دليل أحداث نهاية الأسبوع: حفلات حمزة نمرة وعمر خيرت ومهرجانات أطفال ومعارض فنية - الحياة في كايرو Feature - كايرو 360
 







دليل أحداث نهاية الأسبوع: حفلات حمزة نمرة وعمر خيرت ومهرجانات أطفال ومعارض فنية
دليل أحداث نهاية الأسبوع: حفلات حمزة نمرة وعمر خيرت ومهرجانات أطفال ومعارض فنية
اصدرت في: 24/05/2012

سلام عليكم! أخبار الانتخابات إيه؟ كله راح انتخب ولا لسه؟ فاضل كام ساعة وينتهي الوقت المخصص للتصويت، وأكيد مش هـ نفكرك قد إيه صوتك مهم وهـ يفرق وأنك لازم تنزل حالاً بعد ما تقرأ المقال ده وتروح لجنتك الانتخابية. لكن الأهم بالنسبة لنا أنك بعد ما تعمل كده تلاقي حاجة تعملها النهاردة وبكرة وبعده، حاجة تريح بها أعصابك وتخرج من موود السياسة وتأخذ بها فاصل قبل إعلان نتائج التصويت واستعدادك لجولة الإعادة. هـ نقول لك على كام حفلة ومعرض ومهرجان ممكن يساعدوك في عملية الاستجمام دي.

أهم حفل الليلة دي هـ يبقى في جامعة مصر للعلوم والتكنولوجيا MUST، وفي دار الأوبرا الخاصة بالجامعة بمدينة 6 أكتوبر. حفل الفنان حمزة نمرة اللي هـ يبدأ الساعة 7 مساءً وسعر التذكرة 75 جنيه، واتصل قبل ما تروح علشان تتأكد أن فيه مكان.

النهاردة في الساقية فيه حفل لواحد من أفضل فرق موسيقى الروك اللي ظهرت مؤخرًا وهو فريق The Jokers  اللي بـ يقدم موسيقى الروك آند رول والـ Psychedelic Rock والفريق حصل قبل كده على المركز الأول في مهرجان الساقية لموسيقى الروك بالتعاون مع فرقة أندروميدا، الحفلة هـ تبقى جامدة وهـ تعجبكم، هـ تبدأ الساعة 8 مساءً في قاعة النهر.

كثير منا مش عارف بالضبط إيه الموسيقى المعاصرة، هـ يبقى عنده فرصة من خلال مهرجان الموسيقى المعاصرة اللي فعالياته شغالة دلوقتي على عدد من المسارح والمراكز الثقافية واللي بـ ترعاه الجمعية المصرية الأوربية للموسيقى المعاصرة بقيادة شريف الرزاز. هـ يكون فيه حفل الليلة دي على مسرح قصر الأمير طاز هـ يقدمه الفنان الفرنسي تيري بيكو بمصاحبة فريق وتريات الموسيقى المعاصرة المصري.

مطربة الـﭼاز الأهم الموجودة في مصر ميشيل راوندز هـ تبقى موجودة النهاردة وبكرة في فندق كمبنسكي على كورنيش النيل في جاردن سيتي. هـ تقدم مجموعة من أجمل الأغاني العالمية.

فسحة حلوة لأطفالك في ساقية الصاوي وممكن تدخلهم مسرح العرائس ضمن فعاليات مهرجان (ستو وجدو) اللي بدأ من يومين وآخر يوم له النهاردة. وسعر التذكرة 15 جنيه.

ريلاكس على الآخر واستمتع بريسيتال بيانو على المسرح الصغير بدار الأوبرا، يحيي الحفل العازف محمد الشوربجي، والحفل هـ يبدأ الساعة 8 بالضبط.

يوم الجمعة في فندق فيرمونت نايل سيتي هـ يبقى فيه مهرجان أكلات جديدة على روف الفندق من أول اليوم لآخره. عروض فنية وموسيقى ومكان للعب الأطفال. هـ تحتاج تحجز قبل ما تروح. قيمة الدخول للفرد 250 جنيه.

في مركز صوفي الثقافي بالزمالك هـ يتم عرض فيلم بعنوان (حالة حب) وهو من إنتاج هونج كونج وتدور أحداثه في سنة 1960 والفيلم مترجم بالإنجليزية والحضور مجاني.

تجميع عدد كبير من أفضل الأعمال الفنية واللوحات في مسار آرت جاليري في معرض بعنوان (جاليري كولكشن) هـ يكون فيه أفضل الأعمال اللي تم عرضها في مسار في آخر 4 سنين ومنها أعمال للفنانين جورج بهجوري وطه حسين وليلى عزت.

في مركز شبابيك الثقافي الموجود في المقطم هـ يبقى فيه حفل يوم الجمعة لفرقة الجميزة اللي بـ تقدم أغاني مصرية من كلمات الشاعر ناصر النوبي مؤسس الفريق. الحفل هـ يبدأ الساعة 7 مساءً.

ويوم ثاني مع الموسيقى المعاصرة وحفل لفريق Aliquid لموسيقى الجاز في قاعة الحكمة بساقية الصاوي ضمن فعاليات مهرجان الموسيقى المعاصرة اللي قولنا عليه.

وعلى المسرح الكبير لدار الأوبرا يوم الجمعة الساعة 8 مساءً هـ يبقى حفل الموسيقار الكبير عمر خيرت. عمر هـ يكون صوليست على البيانو بمصاحبة أوركسترا أوبرا القاهرة. احجز تذكرتك بسرعة.

يوم السبت وزي السبت اللي فات هـ يبقى فيه حفل لفرقة نغم مصري لكن المرة دي في ساقية الصاوي في قاعة الحكمة. الفرقة لها معجبين من أكثر من 10 سنين وإحنا متأكدين أن كل مرة بـ يطلعوا على المسرح لازم يعجبوا الناس. التذكرة بـ 25 جنيه.

ما تضيعش يومين الأجازة بقى في قلق وتوتر بخصوص الانتخابات ومين متقدم ومين ما أخذش ولا صوت. فك كده وجرب حاجة من الحاجات اللي قولنا لك عليها ولو مش عاجبك حاجة منهم ممكن تدخل على أجندة الموقع وهـ تلاقي أفكار وأحداث كثيرة تناسب كل الاهتمامات. نشوفكم على خير.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
24/05/2012
-