دليل أحداث نهاية الأسبوع: مهرجان عكاظ وأمال ماهر وعلي الحجار ومصطفى برجاوي - الحياة في كايرو Feature - كايرو 360
 







دليل أحداث نهاية الأسبوع: مهرجان عكاظ وأمال ماهر وعلي الحجار ومصطفى برجاوي
دليل أحداث نهاية الأسبوع: مهرجان عكاظ وأمال ماهر وعلي الحجار ومصطفى برجاوي
اصدرت في: 01/11/2012
أخبار أجازة العيد إيه؟ كانت مفيدة ولا مش قوي؟ نعتقد أن السؤال ده مش مهم ما دام الأجازة خلصت خلاص واللي نام نام واللي أكل أكل واللي خرج خرج وأصبح هم كل واحد فينا الترقب لأقرب أجازة طويلة جاية. للأسف لسه بدري شوية، يمكن مع بداية العام الجديد. لكن خلينا دلوقت في الويك إند ونشوف إيه ممكن يتعمل اليومين دول.
يوم الأربعاء اللي هو إمبارح تم افتتاح مهرجان عكاظ الساقية للثقافة العربية للعام 2012 واللي بـ يتيح فرصة لعدد مهول من الأدباء والشعراء الشباب للمشاركة وطرح مواهبهم على الجمهور. الدعوة عامة للحضور والمشاركة وتم تخصيص ساعات وقاعات معينة لكل أنواع العروض سواء الشعرية أو المسرحية أو الموسيقية وللندوات واللقاءات المفتوحة. فعاليات المعرض مستمرة لحد يوم 8 نوفمبر وهـ تلاقوا كل تفاصيل المهرجان على أجندة موقعنا.
النهارده الخميس فيه ضمن فعاليات مهرجان عكاظ الساقية أمسية شعرية في قاعة النهر وفيه كمان ندوة عن ملامح الأدب العربي المعاصر في ساقية الصاوي يحاضر فيها د. سيد البحراوي وأ. محمد صلاح العزب وأ. طارق إمام. الدخول مجاني لكل العروض الخاصة بالمهرجان.
الليلة دي على المسرح المكشوف في دار الأوبرا المصرية حفل موسيقى عربية لفرقة الفنان صابر عبد الستار عازف القانون. الفرقة كانت اشتهرت باسم "تيك فايف" وحاليًا بـ تقدم عروضها تحت اسم مؤسسها صابر عبد الستار. التذاكر على شباك الحجز والدخول الساعة 8 مساءً.
وفي قاعة الحكمة وزي كل أول خميس من كل شهر ميعادنا مع حفل أم كلثوم على مسرح العرائس الخاص بالساقية، والشهر ده ميعادنا مع أغنيات "أغدًا ألقاك" و"الحب كده". التذاكر بـ 10 جنيه و5 جنيه لأعضاء الساقية.
بكره الجمعة وعلى سيرة كوكب الشرق أم كلثوم هـ يكون فيه حفل متميز جدًا للفنانة أمال ماهر في قاعة النهر بساقية الصاوي. أمال من أقوى وأجمل الأصوات الغنائية في مصر والعالم العربي واشتهرت بتقديم أغنيات أم كلثوم في بدايتها. الحفل يبدأ الساعة 8 مساءً والتذاكر بـ 35 و50 جنيه.
الفنان الكبير علي الحجار هـ يحيي حفل غنائي على مسرح أوبرا جامعة مصر للعلوم والتكنولوجيا MUST في تمام الساعة 8 مساءً. التذاكر متوفرة على الأبواب وعلى المواقع الإلكترونية وأسعارها 75 جنيه و120 جنيه.
في قاعة الحكمة بالساقية هـ يقدم فريق Boston Boys الأمريكي أجمل أغاني السول والكانتري والأمريكان رووتس. حفل مميز وموسيقى جديدة على المستمعين المصريين ونادرًا لما هـ تلاقي فرق مصرية بـ تلعب نفس النوع من المزيكا. الحفلة هـ تبدأ الساعة 8 مساءً والتذاكر بـ 10 جنيه فقط.
يوم الجمعة كمان هـ يكون فيه لقاء مفتوح في قاعة الكلمة بساقية الصاوي بالتعاون مع مكتبة (أ) ضمن فعاليات مهرجان عكاظ الساقية للثقافة العربية. اللقاء مع عدد من الكتاب الساخرين زي أسامة غريب وباسم شرف ود. محمد فتحي، ويدير اليوم أ. عماد العادلي. الدعوة عامة طبعًا.
يوم السبت في كايرو جاز كلوب فيه حفلة للفنان بشير، الأمير النوبي هـ يقدم مجموعة من أشهر أغانيه وأغاني الجنوب والنوبة الفولكلورية والحجز ضروري في كايرو جاز.
 مصطفى برجاوي ساحر وكاتب أفلام ومصور ومتخصص في الخداع البصري، قدم عروضه في بلاد كثير حول العالم ويوم السبت هـ يقدم عرض متميز في قاعة الحكمة بساقية الصاوي. التذكرة بـ 20 جنيه. والدخول 8 مساءً.
وفعالية ثانية مهمة تابعة لمهرجان عكاظ هي لقاء مفتوح بعنوان "الإعلام العربي - خطوة للأمام" بحضور كبار الإعلاميين زي مرسي عبد العليم وجيهان منصور والكاتب الصحفي أشرف عبد الشافي. اللقاء بقاعة النهر الساعة 7 مساءً والدعوة عامة.
فيه عدد من المعارض مستمر معانا من قبل العيد وعدد من الأحداث الثقافية في بيت السناري ودار الأوبرا وأفتر 8 ودرب 17 18 ممكن تعرفوا أخبارها من أجندة موقعنا، وثاني بـ نتمنى لكم "أجازة مفيدة".
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
01/11/2012
-