دليل أحداث نهاية الأسبوع: مهرجان القاهرة السينمائي وكرنفال ألوان وهاني عادل وأفريكايرو - الحياة في كايرو Feature - كايرو 360
 







دليل أحداث نهاية الأسبوع: مهرجان القاهرة السينمائي وكرنفال ألوان وهاني عادل وأفريكايرو
دليل أحداث نهاية الأسبوع: مهرجان القاهرة السينمائي وكرنفال ألوان وهاني عادل وأفريكايرو
اصدرت في: 29/11/2012
السلام عليكم يا أهل القاهرة الكرام، أخبار الشكل الجديد للموقع إيه؟ عارفين أن لسه فيه شوية حاجات محتاجة تضبيط، والسرعة في التحميل مش زي الأول، لكن دي مسألة وقت وإن شاء الله هـ تستمتعوا بالشكل الجديد ومميزاته بدون أي معوقات لأننا شغالين على معالجة العيوب بكل طاقتنا، بس محتاجين نعرف آرائكم أول بأول.
الأسبوع ده انطلقت فعاليات مهرجان القاهرة السينمائي الدولي في دورته الـ 35 ومعظم عروضه هـ تبقى على مسارح دار الأوبرا المصرية ومسرح الهناجر ومسرح الجمهورية بالإضافة لبعض دور السينما والمراكز الثقافية. هـ تلاقوا تغطية متكاملة عن جدول العروض الخاصة بالمهرجان بداية من يوم الثلاثاء اللي فات لحد نهاية المهرجان يوم 6 ديسمبر. مش بس الأفلام، كمان الندوات والفعاليات الثقافية اللي على هامش المهرجان. وبـ نفكركم أن فيه أفلام مصرية مميزة مشاركة في مسابقات المهرجان زي «الشتا اللي فات» للمخرج إبراهيم البطوط، وفيلم «مصور قتيل» لكريم العدل وبطولة إياد نصار، وأفلام وثائقية عديدة منها «البحث عن النفط والرمال». الأفلام بـ تعرض أكثر من مرة في قاعات ومسارح مختلفة. تابعوا مواعيد العروض من موقعنا حتى نهاية المهرجان.
من المعارض الفنية القيمة اللي ممكن تحضرها الأسبوع ده معرض الفنانة زينب محمود في مركز أرثروبولوجي في الزمالك، المعرض بعنوان "النوبة" وهو مفتوح كل يوم الساعة 10 صباحاً ماعدا الأحد.
الليلة دي الخميس هـ يكون فيه حفل غنائي لشيرين عمرو عازفة جيتار ومغنية فريق Massive Scar Era لموسيقى الروك. الحفل في مركز صوفي بالزمالك، وأكيد هـ تقدم أغنيتها المشهورة "أبعد مكان".
وفي ساقية الصاوي في قاعة الحكمة الليلة دي وبعد يوم واحد من حفل والده الفنان علي الحجار، هـ يقدم أحمد الحجار على نفس المسرح حفل غنائي بمصاحبة فرقته. الحفل المرة دي مختلف ويتضمن موسيقى عربية وأغاني أصلية من تأليف أحمد نفسه. التذكرة بـ 15 جنيه والحفل يبدأ الساعة 8 مساءً.
يوم الجمعة هـ يبقى فيه حفلة أو نقدر نقول كرنفال ألوان وموسيقى في الحديقة الدولية بمدينة نصر، فرقة بلاك تيما هـ تحيي اليوم ومعاها دي جي كارلوس نجم إذاعة نايل إف إم. التذاكر بـ 50 جنيه وفيه أوتوبيسات ممكن تنقلك وترجعك من مكان الحفل وتدفع 20 جنيه زيادة.
هاني عادل نجم فريق وسط البلد والممثل المتألق مؤخرًا هـ يقدم حفل أغاني أكوستك على الجيتار في قاعة الحكمة في ساقية الصاوي يوم الجمعة الساعة 8 مساءً. التذكرة بـ 35 جنيه ويفضل الحجز بدري علشان هـ تبقى زحمة.
أفريكايرو مهرجان خاص بكل فنون وثقافات أفريقيا وبـ يتضمن عروض فنية وورش عمل ومعارض وغيرها. في قاعة النهر بساقية الصاوي هـ يكون فيه يوم الجمعة يوم أفريقي متكامل ضمن فعاليات المهرجان. فرق موسيقية وحرف يدوية ورقص وتحضير طعام أفريقي. ما تفوتش اليوم ده واحجز تذكرتك النهاردة. الدخول بـ 30 جنيه من الساعة 5:30 مساءً.
يوم الجمعة على مسرح أوبرا جامعة مصر للعلوم والتكنولوجيا MUST هـ يكون فيه حفل للفنان صبحي بدير والأصدقاء ومجموعة من أشهر الأغاني العالمية. التذاكر بـ 40 و50 جنيه جنيه والدخول الساعة 8 مساءً.
فرقة تالتة تالت هـ تلعب بكره في أفتر 8 والحد الأدنى للطلبات هـ يبقى 100 جنيه. الفرقة بـ تقدم أغاني مصرية أصلية وموسيقى شرقي فريدة من نوعها. اللي ما شافش الفرقة دي لازم يشوفها.
يوم الجمعة في مركب السراي في الزمالك بازار دكاكين بـ ينظم معرض تسوق بطابع شرقي "ليالي عربية" هـ يكون فيه عروض حية للتنورة والفرق الموسيقية ورسوم الحنة. اتصل واعرف شروط الحضور واحجز مكانك من دلوقت.
مع بداية شهر ديسمبر هـ يبقى فيه بازارات ومعارض كثيرة لكل ما يخص احتفالات الكريسماس والعام الميلادي الجديد، تابعوا أجندة الموقع واعرفوا مواعيدها وأماكنها. ونشوفكم على خير الأسبوع اللي جاي.
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
29/11/2012
-