عيد الأم: دليل كايرو 360 لأماكن الخروج والهدايا لست الكل - الحياة في كايرو Feature - كايرو 360
 







عيد الأم: دليل كايرو 360 لأماكن الخروج والهدايا لست الكل
عيد الأم: دليل كايرو 360 لأماكن الخروج والهدايا لست الكل
اصدرت في: 19/03/2012

على الرغم من أن الاحتفال بعيد الأم في آخر شهر مارس وتحديدًا يوم 21 إلا أننا كلنا بـ نشعر أن مصر كلها بـ تحتفل في الشهر كله بالأم وتضحياتها وإنجازاتها. أماكن كثيرة احتفلت بها وعملت مهرجانات وكرنفالات مخصوص لها زي أول كرنفال أقيم في مول العرب كان فيه مزج للاحتفال بالتسوق لأفراد العائلة لمدة يومين في أوائل مارس.

زي ما كايرو 360 قالت قبل كده وهـ تفضل تقول.. عيد الأم مش يوم واحد بس في السنة، تكريمها واجب كل يوم وتقديرها لا يمكن يحدد بـ يوم واحد فقط، ولكل الأمهات لكم منا كل التقدير والاعتزاز، علشان كده بـ نقدم لكل اللي بـ يقدر والدته دليل لأماكن بـ تقدم عروض لست الكل وأماكن ممكن تجيب منها هدايا..

مجوهرات وإكسسوارات عزة فهمي:

مافيش مناسبة تمر علينا إلا ولازم نعدي على الموقع بتاعهم أو جروب الفيسبوك علشان نعرف إيه الكولكشن الجديدة اللي نزلوها بمناسبة الحدث ده، والمرة دي فريق عزة فهمي ما اكتفاش بأنه ينزل مجموعة جديدة لإكسسوارات عيد الأم لأ ده كمان عملوا "حملة شكر" أو "Thank You Campaign" حلوة جدًا هـ تلاقوها على جروب الفيسبوك وعلى اليوتيوب. كمان عاملين موقع اسمه Azza Fahmy inspiration boxكاتب عليه كذا شخص رسالة لوالدته بـ يتكلم عنها في كام سطر وبـ يوضح هو ليه بـ يقول شكرًا لمامته.

مطعم آشاز وتشوب تشوب:

دلعوا مامتكم بأكلات آسيوية من آشاز وتشوب تشوب، وفيه كمان فرصة للفوز بالعديد من الهدايا القيمة منها تذكرة طيران لفردين للهند أو الصين. السحب هـ يكون في المطعم الساعة 10 مساءً يوم عيد الأم. لو عاوزين تعرفوا تفاصيل جديدة زوروا جروبهم على الفيسبوك.

فندق كمبنسكي النيل:

عاوز تختار حاجة مختلفة لمامتك في عيد الأم "كمبنسكي ذا سبا" الخاص بالفندق بـ يقدم دعوة لكل الأمهات لقضاء وقت ممتع وخاص في النادي الصحي للتخلص من التوتر وللاسترخاء، بـ تبدأ الجلسة بحمام مرطب من الورد للقدمين، ومساج مهدئ باستخدام الزيوت العطرية يليه تنظيف لبشرة الوجه. الزيوت العشبية والموسيقى الهادئة وأصوات المياه الجارية أكيد هـ يخلوا التجربة دي استثنائية ممكن تستمتعي بها مع مامتك وهـ يقدموا لكم كمان مشروبات منعشة وأنتم سوا جنب حمام السباحة.

كمان لاونج الشوكولاتة في كمبنسكي محضر علب هدايا فيها أنواع شوكولاتة مختلفة مختارة منها ماركة Amadei Pralines وفيه كمان تشكيلة من تورتات عيد الأم وحجزها لازم يكون قبلها بـ 24 ساعة.

