دليل أحداث نهاية الأسبوع: نسمة محجوب وعرض أراجوز ولقاء عبد الرحمن يوسف وقص ولزق - الحياة في كايرو Feature - كايرو 360
 







دليل أحداث نهاية الأسبوع: نسمة محجوب وعرض أراجوز ولقاء عبد الرحمن يوسف وقص ولزق
دليل أحداث نهاية الأسبوع: نسمة محجوب وعرض أراجوز ولقاء عبد الرحمن يوسف وقص ولزق
اصدرت في: 27/09/2012
أسبوع ظريف عدى علينا هنا في مكتب كايرو 360 والشغل فيه كان لذيذ كده، وأسبوع الشغل الحلو ما بـ يكملش إلا لما نختمه بأجازة حلوة فيها خروجة جامدة أو سفرية صغيرة. دائمًا هـ نميل للاقتراح الأولاني لأن موضوع السفر هـ يخليكم خارج القاهرة اللي هي تخصصنا. والأسبوع ده فيه حاجات كثير نعملها وترضي كل الأذواق، شوفوا كده مين يناسبه إيه من الحاجات دي وانطلقوا في شوارع كايرو وعلى بركة الله.الليلة دي فيه حفل في دار أوبرا جامعة مصر للعلوم والتكنولوجيا MUST هـ تحييه المطربة نسمة محجوب نجمة ستار أكاديمي، واللي ألبومها تم طرحه في الأسواق من أسابيع قليلة وكتبنا عنه مقال نقدي هنا في موقعنا. الحفل هـ يبدأ الساعة 8 مساءً ولازم تتصل وتحجز تذكرتك قبل ما تروح.
ثلاثي عمرو صلاح لموسيقى الجاز هـ يقدم حفل موسيقي الليلة دي على المسرح الصغير بدار الأوبرا المصرية بمصاحبة الفنانة نهى فكري. عمرو صلاح عازف بيانو وهو مؤسس فرقة إفتكاسات، والثلاثي الخاص به بـ يقدم موسيقى مختلفة شوية عن اللي بـ يقدمها مع إفتكاسات. الحفلة الساعة 8 مساءً.
دعوة عامة ومفتوحة للكتابة والارتجال الفني في مركز كرمة بن هانئ بالتعاون مع جماعة مغامير الفنية. فرصة كويسة لهواة الشعر والأدب والتمثيل، اللي مهتم بالحاجات دي أكيد هـ يستمتع. العرض يبدأ الساعة 5 مساءً.
النهاردة الساعة 9 مساءً مغني الجاز والبلوز المصري الرائع أحمد حرفوش هـ يغني في حفلة في فندق فيرمونت نايل سيتي في مطعم سايجون، الحجز ضروري.
زي كل يوم خميس "بس إحنا لازم نفكركم من أسبوع لأسبوع" فريق سلالم اللي بـ يقدم موسيقى الإندي بوب والأغاني الشرقية الساخرة هـ يلعب في أفتر 8 في وسط البلد. والحد الأدنى للطلبات 100 جنيه، احجز قبل ما تروح.
على غير العادة حفلة موسيقى الميتال الأسبوع ده في ساقية الصاوي مش يوم السبت، لكن النهارده الخميس. فريق Dark Philosophy اللي بـ يقدم موسيقى الـ Dark Metal هـ يقدم حفل الليلة دي في قاعة النهر والتذكرة بـ 20 جنيه و15 جنيه لأعضاء الساقية.
يوم الجمعة فيه عرض أراجوز وخيال ظل في بيت السحيمي القريب من خان الخليلي، العروض من تأليف وإخراج د. نبيل بهجت، أشعار سيد لطفى، وأداء فرقة "ومضة" وتعتمد العروض على الأراجوز وخيال الظل والراوى، ويتضمن العرض مجموعة من الفنون الشعبية والتراثية زي التنورة والتحطيب .
الشاعر والإعلامي عبد الرحمن يوسف هـ يكون فيه لقاء مفتوح مع محبيه في قاعة النهر في ساقية الصاوي يوم الجمعة الساعة 7 مساءً.
ومن المعارض الفنية اللي حابين ننوه عنها الأسبوع ده معرض لوحات بعنوان Unloaded  في جاليري كالا ويعرض فيه أعمال الفنان مينا فاروق. المعرض بدأ يوم 23 سبتمبر ومستمر لحد يوم 11 أكتوبر.
فريق قص ولزق هـ يقدم حفلة غنائية في قاعة النهر في ساقية الصاوي يوم السبت. قص ولزق بـ يقدموا أغانيهم الخاصة باللهجة المصرية. ألحانهم مميزة وأدائهم ظريف على المسرح. بـ نرشحهم للمشاهدة الأجازة دي.
حفل من نوع خاص يوم السبت برضه على مسرح الجنينة في حديقة الأزهر، الحفل للموسيقى الشعبية اللي انتشرت مؤخرًا وكان أبطالها مغنيين ودي جي من مناطق شعبية في القاهرة والإسكندرية زي أوكا وأورتيجا وفيجو وعمرو حاحا ودي جي شعوذة. أوكا ووأورتيجا وشعوذة هـ يقدموا حفل بعنوان 8 % على مسرح الجنينة والتذكرة بـ 10 جنيه بخلاف رسوم دخول الحديقة.
مش هـ نطول عليكم بقى وما تنسوش تشوفوا باقي الأحداث الثقافية على أجندة الموقع، ونشوفكم على خير.
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
27/09/2012
-