Sacha Books: مكتبة كتب رقمية للأطفال - الحياة في كايرو Feature - كايرو 360
 







Sacha Books: مكتبة كتب رقمية للأطفال
Sacha Books: مكتبة كتب رقمية للأطفال
اصدرت في: 13/10/2012
القراءة.. واحدة من أهم الأنشطة اللي ممكن نمارسها مع أولادنا علشان نقوي علاقتنا بهم ونعلمهم حاجات كثير بطريقة غير مباشرة. كلنا عارفين ده، لكن كلنا عارفين كمان أن الأطفال بدأوا يتشدوا جدًا للألعاب الإلكترونية والجلوس على اللابتوب بالساعات وبقت المكافأة بتاعتهم أننا نجيب لهم موبايلاتنا والـ I-pad علشان يلعبوا عليه. السبب ده هو اللي دفع سامر يوسف ومراته شانتال بلاتهونوف أنهم يبدأوا مشروعهم Sacha Books مع صديقهم شادي اليسقي وهو عبارة عن تطبيق على الموبايلات والـI-pad بـ يسمح للطفل أنه يقرأ قصص تفاعلية باللغة العربية.
سامر بـ يقول عن المشروع: "الفكرة جاءت على بالنا لما شانتال مراتي كانت حامل، بدأنا ساعتها ندخل وندور على تطبيقات مناسبة للأطفال ولقيت حاجات كثيرة حلوة باللغة الإنجليزية لكن ما لاقيتش أي حاجة خالص بالعربي، وده اللي خلاني أفكر أننا لازم يكون عندنا تطبيقات تفاعلية للأطفال باللغة العربية ومن هنا جاءت فكرة "ساشا بوكس". وفعلًا نفذنا الفكرة ودخلنا مسابقة "جوجل ابدأ" وكنا من ضمن آخر عشرين مشروع من بيع آلاف المشروعات اللي اشتركت".
بعد ما خلصنا كلام مع سامر فتحنا الـApplication علشان نجربها. أول ما ندخل بـ نلاقي أيقونتين، أيقونة مخصصة للمتجر اللي بـ تُباع فيه كل القصص وأيقونة ثانية اسمها الرف أوBookshelf ودي المستخدم بـ يلاقي فيها القصص اللي جربها أو اشتراها.
كمستخدم أول مرة هـ تدخل علىStore وهناك هـ تلاقي كل القصص المعروضة للبيع، لو ضغطت على القصة هـ تقدر تقرأ نبذة عنها وتعرف سعرها والفئة العمرية المناسبة لها وكونها مجانية ولا لأ. هـ تلاقي قصة ذات الرداء الأحمر مفتوحة بالكامل للتحميل المجاني وده علشان تتعرف على إنتاج "ساشا بوكس" بشكل أفضل وتجرب بنفسك.
الألوان مبهرة وواضحة، وصوت شانتال (اللي عرفنا بعد كده أنها بـ تلقي القصص بنفسها) واضح ومحبب لقلب الأطفال وطريقة حكي القصة مسلية جدًا. في خلفية صوت شانتال سمعنا موسيقى كلاسيكية (عرفنا بعد كده أن شانتال هي اللي بـ تختار الموسيقى كمان).
بعد ما خلصنا القصة لقينا 4 ألعاب تفاعلية ممكن الطفل يلعبها بعد ما يسمع القصة وهي بازل، وتلوين، وترتيب، وتوصيل، ومنفذة بمستويات صعوبة مختلفة علشان تناسب كذا سن.
بجانب قصة ذات الرداء الأحمر لقينا كمان عناوين لطيفة زي "الألماس والضفادع" و"فانوس رمضان" ولقينا سعر القصة الواحدة حوالي دولار واحد. الجميل أنك هـ تعرف تحمل مجانًا عدد من صفحات القصص كلها علشان تعرف الستايل بتاعها وتقرر تشتريها ولا لأ.
من الحاجات الجميلة في القصص طبيعتها التفاعلية، يعني في كل كادر الطفل بـ يلاقي جزء من الرسم يقدر يدوس عليها والقصة شغالة والجزء ده بـ يتحرك وبـ يعمل صوت زي البطة مثلًا اللي بـ تطير وتعمل أصوات في واحدة من القصص.
إحنا شايفين أن قصص ساشا بوكس مفيدة لكذا سبب: أولًا لأنها بـ تخلي الأطفال ملمين بالتكونولوجيا الحديثة وفي نفس الوقت بـ تقدم لهم محتوى مسلي وآمن بعيد عن ألعاب العنف أو الألعاب اللي مش مناسبة لثقافتنا. ثانيًا لأنها بـ تنمي مهارات ترابط العين باليد Eye-hand co-ordination وهو أن الطفل يبقى مركز بعينيه وبـ يحرك أيده في نفس الوقت.
ممكن تحملوا التطبيق من الرابط هنا، بـ يشتغل على أجهزة الآي فون والـ Ipod touch والـ I-pad، نظام تشغيل ملائم iOS 5.1 أو أحدث، وحجمه 6.1 ميجابايت (يمكن التنزيل عبر الـ (3GJ.
مزيد من الصور
  • Sacha Books: مكتبة كتب رقمية للأطفال
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
شيماء الجمال
حرر بواسطة:
شيماء الجمال
تاريخ النشر:
13/10/2012
بـ تقضي وقتها ما بين الكتابة والعيال والمطبخ وشراء طلبات البيت.. مهتمة بشكل خاص بالكتابة عن كل ما يخص الأم والطفل، بـ تحب الكب كيك زي ما بـ تحب أولادها بالضبط، بـ تعتبر الإنترنت هو الصديق الأوفى في الحياة.