دليل أحداث نهاية الأسبوع: أزرق سماوي وبساطة وسيد الشاعر ومسار إجباري - الحياة في كايرو Feature - كايرو 360
 







دليل أحداث نهاية الأسبوع: أزرق سماوي وبساطة وسيد الشاعر ومسار إجباري
دليل أحداث نهاية الأسبوع: أزرق سماوي وبساطة وسيد الشاعر ومسار إجباري
اصدرت في: 14/06/2012

نهاركم سعيد.. الأجازة الأسبوع ده هـ تبقى 3 أيام عند ناس كثير علشان جولة الإعادة في انتخابات الرئاسة أيام السبت والأحد، ولو هـ تعمل كده الصبح بدري هـ يبقى عندك باقي اليوم فاضي تقدر تضيفه ليومين الأجازة الثابتين وتستمتع بـ Long Weekend بس من غير سفر خارج كايرو، يعني أنت لازم تبقى موجود هنا معانا طول الـ 3 أيام ده لو افترضنا أنك ملتزم بالمشاركة في جولة الإعادة، ودي فرصتنا أننا نقول لك على الكام حاجة اللي إحنا شايفينهم حلوين وممكن تعملهم في أيام الأجازة بعد الظهر.

قبل ما نقول لكم على الأحداث الثقافية عاوزين نرشح لكم مكان جديد اكتشفناه في مصر الجديدة اسمه «بيتزاريللي» بـ يقدم أكلات إيطالية (واضح من اسمه). وبـ نفكركم أن فيه فرع جديد من «سبكترا» فتح في سيتي ستارز مول في الدور الأخير، وتجربتنا فيه كانت رائعة، فبـ نرشحه لكم برضه، بس خلي بالك الأخير ده مش بـ يعرض ماتشات يورو 2012 لو كنت متابعها. وبالمناسبة دي هـ نفكركم كمان بأن اليورو المرة دي جامد قوي، والماتشات بـ تحلى مع اللمة، أي قهوة أو كافيه هـ تؤدي الغرض، المهم تتفرج وتشجع.

النهاردة في مركز صوفي في الزمالك هـ يكون فيه حفل عزف على العود للفنان حسن حامد، الدخول مجاني لكن فيه حد أدنى للطلبات داخل المكان، لو ما تعرفش مركز صوفي هي أقرب لمكتبة ومركز ثقافي صغير بـ يقدم عروض فنية وثقافية كل أجازة نهاية أسبوع، وممكن وأنت هناك تطلب من البوفيه مشروبات ومأكولات خفيفة.

في كايرو جاز كلوب بالليل هـ يكون فيه حفل لفرقة جلاس أنيون Glass Onion اللي بـ تقدم أغاني البيتلز، الفرقة مكونة من 4 أفراد هم هاني مصطفى وكريم الغليض وماجد نجاتي وحنكش. الفريق ممتاز، كأنك سامع البيتلز بالضبط! لازم تحجز قبل ما تروح.

فرقة بساطة حققت نجاح غير عادي في الكام سنة الأخيرة وأصبح لهم قاعدة جماهيرية كبيرة، أغانيهم من القلب وألحانهم مميزة وأداؤهم على المسرح ظريف. هـ يكون لهم حفلة النهاردة على المسرح المكشوف بدار الأوبرا المصرية الساعة 8 مساءً.

الفنان سيد الشاعر المشهور بتقديم الأغاني الشعبية والرقصات الفلكلورية من صعيد مصر والعزف على آلة الربابة هـ يقدم حفل النهاردة في قاعة الحكمة في ساقية الصاوي. الحفل هـ يبدأ الساعة 8 مساءً وسعر التذكرة 20 جنيه و15 جنيه لأعضاء الساقية.

يوم الجمعة فيه مهرجان للموسيقى الإلكترونية في ساحة روابط في وسط البلد، المهرجان بـ يشارك فيه فنانين من تونس ومن لبنان والدخول مجاني. العرض هـ يبدأ الساعة 6:30 مساءً.

فنانة من أورجواي هـ تقدم أغاني باللغة الأسبانية في المركز الثقافي الأسباني (ثربانتس) في الدقي، الفنانة هي ديانا فيريرا والحفل هـ يبدأ الساعة 8 مساءً والدخول مجاني.

فريق أزرق سماوي السكندري هـ يقدم حفل في ساقية الصاوي يوم الجمعة الساعة 8 مساءً. أزرق سماوي بـ يقدموا أغانيهم باللغة العربية العامية على موسيقى الـ Progressive Rock وهم متأثرين بفرق زي Porcupine Tree وCamel لكن لهم مذاق خاص وستايل مميز مش هـ تنساه بسهولة. مغني الفريق وعازف الجيتار محمد عبد القادر واحد من أفضل من يقدم موسيقى الروك في مصر. استمتعوا.

فريق ثاني من الإسكندرية يوم الجمعة على مسرح الجنينة في حديقة الأزهر هو فريق مسار إجباري، الفرقة أصبحت غنية عن التعريف بعد ظهورها في فيلم ميكروفون وتمثيلها لمصر في عدد من المهرجانات والحفلات في أوربا والدول العربية. الحفل هـ يبدأ الساعة 8 مساءً والتذكرة بـ 20 جنيه بخلاف قيمة دخول حديقة الأزهر نفسها.

يوم السبت في قاعة النهر بساقية الصاوي فيه حفل لفريق بروفايل Profile Band اللي بـ يقدم لأول مرة مجموعة من أغانيه الأصلية المكتوبة باللغة الإنجليزية وعدد من أشهر أغاني فرق الـ Indie Rock والـ Pop العالمية زي Travis وAdele وBarenaked Ladies. "بروفايل" حصلوا على المركز الثاني في مهرجان الساقية لموسيقى الروك سنة 2010 ووصلوا للمرحلة النهائية في مسابقة Stella De Mare's Got Talent في 2011. الحفل هـ يبدأ الساعة 8 مساءً وسعر التذكرة 20 جنيه.

حفل ثاني يوم السبت لأوركسترا القاهرة السيمفوني على المسرح الكبير في دار الأوبرا، ويتضمن برنامج الحفل عزف لأشهر المقطوعات الكلاسيكية بقيادة المايسترو أحمد الصعيدي. من الأعمال اللي هـ تتقدم سيمفونية شهرزاد لكورساكوف والسيمفونية الخامسة لبيتهوفن. الدخول بالملابس الرسمية.

وفي قاعة الكلمة بالساقية هـ يتم عرض فيلم وثائقي من إنتاج قناة الجزيرة بعنوان الصامتون يتكلمون والعرض هـ يبدأ الساعة 7 مساءً والدخول مجاني.

فيه معرض لأعمال النحت مقام حاليًا في قاعة الكلمة بساقية الصاوي تحت عنوان أساطيل مصر القديمة للفنان أحمد فاروق عبد الستار، المعرض مستمر لحد يوم 19 يونيو القادم.

تابعوا باقي الأحداث الثقافية والمعارض الفنية في القاهرة من خلال أجندة موقعنا ونشوفكم على خير بعد الانتخابات الرئاسية.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
14/06/2012
-