دليل أحداث نهاية الأسبوع: فنون تشكيلية وندوات وأوركسترا السيمفوني وستاند أب كوميدي - الحياة في كايرو Feature - كايرو 360
 







دليل أحداث نهاية الأسبوع: فنون تشكيلية وندوات وأوركسترا السيمفوني وستاند أب كوميدي
دليل أحداث نهاية الأسبوع: فنون تشكيلية وندوات وأوركسترا السيمفوني وستاند أب كوميدي
اصدرت في: 31/05/2012

تحياتنا لكم جميعًا ويارب تكونوا في أحسن صحة وحال، الأسبوع ده جري بسرعة ولا إحنا بـ يتهيأ لنا! المهم أن النهاردة الخميس وبكرة وبعده أجازة عندنا على الأقل، بس عمر الأجازة بالنسبة لنا ما تبقى مجرد وقت بـ نقضيه في البيت، وكل همنا نشرككم معانا في جولاتنا الثقافية والفنية في كل حتة في كايرو. وقاعدتنا الشهيرة هي "استفيد بكل دقيقة النهاردة علشان ما حدش عارف بكرة فيه إيه" لأن زي ما إحنا شايفين مصر كل يوم بحال واحتمالات أن أي عرض أو حفلة أو مهرجان يتلغي أو يتأجل لأجل غير مسمى واردة جدًا في أي وقت.

هـ نركز الأسبوع ده على كام حدث ثقافي بعيد عن الموسيقى والحفلات. أولهم معرض Summer Collective وهو معرض فنون تشكيلية لأعمال مجمعة ومختارة من الفن المعاصر لفنانين مختلفين زي نيرمين همام وعفت ناجي وكاثرين باخوم. المعرض في جاليري سفر خان بالزمالك.

وفي مركز الهناجر للفنون والثقافة في دار الأوبرا هـ يكون فيه معرض مهم لأعمال الأطفال مرضى التوحد. المعرض نتاج عمل 6 شهور مع الأطفال من ذوي الاحتياجات الخاصة والتجربة كلها كانت مفيدة جدًا، وإحنا بـ ندعوكم لاكتشاف عالم غريب متمثل في رسوم أطفال مرضى التوحد. المعرض بعنوان "الربيع في دورة الحياة" ومستمر لحد يوم السبت 2 يونيو، والدخول مجاني طبعًا.

معرض ثاني بجاليري المشربية بعنوان "القطع المفقودة" لكريم بكري، وهو معرض صور فوتوغرافية وتكوينات من الصناديق والعلب الفارغة بأحجام مختلفة. الفكرة جيدة ومن خلالها بـ ترصد تكوينات الشعب المصري نفسه، وده اللي حاول يوصله الفنان صاحب المعرض. المعرض بدأ من 3 أيام ومستمر لحد 18 يونيو.

ندوة للكاتب بلال فضل النهاردة في مركز شبابيك الثقافي اللي في المقطم الساعة 7 مساءً، الدعوة عامة لكن روح بدري علشان تلحق مكان.

نروح للمزيكا بقى. عندنا الليلة دي حفلة جامدة لفرقة وسط البلد في كايرو جاز كلوب في العجوزة ومعاهم في نفس البرنامج المغنية نهى طه اللي بـ تقدم أغاني عالمية معروفة. الحجز ضروري زي ما تعودنا.

في أوبيم Opium في الزمالك كل خميس ممكن تسهر مع تراكات دي جي فيدو ودي جي هوك. المكان بـ يبقى فيه حد أدنى للطلبات 150 جنيه ولازم تتصل تحجز.

فيه حفل ستاند أب كوميدي الليلة دي في مسرح روابط في وسط البلد، هـ يبقى باللغتين العربية والإنجليزية، الحفل بعنوان Laugh It Off وهـ يبدأ الساعة 7 مساءً وسعر التذكرة 30 جنيه.

هدئ أعصابك مع ريسيتال لآلة الفيولينة (الكمان) في قاعة الحكمة في ساقية الصاوي الليلة دي مع العازفة ياسمين سامي بمصاحبة البيانو، الحفل هـ يبدأ الساعة 8 مساءً وسعر التذكرة 15 جنيه.

وعلى المسرح الصغير بدار الأوبرا فيه حفل لأوركسترا أستراليا السيمفوني (جالا كونسير) بمصاحبة أوركسترا القاهرة السيمفوني. الحفل هـ يبقى قوي جدًا وأكيد هـ يعجب كل هواة الموسيقى الكلاسيكية. الدخول الساعة 8 مساءً.

وبكرة على نفس المسرح في دار الأوبرا هـ يكون فيه حفل لعازف الدرامز المصري العالمي يحيى خليل وفرقته، وهـ يقدم أعماله الخاصة وعدد من المقطوعات العالمية.

ومسك الختام للأجازة الأسبوع ده حفل يوم السبت على المسرح الكبير بدار الأوبرا. أوركسترا القاهرة السيمفوني هـ يقدموا أعمال أشهر المؤلفين العالميين. الدخول بالملابس الرسمية، والحفل هـ يبدأ 8 مساءً.

فيه بعض الأماكن القريبة من وسط البلد اللي أجلت أو ألغت عروض كانت هـ تتعمل اليومين دول بسبب "الظروف الراهنة للبلاد" وإحنا بصراحة مش شايفين مبرر لإلغاء أي عرض إلا لو كانت ظروف قهرية غير عادية وده مش حاصل دلوقتي. عمومًا تابعوا أجندة كايرو360 وأعرفوا إيه اللي اتلغى وإيه اللي لسه موجود، وشوفوا الحاجات الثانية اللي إحنا مش كاتبين عنها هنا وجايز تعجبكم. أجازة سعيدة.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
31/05/2012
-