دليل أحداث نهاية الأسبوع: بيركشن شو ومهرجان مسرح وبزار للهالوين ومعارض فنية - الحياة في كايرو Feature - كايرو 360
 







دليل أحداث نهاية الأسبوع: بيركشن شو ومهرجان مسرح وبزار للهالوين ومعارض فنية
دليل أحداث نهاية الأسبوع: بيركشن شو ومهرجان مسرح وبزار للهالوين ومعارض فنية
اصدرت في: 18/10/2012
ياريت بكرة ما يبقاش زي الجمعة اللي فاتت، أحداث مؤسفة وغير مبررة أفسدت علينا الويك إند وخليتنا نسترجع ذكريات مش لطيفة عن أيام عدت علينا في السنتين اللي فاتوا. هـ نعمل دليلنا الأسبوعي لأهم الأحداث والأماكن اللي ممكن تتراح في الويك إند، وعندنا أمل أن "بكرة" يكون أحلى بالمعنى الحرفي للكلمة. وهـ ندخل في التفاصيل على طول.
النهاردة فيه 5 حفلات وكلهم أجمد من بعض، الأول فيه فرقة افتكاسات في هـ تلعب في دار الأوبرا على المسرح المكشوف، بـ نحب نشوف افتكاسات في الأوبرا، كسر للعادة وجمهور من نوع مختلف، بـ نتوقع أنها هـ تكون حفلة ظريفة. الدخول الساعة 8 مساءً والتذاكر على الأبواب.
فريق High on Body Fat اللي بـ يقدم أغاني عالمية باللهجة المصرية بطريقة كوميدية شفناه قبل كدة أكثر من مرة وعجبنا آداء الثنائي جدًا، وحابين نشوفهم تاني النهاردة في كايروجاز كلوب الساعة 10 بالليل. وبعديهم فرقة باز اللي بـ تلعب موسيقى الفانك. الحجز ضروري.
ثالث حفلة قوية جدًا وهي لفرقة Percussion Show المكون من 7 عازفين إيقاع هم الأفضل في مصر وبـ يقدموا مؤلفاتهم الخاصة اللي أكيد..أكيد هـ تخليك تتنطط وأنت بـ تتفرج عليهم. إيقاعات شرقية ولاتينية وجاز وروك وكل اللي تتخيله. الحفل في قاعة النهر ساقية الصاوي الساعة 8:30 مساءً والتذكرة بـ 20 جنيه.
فرقة المصريين بقيادة هاني شنودة هـ تلعب الليلة دي في قاعة الحكمة في ساقية الصاوي. هـ يقدموا أشهر أغانيهم على مدار ساعتين. الدخول الساعة 8:00 مساءً.
الفريق الإسكندراني مسار إجباري الحائز على عدة جوائز هـ يقدم حفل جديد في مركز صوفي في الزمالك. مسار إجباري بـ تقدم أغاني عن المشكلات اللي بـ تواجه المجتمع لكن بطريقة ساخرة، سعر التذكرة 60 جنيه وبـ تتضمن مشروب واحد والدخول الساعة 8:00 مساءً.
يوم الجمعة فيه حفلتين حلوين، الأولى لأحمد حرفوش ملك أغاني جاز الخمسينيات، هـ يقدم عرض في مطعم سايجون اللي في فندق فيرمونت نايل سيتي. الحجز مهم والحفل هـ يبدأ الساعة 9 مساءً.
والحفل الثاني لفرقة بـ تقدم أغاني كوميدية برضه هي لايك جيلي واللي ظهرت قبل كدة مع فريق هاي أون بادي فات في حفل في مسرح الجنينة. لكن المرة دي الحفل لهم لوحدهم في مركز فوتوبيا الثقافي في مصر الجديدة. التذكرة بـ 25 جنيه.
ويوم الجمعة هـ يكون فيه تجمع لأصحاب الدراجات وهواة قيادتها أمام السفارة الهولندية بالزمالك بعد ما ينطلقوا بدراجاتهم من أماكن مختلفة في القاهرة، والتجمع بهدف التعارف وتبادل الخبرات. أعرف تفاصيل أكثر من صفحة الحدث على الفيسبوك.
لو عايز تعيش في جو الهالوين بدري روح القاهرة الجديدة، فيه بزار جديد في مول داون تاون القطامية في التجمع الخامس اسمه سبوكي، البس أكثر لبس مخيف عندك وخوف الناس حواليك والحركات دي، البزار هـ يكون فيه أعمال فنية وأكل كثير، ممكن تروح بكرة وتسكتشف الموضوع بنفسك.
يوم السبت كالعادة هـ يبقى فيه حفل لأوركسترا القاهرة السيمفوني مع عازفة الهارب أميرة حامد ومصطفى العربي على المزمار، وعزف مقطوعات لمارسيلو وروسول. التذاكر على أبواب دار الأوبرا، والحفل يبدأ الساعة 8:00 مساءً في المسرح الكبير.
فيه مجموعة من المعارض الفنية اللي انطلقت الأسبوع ده زي مرض "أرض..أرض"  اللي في جاليري أوان في وسط البلد واللي بـ يضم أعمال الفنان شريف عبد المجيد. وفيه معراض كثير مستمرة من الأسابيع اللي فاتت. ممكن تعرف أماكنها وموعيدها من أجندة موقعنا. وفيه عدد من الحفلات والندوات في أماكن متفرقة في العاصمة، وفيه مهرجان مسرح هـ تبدأ فعالياته في ساقية الصاوي يوم السبت، فالخير كثير والحمدلله؛ فقط..تابعونا.
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
18/10/2012
-