معارف شخصية أو ممكن من خلال الإتصال بإستديوهات البروﭭات أو مراكز التعليم، وممكن اللي ماعندوش دايرة معارف تسمحله أنه يوصل لحد من المدرسين دول يبعت لنا على info@cairo360.com وإحنا نرشحله اسامي مدرسين لكل الآلات وأرقام تليفوناتهم.
التعليقات
تصويت

Loading...

اكسب! يومين إقامة فى فندق كونراد القاهرة!
اكسب! يومين إقامة فى فندق كونراد القاهرة!
عن الكاتب
وليد أبوعرب
حرر بواسطة:
وليد أبوعرب
تاريخ النشر:
21/04/2011
محرر مساعد سابق - بـ يحب الخروج، دماغه فى الفرق الموسيقية وبـ يلعب مزيكا، بـ يحب يكون عنده معرفة عن كل شيء، بـ يزهق بسرعة! ما بـ يحبش تويتر.