دليل أحداث نهاية الأسبوع: بلاك تيما ومحمد عدوية وعرض الساحر والمغنى خانة - الحياة في كايرو Feature - كايرو 360
 







دليل أحداث نهاية الأسبوع: بلاك تيما ومحمد عدوية وعرض الساحر والمغنى خانة
دليل أحداث نهاية الأسبوع: بلاك تيما ومحمد عدوية وعرض الساحر والمغنى خانة
اصدرت في: 24/10/2012
كل سنة وحضراتكم بألف صحة وسعادة، وعيد أضحى سعيد ويارب أيامه كلها تبقى فرحة وخير ولحمة ورقاق وفتة. المرة دي دليلنا الأسبوعي بـ ننشره يوم الأربعاء أولًا لأن إحنا أجازة بكره، وثانيًا علشان الأحداث والحفلات الجامدة هـ تبدأ من بكره بالليل ولحد رابع يوم العيد، علشان كده إحنا المرة دي هـ نفكركم بأهم الأحداث المنشورة على أجندة كايرو 360 من يوم وقفة عرفة لحد رابع يوم العيد اللي هو الاثنين الجاي. تابعوا كده وشوفوا حابين تحضروا إيه من الحاجات اللي هـ نكتب عنها دي.
بكره الخميس الساعة 8 مساءً هـ يكون فيه حفل للفنان يحيى خليل في دار الأوبرا المصرية على المسرح الصغير. "أورينتال جاز".. ده نوع الموسيقى اللي بـ يقدمه عازف الدرامز الأشهر في مصر، التذاكر على الأبواب.
استمتع بحفل موسيقى فولك لفريق مغنى خانة من الإسكندرية بقاعة النهر بساقية الصاوي. المغنى خانة (المغني + خانة بمعني محل الغناء، اسم يرجع بالذاكرة لجلسات الطرب في مصر في القرن الماضي، لهم طابع شعبي معبر عن مفردات أغانينا ولكنه بـ يتميز بتفرد التركيب)، سهرة حلوة لليلة العيد وسعر التذكرة 15 جنيه للجميع.
ساقية الصاوي هـ تقدم حفلة ستاند أب كوميدي باللغة العربية بقاعة الحكمة، جهز نفسك لفقرة مضحكة مع مجموعة من الكوميديانات "على الواقف" لمدة ساعتين. سعر التذكرة 25 جنيه.
هـ يقدم عرض مسرحي بعنوان "الزيارة" على مسرح روابط بوسط البلد ضمن فعاليات موسم الفنون المستقلة الأول (المسرحي الرابع) اللي بـ تنظمه مؤسسة شباب الفنانين المستقلين. العرض مستوحى من مسرحية الزيارة للكاتبة اليونانية لولا آنا جونستاكي ومستوحاة من أحداث محمد محمود. من تأليف وإخراج محمد محروس. وتعرض لمدة ثلاثة أيام.
الجمعة أول أيام العيد هـ يكون فيه مراجيح في ساقية الصاوي، مراجيح للصغيرين والكبار في قاعة النهر بسعر 10 جنيه و5 جنيه لأعضاء الساقية. من أول اليوم لآخره ممكن تلعب زي ما أنت عاوز. المراجيح موجودة يوم واحد بس.
ثاني أيام العيد ممكن تتفرج على حفل هيب هوب وأغاني راب بالعربي مع الفنان زيد حمدان بمصاحبة المطربة المميزة مريم صالح. الحفلة في قاعة النهر والتذكرة بـ 25 جنيه. وحفل ثاني بقاعة الحكمة لفرقة مراسي اللي بـ تقدم أغاني مصرية بديلة. مزيكا غربي بإحساس نوبي وطعم شرقي. سهرة ثانية حلوة في ثاني أيام العيد وسعر التذكرة 10 جنيه بس.
دار أوبرا القاهرة هـ تعرض بث مباشر من أوبرا المتروبوليتان لأوبرا Verdi's Otello المبنية على رائعة شكسبير "عطيل" والعرض هـ يكون على المسرح الصغير بدار الأوبرا الساعة 8 مساءً.
حفلة بلاك تيما السنة هـ تبقى ثالث أيام العيد، في قاعة النهر في الساقية يوم الأحد 28 أكتوبر. عرضين لفريق بلاك تيما، الأول هـ يبدأ الساعة 6 مساءً والثاني 9 مساءً. وده طبعًا لتجنب الزحام واستيعاب أكبر عدد من جمهور ومحبي الفريق اللي بـ يستنوا حفلة العيد بفارغ الصبر. حاول تحجز تذكرتك من دلوقت. السعر 30 جنيه.
في نفس التوقيت في قاعة الحكمة هـ يكون فيه عرض ألعاب سحرية مع الساحر الأردني الشاب علي الشامي. التذكرة بـ 25 جنيه والدخول الساعة 8 مساءً.
رابع أيام العيد هـ يكون مسك الختام في برنامج الساقية لحفلات العيد بحفل غنائي للفنان محمد عدوية بقاعة النهر. وده كمان محتاج حجز قبلها بشوية لأن الإقبال بـ يكون كبير.
عدد من المعارض الفنية بـ يفتح أبوابه في العيد، ممكن تتعرف عليها من أجندة موقعنا والمستمرة طوال أيام العيد وممكن تتأكد من مواعيد استقبال الزوار بالتليفون.
مرة ثانية بـ نتمنى لكم أجازة سعيدة ووقت لطيف مع الأهل والأصحاب، ونشوفكم الأسبوع الجاي وابقوا اكتبوا لنا لو شفتوا حاجة جديدة في أجازتكم إحنا مش كاتبين عنها قبل كده.
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
24/10/2012
-