دليل أحداث نهاية الأسبوع: ذكرى أم كلثوم وسينما الساقية ومعارض فنية ومشروع المريخ - الحياة في كايرو Feature - كايرو 360
 







دليل أحداث نهاية الأسبوع: ذكرى أم كلثوم وسينما الساقية ومعارض فنية ومشروع المريخ
دليل أحداث نهاية الأسبوع: ذكرى أم كلثوم وسينما الساقية ومعارض فنية ومشروع المريخ
اصدرت في: 07/02/2013
مساء الخير ويارب تكونوا بخير. عدى أسبوع هادئ نسبيًا على مصر وحماستنا بـ ترجع بشكل تدريجي للنزول والتجول في شوارع القاهرة وكتابة مواضيع جديدة واكتشاف أماكن جديدة، وبالتبعية بـ ندعوكم للنزول وحضور كل حاجة بـ نرشحها لكم أو حتى مش بـ نرشحها، المهم أنكم تنزلوا وتغيروا الموود أول بأول.
الشوارع هـ يبقى شكلها مختلف شوية الويك إند ده لأن أجازة نصف العام خلصت أو على وشك وهـ يبقى فيه شوية روقان في الشوارع كل ما الوقت يتأخر. وحتى نوعية الأحداث الثقافية اللي هـ نتكلم عنها النهارده كلها حاجات في الهادئ وفيه عدد قليل من الحفلات أو الخروجات المناسبة للشباب والسن الصغير، والمعارض هي سيدة الموقف الأسبوع ده.
نبدأ بالنهارده الخميس ونقول لكم على عدد من المعارض اللي فتحت في الأيام اللي فاتت ولا تزال متاحة للجمهور في أماكن مختلفة. معرض في الذكرى الثانية للثورة المصرية في مركز 6 للفنون المعاصرة بـ يعرض أعمال تظهر التغير في التركيبة المصرية من القرن الـ 19 لغاية دلوقت. المعرض بعنوان "المحروسة" ومركز 6 للفنون موجود في الزمالك في 6 شارع صلاح الدين.
وفي قاعة بيكاسو للفنون ممكن تحضر معرض لأعمال الفنان التشكيلي حسن عبد الفتاح أستاذ التصوير والدراسات العليا بكلية الفنون الجميلة بالقاهرة والأقصر وعميد كلية الفنون الجميلة بالأقصر، شارك الفنان في الحركة الفنية المصرية من 1963 وأسس كلية الفنون الجميلة بالأقصر جامعة جنوب الوادي.
معرض ثالث في جاليري المشربية وهو الأول للفنان رامي الدوزي، الأعمال استوحاها من فترة 6 شهور قضاها في منطقة أرض اللوا، بـ يهدف لتوضيح الاختلاف بين المعروف وتبرير المجهول، الافتتاح كان من حوالي أسبوعين وهو مستمر لحد يوم 14 فبراير، والجاليري مغلق أيام الجمعة.
الليلة دي نروح لحفلات كايرو جاز كلوب وفرقة إنفنيتي وأغاني فيوجن جاز ويبدأ بعدها فريق ديجا فو بألوان موسيقى البلوز والبوب في سهرة نهاية الأسبوع، احجز مكانك بسرعة بالتليفون.
في جاز مايت Jazz Mate سهرة جاز للمغنية المجرية صوفيا بالوغ مع عازف البيانو يوسف صديق وضيف الحفلة هـ يكون رامي صديق، حد أدنى للطلبات 50 جنيه.
وفي محاولة لتوثيق مشوار وقصة كوكب الشرق أم كلثوم وبمناسبة ذكراها السنوية، ينظم متحف أم كلثوم بقصر المانسترلي بالمنيل مهرجان فن الكوميكس واللي بـ يشارك فيه طلبة مدارس وأطفال مراكز الإبداع المختلفة من خلال الكوميكس اللي بـ يعتمد على السرد القصصي بواسطة الكوادر المصورة. الدخول متاح للجميع، وممكن تتصل وتعرف مواعيد المتحف.
عروض سينما الساقية مستمرة والنهارده فيه عرض لفيلم Tinker Bell الكرتوني الشهير في قاعة النصيب والفيلم مدبلج باللغة العربية. والدخول مجاني لأعضاء الساقية.
بكرة الجمعة بمشاركة مجموعة كبيرة من الممثلين والموسيقيين مشروع المريخ بـ يعطي لكم الفرصة علشان تغنوا وتقدموا أي نوع من أنواع العروض في درب 17 18. روح سجل اسمك قبل ميعاد بدء العرض بساعة واعرض موهبتك على الجميع.
وفي نفس التوقيت ممكن تحضر حفل السوبرانو إيمان مصطفى اللي هـ تقدم مقطوعات أوبرالية وشرقية على المسرح الصغير بدار أوبرا القاهرة، التذاكر متاحة لدى شباك الحجز، وسوبرانو هي كلمة إيطالية تعني الأصوات النسائية اللى لها أوكتاف عالي.
ويوم السبت هـ تقدم فرقة التنورة عروضها في وكالة الغوري، لهواة الفنون والتراث الشعبي، بـ تقدم العروض بمصاحبة الآلات الشعبية زي الربابة، والمزمار والطبلة ويصاحب الرقص منشد شعبي يعتمد على التلقائية والإنشاد الديني، ومن عناصر عرض رقص التنورة اللفيف وهو الراقص اللي بـ يحيط به مجموعة من الراقصين بآلة المزهر الإيقاعية المعروفين باسم الحناتية، تُقام عروض التنورة في أيام السبت والاثنين والأربعاء من كل أسبوع والدخول مجانًا.
انتهى معرض الكتاب من يومين، والدوري العام لكرة القدم رجع ثاني بعد غياب سنة، وقريب هـ يبقى فيه مهرجان ضخم للموسيقى المستقلة هـ ننقل لكم كل تفاصيله، يعني الحياة ماشية، ببطء بس ماشية، ومن أجندة الموقع ممكن تلاقي حاجات كثير تعملها وأماكن تروحها، يا ريت ما نفقدش الأمل أو بمعنى أدق ما نفقدش الرغبة فى الحياة. نشوفكم على خير..
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
07/02/2013
-