دليل أحداث نهاية الأسبوع: لقاء البرادعي ومركز فوتوبيا وسيركايرو ونبضة فن - الحياة في كايرو Feature - كايرو 360
 







دليل أحداث نهاية الأسبوع: لقاء البرادعي ومركز فوتوبيا وسيركايرو ونبضة فن
دليل أحداث نهاية الأسبوع: لقاء البرادعي ومركز فوتوبيا وسيركايرو ونبضة فن
اصدرت في: 11/10/2012
يا مساء الخير.. يا رب تكونوا بأحسن صحة وحال، الجو حلو كده ليه؟ مش واخدين إحنا على الدلع ده! طيب نطلع على الساحل والسخنة إحنا كمان ونسيبكم ولا نقعد وتفضلوا معانا تنورونا ونقول لكم على كام خروجة ومعرض حلوين نحضرهم في الويك إند؟
خلينا في كايرو عشقنا الأول والأخير رغم كل حاجة وحشة فيها، وهـ ندخل في الموضوع على طول ونقول لكم الأحداث الظريفة والأنشطة اللي ممكن نعملها النهارده وبكرة وبعده.
النهارده الخميس فيه عدد لحفلات موسيقى وغناء مميزة، أولهم حفل المطربة دينا الوديدي وفرقتها. أغاني مصرية على موسيقى الفيوجن جاز، والفرقة بـ تضم مجموعة من أفضل الموسيقيين في مصر. الحفل الساعة 8 مساءً في قاعة الحكمة في ساقية الصاوي والتذكرة بـ 20 جنيه.
وعلى المسرح المكشوف في دار الأوبرا المصرية هـ تحيي عازفة الهارب الأكثر شهرة وموهبة في مصر الفنانة منال محيي الدين حفل موسيقي هـ تقدم فيه أعمالها الخاصة وبعض المقطوعات العالمية. لو بـ تحب الموسيقى الحالمة وخاصة آلة الهارب هـ تحب تحضر الحفل ده، التذاكر على الأبواب.
مركز فوتوبيا الثقافي فتح قريب في الكوربة في مصر الجديدة، منطقة حيوية ولازم يكون فيها نشاط ثقافي وفني أكثر من كده. فيه حفل الليلة دي لفرقة بهية اللي بـ تغني أغاني التراث الثوري للشيخ إمام عيسى وسيد درويش خاصة الأغاني الثورية اللي عبرت -ولا تزال- عن كفاح المصريين ضد المستعمر. سعر التذكرة 15 جنيه والحفل هـ يبدأ الساعة 7 مساءً.
وعلى مسرح الجمهورية في وسط البلد والقريب جدًا من محطة مترو محمد نجيب هـ يبقى فيه حفل لأغاني التراث الموسيقي المصري هـ تقدمه فرقة الموسيقى العربية للتراث اللي تأسست عام 2003 من مجموعة من الطلبة، وبـ يقودها الآن فاروق البابلي وتهدف الفرقة لإحياء الموسيقى التراثية للفنون العربية، الحفل الساعة 8 مساءً.
يوم الجمعة فيه حفل ثاني للأغاني والموسيقى التراثية والطرب الأصيل على مسرح أوبرا جامعة مصر للعلوم والتكنولوجيا MUST هـ تحييه الفنانة رحاب مطاوع والمطرب وليد حيدر. التذاكر بـ 30 و35 جنيه، والدخول الساعة 8 مساءً.
وفي قاعة الحكمة في ساقية الصاوي هـ يكون فيه حفل لفرقة صحرا اللي اشتهرت بـ تقديم موسيقى الراي، ووضعت الموسيقى التصويرية لفيلم الوتر، وأصدرت ألبومها الأول عام 2009 وأحيت عدد كبير من الحفلات الناجحة داخل وخارج مصر. الحفل الساعة 8 مساءً في قاعة الحكمة والتذاكر بـ 20 و25 جنيه.
في مركز صوفي بالزمالك هـ يعرض فيلم أنيميشن باللغة العبرية بعنوان فالز مع بشير أو Waltz with Bashir من إنتاج عام 2008 ويحكي عن ضابط إسرائيلي يحاول استرجاع ذاكرته عام 1982 وقت الحرب على لبنان عن طريق التحدث مع المحاربين القدامى. الفيلم مترجم للإنجليزية وفيه حد أدنى للطلبات في صوفي.
وفيه لقاء مهم جدًا مع الدكتور محمد البرادعي في القرية الفرعونية، هـ يتكلم فيه عن حزب الدستور وأهدافه وأهم المشاكل اللي هـ يركز عليها الفترة اللي جاية، وهـ يقوم بتكريم أبطالنا المعاقين فى دورة الألعاب البارالمبية اللى أقيمت مؤخرًا فى لندن. ومن بين الحضور السيدة جميلة إسماعيل والدكتور عماد أبو غازى، والدخول الساعة 4 عصرًا.
نبضة فن مهرجان ثقافي بـ يقدم توليفة من الفنون والحرف والفرق الموسيقية المحلية والعالمية مجتمعة ليستمتع بها الجميع. يتضمن البرنامج في يوم الافتتاح اللي هو بكره فقرة مايك مفتوح لـ "مشروع المريخ"، وعرض لـ "نيو بيرد"، ومعرض فني للفنان عاطف أحمد ومعرض تصوير للمصورة أميرة باري. المعرض مقام في مركز درب 17 18 الثقافي ومستمر لمدة 3 أيام.
يوم السبت فيه حفل لفرقة Under Zero لموسيقى الهيب هوب والراب في قاعة الحكمة في ساقية الصاوي. الفرقة قدمت حفلات جيدة في الفترة اللي فاتت وتعتبر إضافة حقيقية لعالم الهيب هوب في مصر. التذاكر بـ 10 جنيه لأعضاء الساقية 15 جنيه لغير الأعضاء.
فيه معارض فنية في مركز الجزيرة للفنون وجاليري نوكيو ولاونج الشوكولاتة، وفيه ندوات مهمة في الساقية، ولسه عروض سيركايرو شغالة في شوارع القاهرة، وحاجات ثانية كثير تقدروا تعرفوا تفاصيلها من خلال أجندة كايرو 360 ولو عندكم أحداث ثقافية إحنا مش كاتبين عنها ممكن تبعثوا لنا وإحنا نضيفها على طول. ويك إند سعيد..
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
11/10/2012
-