نونو جاي: أول "تطبيق" للحوامل باللغة العربية على التليفون - الحياة في كايرو Feature - كايرو 360
 







نونو جاي: أول "تطبيق" للحوامل باللغة العربية على التليفون
نونو جاي: أول "تطبيق" للحوامل باللغة العربية على التليفون
اصدرت في: 01/07/2012

كام واحدة حامل بـ تكون قلقانة في حملها وعاوزة تعرف تفاصيل أكثر عن الجنين اللي في بطنها والتغيرات اللي بـ تطرأ عليها؟ الشيماء توفيق -خريجة كلية تجارة- كانت واحدة من الستات المهتمات بمتابعة حملهن لحظة بلحظة وده اللي دفعها أنها تدور على Application على الموبايل علشان تقدر في أي وقت تدخل وتتأكد من أي معلومة هي عاوزاها، ومع البحث المستمر شيماء ما لاقتش غير تطبيقات باللغة الإنجليزية فقط فقامت بـ تحميلها والاستفادة منها.

الموقف ده دفع زوج الشيماء اسمه محمد نبيل واللي بـ يشتغل في تصميم المواقع أنه يعمل هو وشيماء تطبيق عن الحمل باللغة العربية أطلقوا عليه اسم «نونوجاي» واللي يعتبر حاليًا التطبيق الأول والعربي الوحيد للمرأة الحامل.

محمد بـ يكلمنا عن الفكرة وبـ يقول: اشتغلت مؤخرًا في الموبايل ديزاين وده خلاني قادر على تنفيذ تطبيق "نونو جاي!" والتنفيذ بدأ لما نوكيا أطلقت مسابقة "بالمصري" لتطبيقات الموبايل ولما عرفنا قدمنا فيها بفكرة "نونو جاي!" والمذهل أننا فزنا بالمركز الأول في التصنيف اللي كنا مقدمين فيه وهو "خدمة المجتمع" والجائزة كانت مبلغ مالي ساعدنا أننا نبدأ التنفيد على موبايلات نوكيا تحديدًا وجربنا نعرض التطبيق فـ لاقينا أنه تم تحميله في 3 شهور 3000 مرة بدون أي دعاية وده خلانا نعرف أن فيه ناس كثير ممكن يكونوا بـ يفكروا زينا، ومن هنا طورنا التطبيق علشان يبقى مناسب كمان لموبايلات الأندرويد والآي فون.

محتوى التطبيق تم تجميعه من أهم مواقع الحمل والأمومة المعترف بها عالميًا وطبيًا ومن أبرزها بيبي سنتر.كوم وده حرصًا أن كل المعلومات تكون سليمة ودقيقة.

ممكن تحمل التطبيق من على الموبايل مباشرة أو من اللينكات الموجودة على صفحة الفيس بوك الخاصة بالتطبيق "نونوجاي!" واللي فيها دلوقتي حوالي 5000 شخص مهتم بالحمل والأمومة أغلبهم حوامل بـ يحبوا يتواصلوا مباشرة مع فريق عمل المشروع ومع حوامل ثانيين.

بمجرد ما تحمل التطبيق هـ تلاقيه بـ يطلب منك تعمل registration وبمجرد إدخال آخر موعد للدورة الشهرية البرنامج بـ يحسب للأم المنتظرة هي في أي أسبوع بالضبط وبناء على ذلك بـ يقدر التطبيق يتفاعل مع المستخدمة.

التطبيق بـ يتضمن عدة أقسام زي "معرفة الأسبوع الحالي للحمل" وده بـ يبقى فيه معلومات عن تطور الجنين في الأسبوع ده وعن التغيرات اللي بـ تطرأ على الأم. وقسم "معلومات أسبوعية" وده فيه معلومات عامة للحمل عن كل ما يتعلق بالحمل والجنين بوجه عام. والجميل كمان قسم "بيانات الطبيب" وده قسم ممكن المستخدمة تسجل فيه كل حاجة عن دكتورها علشان تلاقيها بسرعة لما تحتاجها. هـ تلاقي كمان قسم لأسماء الأطفال وده عبارة عن قاعدة بيانات لحوالي 4000 اسم لأولاد وبنات.

وبما أن الستات بـ يشغلهم تطور وزنهم أثناء الحمل هـ تلاقي قسم بـ تدخلي فيه وزنك كل شهر والتطبيق بـ يطلع لك رسم بياني بمقدار زيادتك ومقارنته بالشهور اللي فاتت. أخيرًا هـ تلاقي القسم الخاص بالولادة وما بعدها وده فيه فيديو 3D قصير بـ يشرح عملية الولادة وبعض الموضوعات الأساسية اللي هـ تحتاجها المرأة بعد الولادة زي الرضاعة الطبيعية والصفراء.

التطبيق مجاني وفريق العمل مصمم أنه يفضل مجاني علشان يخدم كل السيدات الحوامل في مصر وهـ يحقق أرباحه لاحقًا عن طريق الإعلانات. عاوزين نقول في النهاية أنه وفقًا لمؤسس التطبيق تم تحميله لحد دلوقتي حوالي 40 ألف مرة من مختلف الموبايلات وجاري في المستقبل توفيره على البلاك بيري وكل الـJava phones زي سامسونج. ودي صفحة البرنامج على الفيسبوك.

مزيد من الصور
  • نونو جاي: أول
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
شيماء الجمال
حرر بواسطة:
شيماء الجمال
تاريخ النشر:
01/07/2012
بـ تقضي وقتها ما بين الكتابة والعيال والمطبخ وشراء طلبات البيت.. مهتمة بشكل خاص بالكتابة عن كل ما يخص الأم والطفل، بـ تحب الكب كيك زي ما بـ تحب أولادها بالضبط، بـ تعتبر الإنترنت هو الصديق الأوفى في الحياة.