آفاق: ونش لرفع الأجهزة والأثاث للأدوار العالية بدون خسائر - الحياة في كايرو Feature - كايرو 360
 







آفاق: ونش لرفع الأجهزة والأثاث للأدوار العالية بدون خسائر
آفاق: ونش لرفع الأجهزة والأثاث للأدوار العالية بدون خسائر
اصدرت في: 17/07/2012

رغم أن الفكرة تبدو بديهية وأفضل كثير من رفع الأجهزة والمفروشات على سلالم العقارات إلا أننا ما كناش عارفين منين الواحد ممكن يحصل على خدمة الرفع دي بالونش عن طريق البلاكونات والشبابيك إلا لما سمعنا عن شركة «آفاق» المتخصصة في رفع الأجهزة باستخدام الأوناش المحمولة على ظهر سيارات النقل الجامبو، واللي بـ توفر خدمتها لكل حتة في القاهرة وبأسعار أقل من أنك تجيب عمال وشيالين يطلعوا الحاجات ويفاصلوا معاك على الأجر لآخر نفس وكمان يبقوا عاوزين بقشيش غير الأجرة المتفق عليها، ناهيك عن احتمالات تجريح وتكسير الأثاث والمفروشات والأجهزة اللي مافيش مفر أنها هـ تحصل ده غير أن أعصابك هـ تتلف مع كل قطعة طالعة أو نازلة من بيتك أو مكتبك. أو أضعف إيمان أن المنقولات تتسخ أوتفقد قيمتها المعنوية بالنسبة لك مع التخبيط والبهدلة على يد العمال.

شركة «آفاق» بـ توفر خدمة تعتبر جديدة علينا في مصر أو مش منتشرة بالقدر الكافي مع أنها المفروض تعمم وتبقى البديل الطبيعي لاستخدام السلم ومداخل العمارات، خاصة أننا في مصر عندنا مشكلة المداخل الضيقة والسلالم الأضيق، لذلك الشباك هو الحل! العربية اللي عليها الونش الهيدروليك اللي شبه إيريال التليفزيون القديم بـ تقف أمام العقار وتفرد العمدان الحديدية اللي بـ تتحول لقضبان يتحرك عليها الأصانصير المسطح طلوعًا ونزولًا من أمام التراس اللي بـ تثبت عليه العمدان الحديدية دي. ويتحرك الأصانصير ببطء بأجهزتك وأدواتك لكن بأمان تام وباحتمالات خسائر توصل لصفر %. المقال هنا مش ممكن يظهر وكأنه دعاية للشركة لكن الحقيقة أن انبهارنا بالفكرة وسعادتنا بأننا عثرنا على خدمة زي دي هـ تخلينا متحيزين لها وهـ ننادي بـ تعميمها.

رفع المنقولات بـ يبقى لحد 9 بلكونات بعد الدور الأرضي والأسعار كالتالي: أي غرفة نوم أو سفرة أو صالون بـ تبقى بـ 200 جنيه، طلوع بس أو نزول بس، والأجهزة الكهربائية زي البوتاجاز والغسالة والتليفزيون بـ 50 جنيه، والثلاجة والديب فريزر بـ 100 جنيه، يعني السعر محدد حسب الغرف ونوع الأجهزة مش بالساعة أو الوزن. ولازم تتفق معاهم قبل الميعاد اللي أنت عاوزه بـ 3 أيام أو يومين على الأقل، وبـ تدفع مبلغ 30 جنيه نظير المعاينة اللي بـ يقوم بها مهندسين الشركة للمكان قبل الميعاد بيوم واحد. وبـ يتم إمضاء العقد في مكان الرفع أو في أي مكان قبل بدء العمل مباشرة. الشركة بـ توفر خدمة نقل بسيارات مجهزة لكن دي لها تكلفة أعلى شوية من المعتاد، يعني لو هـ تجيب الأثاث والأجهزة من أكثر من مكان وتوصلها لمكان واحد السعر هـ يبقى من 800 لـ 1000 جنيه. وفي الحالة دي بـ يكون مع السيارة دي شيالين بـ يقوموا برص ورفع المنقولات على السيارة وعلى الونش، إنما لو طلبت خدمة الونش بس من غير نقل يبقى لازم تجيب عمال وشيالين تبعك لأن الشركة بـ ترسل الونش بمهندسين تشغيله فقط وهم غير مسؤولين عن رفع المنقولات على الونش أو تنزيلها داخل الشقة. يعني لا غنى عن العمالة اليدوية برضه لكن في أضيق الحدود.

الأوناش كمان بـ تستخدم في رفع خزانات المياه فوق الأسطح واليفط الإعلانية والأجهزة الطبية والرياضية (علشان لو حد بـ يجهز عيادة أو جيمانزيوم في دور علوي ولا حاجة) والشركة عندها مواصفات جودة ومعايير معينة بـ تحافظ عليها في كل عملية. ممكن تتصل بالشركة على الأرقام دي 0225176376 أو 01020242444 أو 01020242299 وممكن تراسلهم على الإيميل ده afaq-Lifting@hotmail.com ومقر الشركة نفسها موجود في شارع فلسطين المتقاطع مع شارع اللاسلكي في المعادي الجديدة.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
وليد أبوعرب
حرر بواسطة:
وليد أبوعرب
تاريخ النشر:
17/07/2012
محرر مساعد سابق - بـ يحب الخروج، دماغه فى الفرق الموسيقية وبـ يلعب مزيكا، بـ يحب يكون عنده معرفة عن كل شيء، بـ يزهق بسرعة! ما بـ يحبش تويتر.