فيرمونت هليوبوليس & تاورز:

تجربة وهدية مختلفة تمامًا من فيرمونت هليوبوليس & تاورز عبارة عن درس تعليم طبخ مع الشيف Li Qun Xu اللي هـ يقدم أطباق آسيوية مختلفة هـ يقول للأمهات على سر تقديمها وتحضيرها، في نهاية اليوم هـ يروحوا مطعم Noble House restaurant يتعشوا هناك الأكل اللي قاموا بطبخه. الأمهات كمان هـ يحصلوا على غذاء/ عشاء مجاني بمصاحبة 3 أشخاص أو أكثر في أي من مطاعم الفندق.

سنتر بوينت:

مول سنتر بوينت هـ يعمل احتفالات ومفاجآت في فروعه في معادي سيتي سنتر وإسكندرية سيتي سنتر، هـ تلاقى عروض خاصة وتخفيضات ومسابقات وهدايا وعروض أزياء ومفاجآت ثانية كثير من محلات سبلاش، وبيبي شوب، ولايف ستايل وشومارت.. وفيه حفلة كبيرة يوم الأربعاء 21 مارس ده غير العروض المستمرة طول الأسبوع. تابعوا الجروب بتاعهم على الفيسبوك.

مطعم زوون:

مطعم «زوون - Zone» اللي في شارع النيل في الجيزة عامل خصم 50% للسيدات بصفة عامة مش للأمهات فقط بداية من يوم الأحد 18 مارس لحد 22 من نفس الشهر. والعرض ده متاح فقط في الفرع بتاع Ruby Tuesday Nile Boat. لو عاوز تعرف معلومات أكثر عن العرض كلمهم على: 01000032732- 01008000807 أو زور جروبهم على الفيسبوك. واسأل كمان على منطقة الجنينة اللي افتتحوها من وقت قريب.

سلسلة محلات Fifth Avenue:

لو مامتك لها في الماركات العالمية من المجوهرات والإكسسوارات الشخصية والمنزلية عليك بـ Fifth Avenue اللي عاملين خصم على تشكيلة معينة عندهم في محلاتهم في فروع فيرست مول، وفيرست ريزدنس، الجيزة، وديزاينوبليس.

محل Fifth Avenue يعتبر وكيل لشركات وماركات عالمية كثيرة زي:Versace, Robbe & Berking, Zanetto, Eichholtz, Greggio, Richard Ginori, Le Perle, Royal Zilverstad, Porcellana Valentina, Roberto Cavalli, Cacharel, Dibbern .

عبايات r.squared:

لو مامتك بـ تحب العبايات وضيف عليها أن شكلها شيك وعلى الموضة وصناعة مصرية 100% يبقى روح محل r.squared الموجود في شارعي عبد المنعم رياض في المهندسين ومصطفى النحاس فى مدينة نصر. ممكن تشوف تشكيلة وتصميمات العبايات من جروبهم على الفيسبوك.

طبعًا وقت الاحتفال الموضوع بـ يستلزم تارت أو كيك أو حلوى، مركب "بلو نايل" مخصصين تارت مجاني ومفاجآت كثيرة وهدايا لو خرجت وأكلت مع الأسرة هناك، كمان محل "دينا كانتينا" عامل كب كيك عليه تصميمات وعبارات لعيد الأم هـ تلاقوها في فروع المحل وحاطين منها على الفيسبوك. وكمان "نولا كب كيك" عاملين ديكور حلو بمناسبة عيد الأم في المحل ولهم تصميمات جديدة للمناسبة دي ممكن تشوفوها برضه على جروبهم على الفيسبوك.

 

من فريق كايرو 360 لكل أم.. "كل عام وأنتي عظيمة".

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
إنجي البطراوي
حرر بواسطة:
إنجي البطراوي
تاريخ النشر:
19/03/2012
مدير تحرير موقع كايرو 360 العربي. نشيطة جدًا بـ تحب الشغل، وبـ تهتم بالتفاصيل، دائمًا بـ تضيف روح إيجابية للفريق ومش بـ تفوت فرصة أنها تضحك اللى حولها! بـ تصرف نصف مرتبها على عصير البرتقال والآيس كريم!