دليل أحداث نهاية الأسبوع: حفلات إفتكاسات وأزرق سماوي والدور الأول ومعارض فنية ومحاضرات - الحياة في كايرو Feature - كايرو 360
 







دليل أحداث نهاية الأسبوع: حفلات إفتكاسات وأزرق سماوي والدور الأول ومعارض فنية ومحاضرات
دليل أحداث نهاية الأسبوع: حفلات إفتكاسات وأزرق سماوي والدور الأول ومعارض فنية ومحاضرات
اصدرت في: 19/04/2012

مساء الخير قراءنا الأعزاء.. أخبار الجو إيه النهاردة؟ يساعد على الخروج ولا هـ نقعد في البيت ونقفل شبابيكنا الألوميتال ونشغل التكييفات طمعًا في كام شهيق من غير رائحة تراب، بس من تجربتنا إمبارح عرفنا أن الجو بـ يتحسن بنسبة كبيرة بالليل، والرؤية على الطرق كمان، علشان كده كل الخروجات والأفكار اللي هـ نقولها بخصوص الويك إند ده هـ تبقى بالليل، تحسبًا لاستمرار العاصفة الرملية كام يوم كمان.

ندخل في الأحداث المهمة على طول، الليلة دي فيه أكثر من 5 حفلات موسيقية مميزة لأنواع مختلفة من الموسيقى وبكل الأسعار ولجميع الأذواق، أكثر حفلة عجبانا إحنا في كايرو 360 وأكيد بـ نرشحها لكم هي حفلة فريق إفتكاسات في مركز صوفي الثقافي في الزمالك، وده لأننا بـ نحب موسيقى الفريق ده جدًا وبـ نعتبرهم من أكثر فرق الفيوجن جاز المصرية ابتكارًا وموهبة، والمرة دي كمان حفل خاص جدًا بمناسبة مرور 10 سنين على تأسيس الفريق.

عالم ثاني خالص في حفل فرقة نوبة نور للموسيقى النوبية والأغاني التراثية من جنوب مصر في قاعة الطنبورة في وسط البلد، تذكرة الدخول بـ 20 جنيه.

هاوس وتكنو وديسكو في ملوك بار في الدقي، 3 ليالي هايبر جدًا مع دي جي فابريك أيام الخميس والجمعة والسبت، والحجز ضروري قبل ما تروح.

حفل أغاني عالمية خفيفة في دار الأوبرا على المسرح المكشوف الليلة دي هـ يبدأ الساعة 8 مساءً، هو حفل فريق سويت ساوند بقيادة منير نصر الدين.

في كايرو جاز كلوب النهاردة الساعة 10 مساءً حفل عازف الدرامز المصري العالمي يحيى خليل وفرقته، اتصل قبل ما تروح خاصة في الويك إند.

ما ينفعش ويك إند من غير شوية روك، حفل مخصص لأغاني الروك باللغة العربية الليلة دي في ساقية الصاوي في قاعة النهر، يحيى الحفل عدد من أشهر الفرق اللي بـ تلعب روك عربي زي (أزرق سماوي) الفريق السكندري الحاصل على المركز الأول في مهرجان الساقية الأول لموسيقى الروك بالتعاون مع أندروميدا، وفرقة (كيان) وفرقة (سيركل). الحفل هـ يبدأ الساعة 7 مساءً في قاعة النهر.

على المسرح الكبير بدار الأوبرا المصرية حفل لأوركسترا أستراليا السيمفوني مع أوركسترا أوبرا القاهرة، الحفل بعنوان (جالا كونسير) والدخول بالملابس الرسمية.

يوم الجمعة في مركز صوفي في الزمالك فيه حفل أناشيد صوفية إسلامية ومافيش رسوم للدخول لكن فيه حد أدنى للطلبات وأنت في المكان، اتصل وأعرف تفاصيل أكثر.

حفل ثاني لفرقة ليل وعين في أفتر 8 يوم الجمعة، الفرقة معروفة بمزج الأغاني القديمة بالحديثة وتقديمها بطريقتهم الخاصة، حد أدنى للطلبات 100 جنيه.

يوم السبت فيه حفل موسيقي واحد مهم وهو حفل فرقة الدور الأول اللي بـ تقدم موسيقى فقط، جاز بطابع شرقي ومزج بين ثقافات مختلفة زي اللاتيني والتركي، الفرقة لها ألبوم واحد في الأسواق وأحيت حفلات كثير داخل وخارج مصر، الحفل في كايرو جاز كلوب وهـ يبدأ الساعة 10 مساءً. احجز مكانك.

من الأحداث الثقافية المهمة في الأجازة دي مهرجان الساقية للمونودراما اللي تم افتتاحه يوم الأربعاء وفعالياته مستمرة أيام الخميس والجمعة وفيه محاضرة مهمة في المركز الثقافي الهولندي للدكتور أيدون بروك اللي هـ يتكلم عن مشروعات لترميم المومياوات.

وفيه معرض فني مميز انطلق في أول أبريل وقرب ينتهي، هو معرض الفنان أحمد صبري بعنوان (حقيقة مقتل مهند) في جاليري المشربية في وسط البلد. وفيه النهاردة كمان حفل مركز تنمية المواهب في المسرح الصغير في دار الأوبرا، وهنا طبعًا الدخول على مسئوليتك.

استعرضنا معاكم شوية حاجات ممكن تتعمل في الأجازة اللي جاءت بسرعة المرة دي علشان كانت قريبة من أجازة شم النسيم، نتمنى لكم وقت ظريف مع كل حاجة ذكرناها في المقال ده، ولو فيه أماكن نسينا نكتب عنها يبقى هـ تلاقيها على أجندة الموقع.. ألف سلامة.. 

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
19/04/2012
-