الأيربراش: شخصيتك من موتوسيكلك - الحياة في كايرو Feature - كايرو 360
 







الأيربراش: شخصيتك من موتوسيكلك
الأيربراش: شخصيتك من موتوسيكلك
اصدرت في: 15/08/2011

عربيتك مش مجرد وسيلة مواصلات "شيك" لكن دي ملك خاص يعكس شخصيتك وأفكارك وطباعك وستايلك في الحياة، علشان كده أنت مش بس بـ تختار نوع أو ماركة العربية لكن كمان الرسمة اللي عليها.

فن الـ"أيربراش" Airbrush ممكن ترسم به لوحة فنية من الجماجم أو الشعلات أو مجرد بعض الشرائط "سترايبس" أو أي حاجة تيجي في بالك.. المهم أن العربية أو الموتوسيكل يعبر عن صاحبه زي ما فيه ناس بـ تعمل "تاتو" يعبر عن اختلافها عن بقية الناس.

ومع الإحساس العالي بالوطنية اللي انتشر من بعد 25 يناير، طلع موتوسيكل الثورة عليه علم مصر وتاريخ 25 يناير مكتوب بورق الذهب Gold Leaf مع تركيبات فنية لمشاهد مؤثرة من الثورة.

ممكن تشوف الموضوع "Over" وما يستاهلش أو أنه رفاهية زائدة لكن بالنسبة للشباب اللي عندهم موتوسيكلات لماركات كبيرة زي "هارلي ديفيدسون"، الهوية والشخصية الفريدة "اليونيك" بـ تسبب لهم هوس.

واللي يكون مزاجه جايب على موتوسيكل "هارلي" من 80 ألف وأنت طالع، بـ يكون مهم بالنسبة له يضيف عليه لمسته الخاصة أوي سواء بإكسسوارات للموتوسيكل أو شكل ورسمة معينة يحب يظهر بها وتكلفه كام ألف.

سعر الأيربراش بـ يختلف حسب حجم الرسم والألوان (الطلاء) والتأثيرات الخاصة المطلوبة فيها Special Effects زي تحول الألوان أو لمعان معين أو استخدام ألوان تنور في الظلام.

بالميت كده.. هـ تدفع لك ألفين جنيه والاستلام بعد أسبوعين بالميت برضه (ممكن يوصلوا لشهرين).

سوق الأيربراش اللي ظهر أساسًا في الأربعينات في أمريكا، مش كبير في مصر خاصة وأن إدارة المرور مش بـ ترخص عربيات مرسوم عليها بأكثر من لونين وده طبعًا بـ يحد من إبداع الرسامين.

من بين الرسامين: مهاب التلاوي (31 سنة) اللي احترف الأيربراش جنب شغله الأساسي الروتيني في أحد البنوك وشاف الفن ده وسيلة يظهر فيها إبداعه وابتكاره بالأقلام ومسدسات الطلاء في وقت فراغه.

مهاب بدأ رسم الأيربراش من 5 سنين كهاوي على العربيات والموتوسيكلات وحتى اللاب توب ورسم الجرافيتي كمان قبل ما يطور مهاراته بشكل احترافي عن طريق كورسات فن الأيربراش ويُعتمَد رسميًا من "هارلي ديفيدسون" علشان يرسم على موتوسيكلاتهم.

يقول مهاب: "الموتوسيكل بـ يبقى لطلعات معينة مش وسيلة مواصلات، لكن بـ يتعمل "فور فان" (للترفيه) زي ركوب الخيل مثلاً وهو عالم ثاني بـ يأخذ صاحبه لبعيد، لدرجة ممكن تنسيه حاجات كثيرة مهمة في حياته".

مهاب بـ يشتغل مع هارلي ديفيدسون (في الزمالك) و Bedawy Car Tuning (جروبهم على الفيسبوك) ولو حابب تجرب ترسم على الموتوسيكل بتاعك اتصل بمهاب على: 0107448414

مزيد من الصور
  • الأيربراش: شخصيتك من موتوسيكلك
  • الأيربراش: شخصيتك من موتوسيكلك
  • الأيربراش: شخصيتك من موتوسيكلك
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
حنان سليمان
حرر بواسطة:
حنان سليمان
تاريخ النشر:
15/08/2011