دليل أحداث نهاية الأسبوع: نيوبرد وهاي أون بادي فات وفنون حركية ومونودراما - الحياة في كايرو Feature - كايرو 360
 







دليل أحداث نهاية الأسبوع: نيوبرد وهاي أون بادي فات وفنون حركية ومونودراما
دليل أحداث نهاية الأسبوع: نيوبرد وهاي أون بادي فات وفنون حركية ومونودراما
اصدرت في: 17/01/2013
هو إيه اللي يخلي أسبوع عن أسبوع مختلف غير أننا بـ نكتب لكم مواضيع جديدة ودليل أسبوعي للأحداث الثقافية قبل الويك إند! تقريبًا دي أكثر حاجة بـ تميز الأيام عندنا في كايرو 360 وبـ تخلينا نحس أن الحياة مش مملة وأن الأيام مش شكل بعضها، علشان كده بـ ننتظر يوم الخميس اللي بـ نطلع فيه الدليل ده بفارغ الصبر مش بس علشان الأجازة اللي بعده لكن كمان علشان التواصل المباشر اللي بـ يحصل بيننا وبين القراء من خلال اقتراحاتنا للخروجات واستقبال اقتراحاتكم عن الأحداث المختلفة.
الأسبوع ده فيه عدد كبير من الأحداث اللي ممكن نحضرها بعكس الأسبوعين اللي فاتوا. بدأت عجلة الأحداث والنشاطات تدور من ثاني في 2013 ورصدنا لكم أكثرهم أهمية من وجهة نظرنا المتواضعة.
الليلة دي ممكن تسمع فرقة وسط البلد في كايرو جاز كلوب وعودة لبرنامج يوم الخميس اللي اشتهروا به في المكان، وقبل وسط البلد هـ يكون فيه عرض لفرقة كريم حسام اللي بـ تقدم أغاني فيوجن جاز، وكريم قبل كده كان في فرقة "فوق السطوح" وحاليًا هو بـ يقدم موسيقته الأصلية مع أفراد مختلفين وتحت اسم مختلف.
ولهواة الفنون الحركية والرقص، دار الأوبرا على المسرح الكبير هـ تقدم عرض لفرقة فرسان الشرق للأداء الحركي، العرض بعنوان "اسمها ناعسة" والعرض مستمر لمدة 4 أيام وبـ يبدأ الساعة 8 مساءً، التذاكر متوفرة عند شباك الحجز.
من منطق معماري ويقين صوفي وحنكة مخرج مسرحي وحكمة كاهن فرعوني يجسد الفنان سيد سعد الدين مجموعة من الموضوعات الاجتماعية والمجتمعية في معرضه "تأملات ومشاهد" في جاليري الكحيلة. المعرض تم افتتاحه يوم الاثنين 14 يناير ومستمر حتى يوم 28 يناير اللي جاي وهو مغلق يوم الجمعة.
للأسبوع الثاني على التوالي وعلشان اللي فاتته الحفلة الأسبوع اللي فات، هاي أون بادي فات هـ يكونوا معاكم في فوتوبيا الليلة دي وخليط ظريف من الموسيقى والكوميديا يختلطوا مع بعض، ما تفوتوش سهرة ضحك بضمان فوتوبيا، رسم الدخول 20 جنيه.
يوم السبت في ساقية الصاوي هـ تقدم فرقة خربشة المسرحية عرض مونودراما بعنوان "عفوًا هاملت" عن رائعة شكسبير وده هـ يكون في قاعة الحكمة، سعر التذكرة 10 جنيه لأعضاء ولغير أعضاء الساقية، وللتعريف المونودراما هي أحد أشكال المسرح التجريبي وتقوم على ممثل واحد يسرد الحدث عن طريق الحوار.
وعودة للنشاط الشتوي لعروض التنورة اللي بـ تحصل أيام السبت والاثنين والأربعاء من كل أسبوع في وكالة الغوري بمنطقة الأزهر. ممكن يحضر يوم السبت ده واحد من العروض اللي بـ تبدأ الساعة 8 مساءً.
وفي درب 17 18 في الفسطاط تقام حفلة للمغنيين راشيل ستار، وسيزار كيه من لبنان ومن مصر هادي طارق للاحتفال بإطلاق الألبوم الثاني لـ نيوبرد Neobyrd بعنوان "الملك مات - The King Is Dead". نيوبرد بـ يقدم موسيقى إلكترونية وحقق نجاح في نوع الموسيقى اللي بـ يقدمها. تذاكر الحفل متاحة في فروع فيرجين ميجا ستور.
الأسطول هو لقب للمطرب أحمد عز المغني الرئيسي لفريق صحرا، وهو المرة دي نازل مع فرقته اللي بـ تحمل لقبه "الأسطول" في كايرو جاز كلوب يوم السبت، وبعدهم عرض لفرقة سلالم الغنية عن التعريف. الحجز ضروري قبل ما تروحوا.
تابعوا أجندة كايرو 360 لمزيد من الأحداث والحفلات والندوات والمعارض والأفلام والمسرحيات والكرنفالات والمهرجانات وأي حاجة ثانية إحنا نسينا نقولها هنا. أجازة سعيدة.
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
17/01/2013
-