روَّح.كوم: موقع جديد لتسهيل استخدام المواصلات في القاهرة - الحياة في كايرو Feature - كايرو 360
 







روَّح.كوم: موقع جديد لتسهيل استخدام المواصلات في القاهرة
روَّح.كوم: موقع جديد لتسهيل استخدام المواصلات في القاهرة
اصدرت في: 02/10/2012
في شهر أبريل 2011 ومع بداية انطلاق موقعنا كايرو 360 نشرنا موضوع خاص عبارة عن دليل استخدام المواصلات العامة والخاصة في العاصمة وشرحنا فيه بشكل بسيط إزاي ممكن تروح من مكان لمكان داخل القاهرة الكبرى بمحافظاتها القاهرة والجيزة والقليوبية، ولاحظنا اهتمام القراء بالموضوع من خلال تعليقاتهم عليه وأسئلتهم اللي أرسلوها على الإيميل الخاص بالاستفسارات وكانت كلها بخصوص كيفية الذهاب إلي أماكن معينة وأحسن وأسرع وسيلة مواصلات من نقطة لنقطة داخل القاهرة، وده طبعًا كان لأن الموضوع اللي كتبناه أكيد ما كانش مغطي كل مناطق وأحياء القاهرة، إنما كان مركز أكثر على الميادين الكبيرة والشوارع الحيوية. وبالطبع ما قدرناش نرد على كل الاستفسارات اللي جاءت لنا بالتفصيل اللازم، لكن كان عزائنا في ده أننا حاطين في المقال الخطوط العريضة اللي هي الميادين المهمة والمواقف الرئيسية للمواصلات اللي ممكن تساعد في الوصول كل الأحياء لبعضها.
لكن مع ظهور موقع روَّح.كوم لاقينا أن من اللازم التنويه عنه وإضافته لقوائم مواقعنا المفضلة لأنه فعلًا هـ يبقى وسيلة مساعدة فعالة جدًا في حالة أنك تائه ومش عارف تركب إيه منين علشان تروح فين. الموقع قام بإنشائه والترويج له المهندس محمد تيسير بمصاحبة زوجته منى جمال، وشاركوا بفكرة الموقع في مسابقة "جوجل ابدأ" ووصلوا للمراحل النهائية في المسابقة، وتم إطلاق الموقع من شهور قليلة وهو بسيط جدًا في تصميمه وطريقة استخدامه، وهو عبارة عن صفحة رئيسية فيها خانتين تكتب في الأولى المكان اللي أنت فيه وفي الخانة الثانية المكان اللي أنت عاوز تروحه. نتائج البحث بـ تظهر لك باللغة العامية وبـ يتم فيها شرح وسائل المواصلات اللي ممكن تستخدمها بالترتيب للوصول للمكان المراد الذهاب إليه، ممكن يطلع لك أكثر من نتيجة للبحث، أو بمعنى أدق أكثر من طريقة تروح بها للمكان اللي أنت عاوز تروحه. لكن لما تيجي تختار نقطتي البداية والنهاية لازم تختار من قائمة أماكن مضافة بالفعل لقاعدة بيانات الموقع، أو تختار أقرب نقطة للمكان اللي أنت فيه، وإلا هـ يرد عليك الموقع بجملة "للأسف أنا ما أعرفش المحطة دي فين" ولو أدخلت نقاط بداية ووصول صحيحة في الخانتين ممكن برضه يرد الموقع بـ "للأسف ما أعرفش تروح إزاي، ممكن تسألنا على فيسبوك أو تويتر" وفي الحالة دي توقع الرد بسرعة من فريق عمل الموقع المتحمس جدًا، واللي بـ يشتغل دلوقتي على توسيع قاعدة البيانات علشان تشمل كل أماكن القاهرة وكل وسائل المواصلات حتى الأتوبيس النهري زي ما قال محمد تيسير مصمم الموقع في أحد اللقاءات.
الموقع لا يزال في مرحلة النسخة التجريبية أو Beta ومن المتوقع أنه يتم مع إطلاق النسخة الكاملة منه أنه يكون فيه Application خاصة به يتم تحميلها على التليفونات الذكية زي الـ iphone و الـ Blackberry وغيرها، وده لتسهيل الاستخدام وعلشان يبقى مكمل لموقع Bey2ollak.com اللي بـ يستخدمه أكثر أصحاب السيارات الملاكي لمعرفة الشوارع الزحمة ومحاولة تفاديها. يعني من روَّح.كوم ممكن تعرف الطريقة المناسبة علشان تروح مشوارك بعد ما تعرف أي من الطرق سالك وممكن توصل منه أسرع من خلال Bey2ollak.com.
في روَّح.كوم هـ تلاقي أرقام الأتوبيسات العامة وشركات النقل الجماعي، والمحطة اللي ممكن تنتظره فيه بالضبط، وهـ تلاقي أسماء أقرب محطات مترو لكل نقطة، وكمان مواقف الميكروباص الموجودة حتى في بعض المناطق النائية او غير المعروفة. شكرًا لأصحاب الموقع اللي هـ يسهلوا علينا كثير التحرك بين شوارع وميادين كايرو، وإحنا متوقعين أنهم هـ يبذلوا جهد أكبر لإخراج الشكل النهائي للموقع بأحسن صورة.
مزيد من الصور
  • روَّح.كوم: موقع جديد لتسهيل استخدام المواصلات في القاهرة
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
وليد أبوعرب
حرر بواسطة:
وليد أبوعرب
تاريخ النشر:
02/10/2012
محرر مساعد سابق - بـ يحب الخروج، دماغه فى الفرق الموسيقية وبـ يلعب مزيكا، بـ يحب يكون عنده معرفة عن كل شيء، بـ يزهق بسرعة! ما بـ يحبش تويتر.