إزاي تخدم مصر بعد الثورة؟ - الحياة في كايرو Feature - كايرو 360
 







إزاي تخدم مصر بعد الثورة؟
إزاي تخدم مصر بعد الثورة؟
اصدرت في: 25/04/2011

الثورة مانتهتش بسقوط مبارك، الثورة ابتدت عند كل واحد فينا ومش هـ تنتهي غير لما كلنا نقوم بدورنا وواجبنا تجاه مصر، وكل واحد واللي يقدر عليه، المهم كلنا نساهم، لكن إزاي؟

أولاً لازم تعرف إنت قدراتك إيه وتقدر تساهم بإيه يعني لو لسة في المدرسة ففي مهام ممكن تقوم بيها، ولو بـ تدرس في الجامعة لك مهام، ولو متخرج ومش لاقي شغل وفاضي لك مهام، ولو مشغول وهلكان برضه لك دور وتقدر تعمل حاجة المهم تحدد أنت قادر تعمل إيه.

لو لسة في المدرسة

عندك حاجات كتير تقوم بيها، في مقدمتها إنك تنظم نفسك إنت وزمايلك وتكونوا مجموعات، تقوم على تنظيم وتجميل ونظافة المدرسة، يعني مجموعة تكون مسئولة عن رفع لافتات تنادي بنظافة المدرسة وكمان الشارع اللي كل واحد منكم ساكن فيه، وتنضف كمان بنفسها. ومجموعة تتعاون مع مدرس الزراعة وتنشر اللون الأخضر في المكان، ومجموعة تحاول تزين وتدهن الأسوار الخارجية للمدرسة لو كانت مش نظيفة، وتلونوها كلكم بأيديكم بمساعدة أستاذ الرسم.

في مدرسة المنيرة الإعدادية بنين عملوا كده، في مبادرة بعنوان "معسكر الخدمة الإجتماعية" هـ ينضفوا حي المنيرة ويدهنوا الرصيف والمحلات، وهـ ينضفوا المدرسة من جوه، الأستاذ محمد إسماعيل الصيامي مدير المدرسة ممكن يساعدك لو حابب تنضم أو تعمم التجربة في مدرستك والمدارس اللي تعرفها. ممكن تزور موقع المدرسة، لو تحب تراسلهم وتشترك معاهم.

في الجامعة

الجامعة هي مركز النشاط، سواء من خلال الأسر أو من خلال مجموعات العمل، والنشاط فيها ممكن يكون عملي من خلال المساهمة التطوعية أو بإنك تحاول الحصول على المنح المتوافرة عشان لما تخرج لسوق العمل تقدر تخدم مصر فعلاً، وده أصبح سهل، لأن خلاص ماعدش فيه حرس جامعي، ولا عاد ممارسة النشاط محتاج موافقة الجهات الأمنية.

الأسر كتير، منها مثلاً أسرة «علشانك يا بلدي» في جامعة القاهرة، واللي قامت بعد الثورة بضم 150 متطوع من كلية الصيدلة هـ يقوموا بتجميل حي زينهم في جنوب القاهرة، و«علشانك يا بلدي» مش موجودة في كلية الصيدلة بس، لأ دي موجودة في جامعات مصرية كتير خاصة وحكومية زي الجامعة الأمريكية وعين شمس، والقاهرة وتقدر تعرف هم موجودين فين كمان وتنضم لهم من خلال موقعهم، ومن خلال انضمامك لهم هـ تختاروا حي قريب ليكم وتشتغلوا عليه نضافة وتجميل وإهتمام، وانت وشطارتك بقى.

لو كنت متخرج وفاضي

قدامك مليون حاجة تعملها ، أبسطها إنك تتطوع وتنضم لمجال العمل الأهلي، أو تنضم لمبادرة من المبادرات اللي عاوزة تبني مصر، ودي ممكن تتعرف عليها من خلال «مركز موارد تنمية الشباب» وده بـ يحاول يدعم ويطور قطاع تنمية المجتمع المتنامى، من خلال ربط الشباب المهتم بالعمل والتطوع بالمبادرات الشبابية اللى إتشكلت بعد الثورة، والمنظمات غير الهادفة للربح، وقطاعات المسئولية المجتمعية للشركات، المنظمات التنموية الدولية زي الأمم المتحدة، و برامج المعونة من أجل التنمية، وشركات الإستشارات التنموية، وممكن تتواصل معهم من خلال موقعهم أو علي البريد الإكتروني.

وقدامك الأماكن التقليدية اللي ممكن من خلالها انك تساعد زي «جمعية رسالة» مش شرط تقدملها تبرعات، ممكن تفيد بعلمك حد محتاج، وتعلم ناس مش متعلمة، وتوصل الأكل والفلوس لأسر فقيرة، وتساعد انسان كفيف، وتساعد في حاجات كتير كمان ممكن تعرفها من خلال موقع رسالة.

لو كنت بـ تشتغل ومعندكش وقت فاضي

ممكن تساهم برضه حتى لو بالأموال، من خلال دعم الجمعيات اللي بـ تساعد على بناء البلد أو مساعدة أسر الشهداء، وطريق مساعدة الشهداء كتير جداً، سواء من خلال جميعات أو مؤسسات أو جهود فردية، ومنها على سبيل المثال فريق «متضامنون»، وده فريق تم تأسيسه بعد ثورة 25 يناير بهدف تقديم الدعم لأسر الشهداء والمصابين في الثورة، وهنا موقعهم.

أو ممكن تساعد من خلال جمعية «جيل مصر للتنمية والأعمال» ودي نموذج لجمعيات بـ تقدم مساعدات لفئات مختلفة في المجتمع ولما أحوالهم تبقى أحسن المجتمع كله بـ يبقى أحسن، موقعهم هنا. كمان فيه جمعيات معروفة جداً ممكن تقدملها تبرعاتك زي جمعية «مصر الخير» وأرقام حساباتها هـ تلاقيها على الموقع ده.

ممكن تساهم بالأفكار وده أضعف الإيمان من خلال موقع «بنك الأفكار»، وهو أكبر موقع لتطوير الأفكار، من خلاله تقدر تضيف فكرتك فى أى مجال، ومقابل ده بـ يقوم المتخصصين في مجال الفكرة دي بالتعليق عليها، وتقييمها في بنك الأفكار، ومن خلال المناقشة والتعليقات تقدر تعدل من فكرتك وتطورها.

بعد عرض مجموعة السبل دي لخدمة المجتمع المفروض ماحدش يبقى له حجة مهما كانت ظروفه أنه يساعد في حدود الدايرة اللي هو فيها على الأقل، عشان بجد دي أول مرة دورنا هـ يبقى مؤثر ومش مجرد شعارات وسكة للنصب والإدعاء زي زمان، ولو ما وقفناش جنب بعض دلوقتي، مش هـ نشوف المستقبل اللي إحنا بـ نحلم بيه في مصرنا الجديدة.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
رحاب لؤي
حرر بواسطة:
رحاب لؤي
تاريخ النشر:
25/04/2011