دليل أحداث نهاية الأسبوع: حفل وسط البلد وعمر خيرت وياسر المناوهلي ومعارض فنية - الحياة في كايرو Feature - كايرو 360
 







دليل أحداث نهاية الأسبوع: حفل وسط البلد وعمر خيرت وياسر المناوهلي ومعارض فنية
دليل أحداث نهاية الأسبوع: حفل وسط البلد وعمر خيرت وياسر المناوهلي ومعارض فنية
اصدرت في: 28/06/2012

مصر تلتقط أنفاسها، تقريبًا ده اول أسبوع من شهور طويلة ممكن الناس تمارس فيه حياتها الطبيعية من غير مايكون الشغل الشاغل لهم هو السياسة. صحيح أحوال البلد لسة ماتسرش بس خطوة انتخاب رئيس للجمهورية بـ تقلل الضغط على أعصاب المواطنين، والانتعاش الملحوظ على آداء البورصة اليومين اللي فاتوا بث جرعة تفاؤل على السوق المصري بشكل عام، وخلت الحركة في الشوارع أكثر والمحلات بـ تشتغل بنفس وثقة، وإن كان لسة تفاؤل حذر وماوصلش للشكل المطلوب.

كنا قلقانين جدًا من يوم إعلان نتيجة الانتخابات الرئاسية لكن ربنا سلم وعدى على خير، ناس فرحانة وبـ تحتفل وناس أصابها الاكتئاب وناس تانية ولا على بالها، وكل واحد من دول أكيد محتاج يمارس نشاط ما. الفرحان اللي بـ يحتفل والحزين اللي عايز حاجة تخرجه من الموود اللي هو فيه، واللي مالوش فيها وده كدة كدة مقضيها خروج وتنطيط بمناسبة ومن غير مناسبة.

نبدأ بكام حفلة مهمة الليلة دي، أولهم حفل الفنان ياسر المناوهلي اللي بـ يقدم أغاني سياسية ساخرة بـ يلعب جيتار، ومعاه فرقة تاكسي، الحفل هـ يكون على مسرح الجنينة في حديقة الأزهر الساعة 8 مساءً.

ثاني حفل بعنوان (وطنيات) وفيه يتم تقديم عدد من كلاسكيات الأغاني الوطنية لعظماء الموسيقى والطرب زي عبد الوهاب ورياض السنباطي وبليغ حمدي ويقدم الحفل الفنان محسن فاروق وبـ يقوم بإخراجه كمان على مسرح الأمير بشتك الموجود في شارع المعز في منطقة الأزهر.

في قاعة النهر بساقية الصاوي هـ يكون فيه حفل أغاني روك عربي هـ تقدمه فرقة كيان وهـ يكون معاها ضيوف عازفين ومغنيين من فرق تانية بـ تعزف روك وموسيقى مصرية بديلة، الحفلة هـ تكون أشبه بمهرجان لأغاني الروك العربي ونفتكر أنها هـ تعجبكم.

مسرحيات..عندنا عرض مسرحي على مسرح ساحة روابط الفنية الليلة في تمام الساعة 8 مساءً، العرض بعنوان "بطل شعبي" وهـ تقدمه فرقة تفانين والعرض من إخراج محمد حسنين.

أفلام..فيه عرض في المركز الثقافي الإيطالي لفيلم بعنوان (Nessuno mi può giudicare) أو (لا أحد يستطيع محاسبتي) وهو فيلم اجتماعي ودراما وكوميديا ايطالية صميمة، الدخول مجاني في أي وقت طبعًا والعرض هـ يبدأ الساعة 6 مساءً.

الفنانة العالمية جوشوا جوود هـ تكون ضيفة ندوة في درب 17 18 في الفسطاط وهـ تتكلم عن المعرض الفني الخاص بها اللي هـ يبدأ يوم السبت 30 يونيو في نفس المكان. أعمال تشكيلية ونحت وأفكار جديدة وفن من منظور مختلف. نعتقد الندوة هـ تكون مفيدة لمن يهمه الأمر.

الجمعة فيه حفل للموسيقار عمر خيرت في دار الأوبرا على المسرح الكبير، ماينفعش ما نرشحش حفلة زي دي حتى لو بـ تتكرر كل يوم، الحفل بمصاحبة أوركسترا أوبرا القاهرة وعمر خيرت صوليست على البيانو. التذاكر على أبواب الأوبرا والحجز مطلوب.

وعلى مسرح الجنينة حفل فرقة وسط البلد اللي اتعودنا عليها في الموسم الصيفي لحفلات حديقة الأزهر، الحفل ده بـ يستناه عشاق الفرقة ورواد مسرح الجنينة من السنة للسنة، الحق احجز تذكرتك والحفل هـ يبدأ الساعة 8 مساءً وسعر التذكرة 20 جنيه.

فرقة أهل كايرو هـ تقدم حفل أغاني مصرية معاصرة في قاعة النهر بكرة الجمعة الساعة 8 مساءً. الفرقة تكونت سنة 2005 وكان اسمها (ستيب باي ستيب) لكن تغير شكل الفرقة واسمها دلوقتي، ومش مهم الاسم المهم أن أغانيهم ظريفة وهـ تعجبكم.

يوم السبت في قاعة الحكمة في ساقية الصاوي هـ يلعب مادو مجموعة من أغانيه على الجيتار الأكوستك، ومن المعروف أن مادو (بالمناسبة هو عضو مؤسس في فرقة تاكسي) بقاله فترة طويلة مانزلش حفلات لواحده في ساقية الصاوي رغم أن له عدد كبير من محبيه بـ ينتظروا حفلاته هناك. الحفل هـ يبدا الساعة 8 مساءً والتذكرة بـ 15 جنيه.

من المعارض الفنية اللي عجبتنا الأسبوع ده ولسة مستمر أسبوع كمان هو معرض بعنوان (سوبر ماركت) مقام حاليًا في مركز الجزيرة للفنون. المعرض مستخدم فيه أساليب جديدة للتعبير والعرض وهو بـ يتكلم عن الواقع الاستهلاكي اللي بـ نعيشه وعرض ده من خلال المحاكاة من خلال معرض فني. المعرض مستمر لحد يوم 4 يوليو اللي جاي.

فيه معارض كثير تانية لسة مستمرة الأسبوع ده، وعدد من الندوات المفيدة وفيه حفلات في مسارح دار الأوبرا المختلفة والمراكز الثقافية المنتشرة بطول كايرو وعرضها ممكن تعرفوا تفاصيلها من خلال أجندة الموقع. ونتمنى لكم أجازة سعيدة.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
28/06/2012
-