دليل أحداث نهاية الأسبوع: حمزة نمرة وفيروز كراوية وصوت في الزحمة وستاند آب كوميدي - الحياة في كايرو Feature - كايرو 360
 







دليل أحداث نهاية الأسبوع: حمزة نمرة وفيروز كراوية وصوت في الزحمة وستاند آب كوميدي
دليل أحداث نهاية الأسبوع: حمزة نمرة وفيروز كراوية وصوت في الزحمة وستاند آب كوميدي
اصدرت في: 12/07/2012

سلام عليكم.. لسه كنا بـ نقول الأسبوع اللي فات أننا فرحانين أن أخيرًا عدى أسبوع من غير قلق وعدم راحة فيما يخص الأحداث السياسية اللي وراء بعضها، وجاء موضوع عودة البرلمان علشان تمتلئ صفحات الإنترنت بالجدل والشوارع بالمتظاهرين، ويرجع الواحد يفكر ألف مرة قبل ما يقرر ينزل يروح يشم هواء، يا إما علشان ذهنه مش صافي كفاية أو لأنه مش عارف طريقه هـ يبقى سالك ولا لأ وفيه مظاهرات وقطع طريق ولا لأ، بس بـ نفكركم أننا فضلنا على الحال ده طول السنة ونصف اللي فاتوا وتأقلمنا نوعًا ما على الأحداث وأصبحنا بـ نعرف نمشي أمورنا ونتعايش مع الأوضاع غير المستقرة المرتبطة بالحراك السياسي اللي حاصل في البلد، فياريت ما نكسلش ونحاول نعمل أي نشاط ثقافي أو اجتماعي نكسر به الملل والروتين الأسبوعي في الأجازة دي.

قبل ما نتكلم عن الحفلات الموسيقية اللي فيها وفرة الأسبوع ده هـ نتكلم عن مشروع أو معرض مميز موجود حاليًا في مركز "آرت اللوا" الثقافي الموجود في منطقة أرض اللواء بعنوان (لو كنت رئيس – لو كنت رئيسة) وفكرته بسيطة بـ تتمثل في تفاعل الزائرين مع بعض اللافتات والملصقات من خلال الكتابة عليها أو التعليق عليها. المعرض تم افتتاحه يوم الثلاثاء ومستمر لحد يوم 29 يوليو. ننصحكم بالزيارة.

بالنسبة للحفلات فيه حفلة الليلة دي في متحف الفن الحديث بدار الأوبرا وهو حفل أوركسترا العزف على الجيتار بقيادة عازف الجيتار الكلاسيك الأشهر الفنان عماد حمدي، وهـ تقدم الأوركسترا مقطوعات عالمية معروفة على آلة الجيتار فقط. التذاكر على الأبواب.

أهم حفلة الأسبوع ده هي حفلة الفنان حمزة نمرة على مسرح جامعة مصر للعلوم والتكنولوجيا MUST واللي من الصعب أنكم تلاقوا تذاكرها في نفس يوم الحفل، لكن ممكن تستفسروا إن كان لسه فيه أماكن ولا لأ عن طريق التليفون، التذكرة بـ 75 جنيه والحفل هـ يبدأ الساعة 7 مساءً.

شوية ضحك بقى في ساقية الصاوي في قاعة الحكمة الليلة دي وعرض ستاند أب كوميدي بالعربي هـ يقدمه مجموعة من الكوميديانات الشباب زي علي قنديل وبيتر ظريف وأمير عزت، الحفل هـ يبدأ الساعة 8 مساءً والتذاكر من على أبواب الساقية، 20 جنيه للأعضاء و25 جنيه لغير الأعضاء.

ضحك برضه في أفتر 8 النهاردة مع فرقة سلالم اللي أكيد بقت غنية عن التعريف بقى، وبـ تقدم أغاني ساخرة مشهورة ومن تأليفهم. الدخول للمكان بمبلغ لحد أدنى من الطلبات هو 100 جنيه، وممكن تحجز قبل ما تروح.

يوم الجمعة ميعاد عشاق فريق Pink Floyd وحفل فريق أندروميدا المتخصص في موسيقى الفريق الإنجليزي الأسطوري، وبـ يقدمها في مصر من أكثر من 20 سنة بمنتهى الإتقان. الحفل هـ يبدأ الساعة 8:30 مساءً في قاعة الحكمة في ساقية الصاوي والتذكرة بـ 30 جنيه.

في نفس المكان (ساقية الصاوي) بس قبلها بحوالي ساعة ونصف في قاعة النهر هـ يكون فيه حفل لمطرب ميدان التحرير أيام الثورة رامي عصام، وهـ يقدم فيها مجموع الأغاني الجديدة اللي طرحها على الإنترنت مؤخرًا، الحفل هـ يبدأ الساعة 7 مساءً والتذاكر بـ 20 جنيه.

على مسرح الجنينة في حديقة الأزهر هـ يكون فيه حفل غنائي لفريق صوت في الزحمة السكندري اللي حقق نجاحات جماهيرية كبيرة في الكام سنة اللي فاتت على ساحات غناء الـ Underground. الحفل بـ 10 جنيه بس، بخلاف تذكرة دخول الحديقة بـ 7 جنيه في أيام الأجازات.

وكالة الغوري ويوم السبت يعني عرض رقص التنورة والغناء الصوفي والعزف على الآلات الشعبية، الدخول مجاني ومتاح للجميع، قريب من خان الخليلي والأزهر والغورية، جو ساحر وقعدة مسلية.

يوم السبت فيه حفل للمطربة المصرية فيروز كراوية على المسرح الكبير في دار الأوبرا المصرية، فيروز إحنا كنا نشرنا مقال نقدي عن ألبومها الأخير وكان عجبنا جدًا وكنا مستنيين حفل لايف كبير لها علشان ندعوكم لحضوره، دلوقتي ممكن تحضر الحفل ده في واحد من أكبر مسارح القاهرة، وأكيد هـ تستمتعوا بصوت فيروز وأغانيها.

فيه كمان حفل ظريف على مسرح الجنينة الأسبوع ده وهو حفل فريق إفتكاسات اللي بـ يقدم أحلى إفتكاسات الجاز الشرقي والفيوجن جاز، يوم السبت بالليل الساعة 8 هـ يبدأ الحفل، تذكرته بـ 10 جنيه، وهـ تسمع مقطوعات من البوماتهم "مولد سيدي اللاتيني" و"دندشة".

فيه ندوات مهمة الأسبوع ده زي ندوة الكاتب علاء الأسواني في ساقية الصاوي يوم الخميس وندوة الداعية الإسلامي مصطفى حسني في نفس المكان يوم السبت، والتفاصيل موجودة لما تضغط على اللينك.

وفيه عدد من المعارض الفنية في جاليريهات الزمالك ووسط البلد، وفيه عرض أفلام سينمائية عالمية في مراكز ثقافية مختلفة، وفيه عروض مسرحية. ادخل على أجندتنا واعرف إيه ثاني ممكن تعمله الأجازة دي.. ويارب تبقوا مبسوطين.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
12/07/2012
-