دليل أحداث نهاية الأسبوع: نصير شمة ولايك جيلي وورش فنية ومشروع المريخ - الحياة في كايرو Feature - كايرو 360
 







دليل أحداث نهاية الأسبوع: نصير شمة ولايك جيلي وورش فنية ومشروع المريخ
دليل أحداث نهاية الأسبوع: نصير شمة ولايك جيلي وورش فنية ومشروع المريخ
اصدرت في: 13/09/2012
هو أجازة الصيف اللي خلصت بسرعة ولا رمضان لما اخترقها كان سبب في أننا ما نحسش بها ولا هي أخذت وقتها وزيادة بس إحنا اللي طماعين! أصل بجد ده آخر ويك إند في أجازة الصيف وفيه ناس بالفعل بدأت دروس ومحاضرات من الأسبوع اللي فات، بس إحنا هـ ننظر للجانب المليان من الكوب ونقول أن ده وقتنا في كايرو 360 لأننا بـ نقدر أجازة نهاية الأسبوع وبـ نحب نعطيها قدسيتها ونكتب عنها موضوع خاص كل يوم خميس، وبما أن الدراسة جاية هـ تصبح أيام الخميس والجمعة ويمكن السبت هي أيام التنفيس والترويح اللي هـ تخلي الناس تتهافت على المقال الأسبوعي الرهيب بتاعنا وينتظروه على أحر من الجمر (أوﭭر قوي.. مش كده؟) عمومًا إحنا هـ نحتفل معاكم بانتهاء الأجازة الصيفية وبداية العام الدراسي الجديد "إن كانت دي حاجة تستوجب الاحتفال" وهـ نقول لكم المراكز الثقافية والمسارح هـ تقدم إيه بالمناسبة السعيدة دي.
نبدأ من النهارده الخميس، وعرض لنتاج ورشتين عمل في المسرح والشعر، والاحتفالية هـ تبقى في وكالة الغوري. ورش العمل كانت في بيت العيني وأقامهم مركز إبداع الطفل على مدار الأجازة الصيفية. الدخول متاح للجميع والعرض هـ يبدأ الساعة 8 مساءً.
وكمان مركز طلعت حرب الثقافي هـ يقيم حفل ختام لأنشطة موسم الصيف هـ يتضمن افتتاح معرض بعنوان "الفن حياة" اللي بـ يضم مجموعة من الأعمال الفنية هي نتاج الورش الفنية اللي أقيمت بالمركز خلال فترة الصيف، وهـ يقدم فريق كورال المركز فقرة غنائية بقيادة الفنانة دعاء عطية تتضمن عدد من الأغاني الوطنية والتراثية. ويختتم الحفل بتوزيع الجوائز علي المتميزين في أنشطة المركز المختلفة، الدخول الساعة 7 مساءً.
مسرح روابط في وسط البلد هـ يستضيف عرض بعنوان "نشاز" وهوعرض عربي كوميدي فيه فقرات مختلفة زي الموسيقى والرقص وكمان هـ يكون فيه كلمة من أعضاء فرقة "حالة" المسرحية، الحضور مجاني وهـ يبدأ الساعة 7 مساءً. مركز روابط جنب التاون هاوس جاليري في شارع معروف لو ما حدش عارف.
المسرح الصغير بدار أوبرا القاهرة هـ يستقبل كورال سيد درويش نادي سبورتنج بالإسكندرية للاحتفال بذكرى وفاة الفنان سيد دروي، التذاكر متوفرة على الأبواب والحفل يبدأ في تمام الثامنة مساءً.
حفل من طراز خاص الليلة دي على مسرح الجنينة في حديقة الأزهر، ممكن نسميها كوميدية موسيقية أو مزيكا كوميدية، المهم هم فرقتين تميزوا في النوع ده من الموسيقى والكلمات الساخرة وتقريبًا هم الأفضل على الساحة في مجال تخصصهم وهم High on Body Fat وLike Jelly اللي هـ يتقاسموا المسرح الليلة في حفل دمه خفيف هـ يبدأ الساعة 8:30 مساءً وتذكرة الدخول بـ 10 جنيه بخلاف تذكرة دخول الحديقة.
مشروع المريخ رجع ثاني، المرة دي في مركز درب 17 18 الثقافي في منطقة الفسطاط يوم الجمعة اللي هو بكره. مشروع المريخ هو ميكروفون مفتوح تعرض من خلاله موهبتك في مدة لا تزيد عن 5 دقائق، والاشتراك متاح للجميع. روح قبل بداية العرض بساعة وسجل بياناتك وخذ دورك واعرض موهبتك. العرض هـ يبدأ الساعة 7 مساءً.
يستضيف بيكيا المعادي ورشة لفن الكولاج أو فن القص واللصق لمجموعة من الفنانين الموهوبين والخبراء، سعر الجلسة 125 جنيه و200 جنيه لجلستين، كل جلسة مدتها أربع ساعات. اتصل واحجز مكانك بالتليفون من النهارده.
في مركز صوفي في الزمالك وللأسبوع الثاني على التوالي هـ يتم عرض فيلم إيراني بعنوان بيرسبوليس، وهو من إنتاج 2007 ويحكي عن فتاة إيرانية في وقت الثورة الإسلامية. الدخول بدون رسوم لكن فيه حد أدنى للطلبات.
يوم السبت تقريبًا بقى يوم حفلات الميتال في ساقية الصاوي، أوعوا تكونوا صدقتم موضوع عبدة الشيطان من فضلكم! أكيد إحنا متوسمين في قرائنا أفضل من كده. المهم.. حفل لفريق Massive Scar Era الشهير بـ Mascara هـ يقام يوم السبت في قاعة النهر. الفريق ده عمل جولات غنائية ناجحة خارج مصر وله جمهور كبير بـ يحب موسيقته وأغانيه، وظهر في فيلم «ميكروفون» سنة 2010. الحفلة الساعة 8:30 مساءً والتذاكر بـ 15 جنيه.
مسك ختام للأجازة هـ تبقى بحفل أستاذ العود العازف العراقي نصير شمة وحفل على مسرح قاعة الحكمة في ساقية الصاوي يوم السبت الساعة 8 مساءً، وهـ يقدم نصير أعماله الخاصة بجانب عدد من المؤلفات المشهورة للعود. التذكرة بـ 40 جنيه.
فيه عدد كبير من معارض اللوحات الزيتية والفوتوغرافيا تم افتتاحها الأسبوع ده، وفيه ندوات ومحاضرات في المراكز والمعاهد الثقافية المختلفة. أضفنا كل ده لأجندة موقعنا علشان لو حبيتوا تلقوا نظرة، ولو أن إحنا عارفين أن المحاضرات والدروس جاية جاية، وماحدش هـ يبقى متحمس لها قوي اليومين دول. نشوفكم على خير ودراسة سعيدة عليكم إن شاء الله.
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
13/09/2012
-