دليل أحداث نهاية الأسبوع: كسارة البندق وتالتة تالت ونيـﭭين علوبة وفرقة بساطة - الحياة في كايرو Feature - كايرو 360
 







دليل أحداث نهاية الأسبوع: كسارة البندق وتالتة تالت ونيـﭭين علوبة وفرقة بساطة
دليل أحداث نهاية الأسبوع: كسارة البندق وتالتة تالت ونيـﭭين علوبة وفرقة بساطة
اصدرت في: 20/12/2012
أهلًا بكم في ويك إند جديد وإن شاء الله يكون سعيد ومفيد للكل. الأسبوع ده هو الأسبوع اللي بـ يسبق احتفالات الكريسماس الرسمية، ورغم كده فيه عدد من الأحداث الثقافية والفنية المرتبطة بالكريسماس والعام الجديد اللي هـ تلاقونا كاتبين عنها في أجندة الموقع الأسبوع ده. خاصة البازارات الخاصة بمستلزمات الكريسماس وحفلات أغاني رأس السنة اللي بـ تبدأ مع بداية شهر ديسمبر. لكن الأسبوع ده هـ نركز على شوية حفلات ظريفة مالهاش دعوة بالسنة الجديدة خالص.
نبدأ بالنهارده الخميس وحفل أكيد هـ يكون رائع لفرقة بساطة في ساقية الصاوي في قاعة النهر. الفريق حقق نجاح منقطع النظير في السنتين اللي فاتوا وأصبح من أهم وأجمل فرق الأغاني المصرية المعاصرة وأكثرها جماهيرية. التذاكر بـ 30 جنيه و20 جنيه وقوف. والحفل يبدأ الساعة 8:30 مساءً.
قعدة عربي ما حصلتش في جو من الروحانيات في قصر الأمير طاز واستمتع بأجمل ألحان الراحل العبقري فريد الأطرش في احتفالية بمناسبة ذكراه. الحفل يبدأ الساعة 8 مساءً ويحييه الفنان أسامة الشريف.
والليلة دي كمان ممكن تسمع فرقة وسط البلد في كايرو جاز كلوب. الحجز ضروري طبعًا في كايرو جاز.
رحلة ما بعد الثورة بـ يصورها هشام الزيني في معرضه بعنوان الإقلاع والهبوط، كأنها رحلة طيران بـ تتعرض لظروف طارئة، وبـ تبقى الرؤية شبه معدومة في ظروف جوية صعبة، بـ تتلون بألوان العلم المصري. المعرض مقام في جاليري المشربية ومستمر لحد يوم 17 يناير القادم.
على المسرح الكبير بدار الأوبرا المصرية وعلى مدار 4 أيام بدءًا من النهارده ممكن تتفرج على باليه كسارة البندق العالمي بقيادة المايسترو ناير ناجي وإخراج عبد المنعم كامل. الحفل يبدأ الساعة 8 مساءً والدخول بالملابس الرسمية. التذاكر متوفرة بشباك الحجز.
معرض ثاني في معهد ثربانتس القاهرة هو معرض أنماط لاتينية واللي تم افتتاحه في 2 ديسمبر اللي فات. يحتوي على نماذج خطوط من عدد من دول أمريكا اللاتينية. ومن ضمن فعاليات المعرض محاضرة بعنوان "أنماط الخطوط في أسبانيا وأمريكا اللاتينية.. تحديات من أجل عالم واحد"، يشارك دكتور محمد حمزة عميد كلية أثار جامعة القاهرة بمداخلة تحت عنوان "الإبهار في الخط العربي". معرض حلو وجدير بالزيارة.
يوم الجمعة فيه حفل لفرقة فرضت نفسها بقوة على الساحة مؤخرًا بعد إذاعة أول كليب لهم على القنوات الفضائية ومحطات الراديو. هم تالتة تالت اللي بـ تقدم أغاني مصرية بطابع غربي مميز. مطرب الفريق صوته حلو ولائق جدًا على الستايل اللي بـ يقدموه. وأغنية "الحلم في دفتر مقفول" هي العلامة المميزة للفريق اللي خلت ناس كثير تدور عليهم وتحاول تعرف مين اللي بـ يغنيها. 3-3 هـ يلعبوا بكره في أفتر 8 في وسط البلد. احجز مكانك دلوقت.
الحفلة الوحيدة اللي لها علاقة بالكريسماس معانا الأسبوع ده هي حفلة السوبرانو نيفين علوبة على المسرح الصغير بدار أوبرا القاهرة، والسوبرانو هي كلمة إيطالية بمعنى الصوت الأعلى تردد بين النساء، ونيفين علوبة غنية عن التعريف طبعًا. التذاكر متاحة في شباك الحجز.
للمرة الثانية مجموعة S&M بـ يعملوا يوم مفتوح علشان تختاروا وتشتروا كل اللي أنتم عاوزينه من شنط، وإكسسوارات وملابس وأحذية وبجودة عالية جدًا، لو عاوزين تعرفوا أكثر ممكن تتصلوا على الأرقام دي 01018885419 أو 01005087418. والحدث هو مهرجان تسوق ليوم واحد خلف مسجد القوات المسلحة في مدينة نصر.
دينا الوديدي صاحبة الصوت القوي والأغاني الفولكلورية والأصلية المميزة هـ تقتسم برنامج كايرو جاز كلوب مع فريق صحرا الفريد من نوعه يوم السبت بالليل. الحجز ضروري دائمًا في كايرو جاز.
دي كانت أحلى الحاجات في رأينا اللي حبينا نرشحها لكم الأسبوع ده علشان تشوفوها، لكن أكيد فيه حاجات ثانية حلوة ممكن تتعمل في الويك إند. كم هائل من المعارض والندوات والحفلات هـ تلاقوها على أجندة الموقع، تابعونا تجدوا ما يسركم.
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
20/12/2012
-