دليل كايرو 360 لبازارات هدايا ومستلزمات الكريسماس - الحياة في كايرو Feature - كايرو 360
 







دليل كايرو 360 لبازارات هدايا ومستلزمات الكريسماس
دليل كايرو 360 لبازارات هدايا ومستلزمات الكريسماس
اصدرت في: 12/12/2012
سنة 2012 عدت، بحلوها ومرها عدت، ومع بدايات شهر ديسمبر من كل سنة بـ تنتشر حمى البازارات واستعدادات حفلات الكريسماس، في كل بقعة في كايرو رصدنا بازار مستمر لعدة أيام أو ليوم واحد، متخصص في بيع وعرض كل ماله علاقة بالكريسماس واحتفالات السنة الجديدة، وعملنا الدليل المكتوب ده علشان يسهل عليكم معرفة ميعاد ومكان كل بازار، وبـ ننشره قبل كل حدث بشكل كافي علشان تلحقوا تحجزوا أماكنكم لأن معظمها محتاج حجز مسبق.
أول بازار كان تم افتتاحه من أول يوم في شهر ديسمبر وهو مستمر لحد يوم 31 ديسمبر، بازار كريسماس المعادي «Eins»؛ ده اسمه، ومكانه في 24 شارع أحمد كامل في المعادي الجديدة، ولو حد مش عارف إيه هو البازار أو إيه نوع المعروضات اللي بـ تكون فيه، هـ نعطي لكم فكرة، البازار ده زي معرض تسوق بـ يكون الدخول فيه بحجز مسبق أو بـ تكون الدعوة عامة، وبـ يتم عرض منتجات لها علاقة بمناسبة معينة وممكن على هامش المعرض يكون فيه حفلات أو أكلات تقدم للضيوف، وكل بازار بـ يبقى له القواعد الخاصة به. وبازار Eins فيه حلي خاصة بالكريسماس، ومصنوعات يدوية، وأزياء وشالات وإيشاربات وشنط، وإكسسوارات منزلية وزفاف كمان، وديكورات وإضاءات، ومجوهرات يدوية مصرية الصنع، وإكسسوارات نحاسية، وملابس وأخيرًا أدوات مطبخ.
يوم الجمعة 14 ديسمبر هـ يبقى فيه أكثر من بازار لمدة يوم واحد كامل من أوله لآخره أو ليومين متتاليين، وفي أماكن مختلفة. في مول العرب في مدينة 6 أكتوبر هـ يبقى اسمه كرنفال الكريسماس، وده هـ يبقى فيه بعض المعروضات اللي ذكرناها فوق وزيادة عليهم لعب أطفال. وهـ يبقى فيه فقرات فنية ومزيكا. وده هـ يبقى يومي الجمعة والسبت.
وفي مدرسة نارمر أمريكان كوليدج في حي النرجس بالتجمع الخامس هـ يكون فيه بازار برضه يوم الجمعة وده متخصص في هدايا ومقالب الكريسماس.
وواحد ثالث في نفس اليوم خاص بمدرسة الجيزويت "بيتيت كوليدج". وده هـ يبقى في طريق صلاح سالم جنب فندق ميريديان هليوبوليس، وهـ يبدأ الساعة 11 صباحًا.
وفي وسط النيل وعلى ظهر مركب إمبريال في الزمالك هـ يكون فيه بازار ومعرض "ليلتي" لمدة يوم كامل من الساعة 11 صباحًا للساعة 11 مساءً. المركب أمام بوابة نادي الجزيرة الرئيسية والحجز هنا ضروري.
وممكن تعدي الشارع وتدخل نادي الجزيرة وتحضر بازار ثاني أجواءه كاجوال شوية وفيه برنامج ترفيهي على مدار اليوم، وبالمناسبة ده أول بازار كريسماس في نادي الجزيرة.
يوم هائل لكل العائلة في احتفالية شتاء 2012 في مدارس مصر للغات بطريق القاهرة/ الفيوم. كان مقرر له يقام يوم الجمعة 14 دسيمبر برضه لكن تم تأجيله لمنتصف يناير لدواعي أمنية. بس ممكن تتابعوا صفحة الحدث من على الفيسبوك وتعرفوا الميعاد الجديد، المهم ما يفوتكوش. اليوم فيه منطقة للأطفال بكل الألعاب والأنشطة، بازار مليان هدايا وحاجات حلوة كثير خاصة بالكريسماس، منطقة طعام فيها كل أنواع الأكل، وكمان وسائل تسلية مالهاش حدود، الدخول مقابل تبرع 20 جنيه والأطفال أقل من 6 سنين مجانًا.
يوم السبت 15 ديسمبر فيه 3 بازارات جديدة، أولها الخاص بالمدرسة الأمريكية الدولية بالتجمع الخامس، وبالتحديد داخل الفيستفال سيتي.
والثاني في ديزاينوبليس في طريق مصر الإسكندرية الصحراوي بعد البوابات مباشرة. وده بعنوان سوق القاهرة أو Flea Market وهـ يبقى فيه أنتيكات وحرف يدوية وإكسسوارات مصنوعة في البيت. احجز مكانك.
الثالث في مركب لو باشا في الزمالك بعنوان "Le Blanc"، اشتري هدايا الكريسماس من هنا بمساعدة مؤسسة ماك والسوق. تاسع حدث لمساعدتك في شراء مستلزمات الكريسماس. مجوهرات وإكسسوارات منزلية وملابس وكب كيك وحاجات ثانية كثير.
في مول داون تاون في التجمع الخامس يوم 21 ديسمبر هـ يكون فيه بازار واحتفالية كبيرة بمناسبة اقتراب أعياد الكريسماس والسنة الجديدة، من الساعة 1 ظهرًا لحد الساعة 9 مساءً. ما تفوتش اليوم ده خصوصًا لو كنت ساكن قريب من القاهرة الجديدة أو القطامية.
كده إحنا غطينا كل كايرو وممكن أي حد ساكن في أي حتة يلاقي بازار قريب منه، المهم تحتفلوا بالكريسماس وتغيروا الموود شوية. ويارب السنة الجديدة تبقى أحسن بكثير من اللي خلصت دي. استمتعوا..
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
12/12/2012
-