دليل أحداث نهاية الأسبوع: تامر أبو غزالة وأوبرا عايدة وفرقة المصريين ومعارض فنية - الحياة في كايرو Feature - كايرو 360
 







دليل أحداث نهاية الأسبوع: تامر أبو غزالة وأوبرا عايدة وفرقة المصريين ومعارض فنية
دليل أحداث نهاية الأسبوع: تامر أبو غزالة وأوبرا عايدة وفرقة المصريين ومعارض فنية
اصدرت في: 20/09/2012
صحيح الشوارع بقت زحمة بشكل مش طبيعي الصبح، لكن بالليل الدنيا اختلفت كثير، عن تجربة يعني؛ ممكن توصل من مصر الجديدة للزمالك في 20 دقيقة! وكل ما الوقت يتأخر كل ما الشوارع بـ تروق، دراسة وصحيان بدري بقى وكده. طيب يا ترى هـ يكون إيه الوضع في الويك إند؟ لسه هـ نعرف النهارده لما نخوض التجربة مع بعض، يا ريت كل واحد ينزل في منطقة بالليل في أيام الخميس أو الجمعة يقول لنا أخبار المنطقة دي إيه، اكتبوا لنا على صفحتنا على الفيسبوك أو بالتعليق تحت المقال هنا مباشرة.
الأسبوع ده فيه معارض فنية جديدة بدأت فعالياتها في أكثر من مكان، بجانب الحفلات الموسيقية وعروض دار الأوبرا، لسه على الهادئ كده مافيش حفلات كبيرة زي ما تعودنا في أول أسبوعين دراسة، وبعد كده هـ نلاقي الموسم الشتوي بلغ أشده وحفلات ومهرجانات هنا وهناك لحد ما نوصل لأجازة نصف العام (مستعجلين قوي إحنا.. مش كده؟) فـ خلينا مترقبين دائمًا إيه الجديد في شوارع ومسارح كايرو.
أول حفلة عندنا الليلة دي هـ تبقى حفلة موسيقية غنائية لفريق كاميرا باند اللي بـ يقدم أغاني مصرية وموسيقى متنوعة. الحفل في ساقية الصاوي في قاعة النهر الساعة 8:30 مساءً، والتذكرة بـ 15 جنيه.
في قاعة الحكمة في نفس المكان هـ تقدم فرقة المصريين حفل غنائي هـ يبدأ الساعة 8 مساءً. الفرقة غنية عن التعريف بقيادة الموسيقار هاني شنودة ومعاه المطربة إيمان يونس، من أنجح الفرق الغنائية في بداية الثمانينيات، لسه بـ يقدموا أشهر مقطوعاتهم الموسيقية زي "ما تحسبوش يا بنات" و"ماشية السنيورة" بصحبة مطربين وعازفين شباب. التذاكر على الأبواب بـ 25 جنيه لغير الأعضاء و20 جنيه للأعضاء.
النهارده هـ تحيي فرقة المغنى خانة حفل على مسرح الجنينة هـ تقدم فيه موسيقى الفولك البديلة اللي شبه الفولكلور المصري ولكن بموسيقى معاصرة، ولها العديد من الأغاني الفلكلورية اللي بـ تتكلم عن مشكلات المجتمع المصري. سعر التذكرة 10 جنيه بخلاف تذكرة دخول حديقة الأزهر.
نروح للمعارض الفنية، معرض تم افتتاحه من يومين بالتعاون مع جاليري الزمالك للفنون، ولاونج الشوكولاتة في فندق كمبنسكي هـ يستضيف أعمال الفنان المصري عبد الوهاب عبد المحسن تحت عنوان "المرآة". أعمال عبد المحسن بـ تعكس العلاقة الروحانية بين الإنسان والطبيعة. المعرض مفتوح للزوار من الساعة 10 صباحًا.
وفي جاليري أوان في وسط البلد هـ يكون فيه معرض بعنوان "خروج" للفنان أمادو ألفادني. المعرض مستمر لحد يوم 23 سبتمبر.
يوم الجمعة في دار الأوبرا المصرية هـ تقدم فرقة أوبرا القاهرة وأوركسترا القاهرة أوبرا عايدة على المسرح الكبير، الدخول بالملابس الرسمية، والتذاكر ممكن تحجزها من دلوقتي، بس أكيد هـ تلاقيها متوفرة على الأبواب.
وعلى المسرح الصغير وفي نفس التوقيت هـ يكون فيه حفل للفنان يحيى خليل. موسيقى الجاز الشرقي ارتبطت بأسمه سنين طويلة، وكالعادة هـ يقدم مقطوعاته المعروفة اللي بـ تعجب الجماهير. الحفل يبدأ الساعة 8 مساءً.
الفنان الفلسطيني تامر أبو غزالة بـ يقدم شكل غير مألوف من الأغاني العربية، موسيقى Progressive وعزف عجيب على آلة العود وكلمات غير مفهومة للأغاني أحيانًا، خليط عجيب هـ يقدمه تامر أبو غزالة على مسرح الجنينة داخل حديقة الأزهر يوم الجمعة الساعة 8:30 مساءً. التذكرة بـ 10 جنيه.
يوم السبت هـ يقام حفل غنائى دعمًا للثورة السورية بعنوان "قال شو" بقاعة الحكمة بساقية الصاوي مع الفنان السوري خاطر ضوا. سعر التذكرة 20 جنيه، والدخول الساعة 8 مساءً.
حفل ثاني يوم السبت تحييه الفنانة شيلا سكريبنر على مسرح الجنينة، شيلا مغنية وكاتبة أغاني أمريكية، وتأثرت كتابتها بموسيقى البوب والبلوز والموسيقى الكنسية. انتقلت شيلا إلى القاهرة في نوفمبر 2008 وقدمت عدد من الحفلات في دار الأوبرا المصرية وكايرو جاز كلوب، وبـ تعمل حاليًا على مشروع منفرد لها، سعر التذكرة 10 جنيه بخلاف سعر دخول الجنينة.
فيه عروض سينمائية بمركز صوفي الثقافي بالزمالك، وعدد من الأمسيات الشعرية ومعارض الفوتوغرافيا وحفلات موسيقية في دار الأوبرا، ممكن تعرفوا تفاصيل أكثر عنها من أجندة موقعنا. نتمنى لكم أجازة سعيدة مافيهاش زحمة، وتعوضوا تعب أول أسبوع دراسة.. ونشوفكم على خير.
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
20/09/2012
-