Sweetyheaven.com: كافئوا أولادكم بشكل جديد - الحياة في كايرو Feature - كايرو 360
 







Sweetyheaven.com: كافئوا أولادكم بشكل جديد
Sweetyheaven.com: كافئوا أولادكم بشكل جديد
اصدرت في: 18/02/2013
لما الواحد بـ يفتكر الحاجات اللي كانت بـ تبسطه وهو صغير واهتماماته واللعب اللي كان بـ يحبها والطريقة اللي تربى بها ويشوف أولاده، بـ يحس بفرق شاسع وأنه فعلاً كل وقت وله أذانه. سارة جلال أم شابة مصرية عندها بنت جميلة اسمها هادية عمرها 3 سنين. سارة لاحظت اهتمام هادية بالإنترنت والتكنولوجيا ولاحظت الفجوة اللي بدأت تظهر بين جيل الآباء والأبناء ومن هنا جاءت فكرة مشروعها هي وزوجها محمد بادره "سويتي هيفن" أو sweetyheaven.com.
سارة بـ تشرح لنا فكرة المشروع وبـ تقول: "قررنا أننا من خلال الإنترنت نفسه نحاول نزود التواصل والترابط بيننا وبين أطفالنا. الفكرة ببساطة أننا هـ نحط هنا كل حاجة طفلك ممكن يبقى نفسه فيها. لعب على الكمبيوتر أو لعب تيجي له لحد البيت أو أي حاجة نفسه فيها بحيث يبقى "سويتي هيفن" فعلاً الجنة اللي الطفل بـ يحلم بها. ولما الطفل هـ يبقى نفسه في حاجة هـ يطلب منك تشتريها له. لحد هنا والموضوع شكله عادي جدًا. فين بقى الحل السحري؟ الفكرة أن الطفل علشان يشتري الحاجات دي مش هـ يدفع فلوس، لكن هـ يدفع بالونات، هـ يكون محطوط أمام كل لعبة أو هدية سعرها كام بالونة وأنت اللي هـ تعطي ابنك أو ابنتك البالونات كل ما يعمل تصرف كويس أنت اللي تحدده.
نفترض مثلاً أن ابنك نفسه في عربية ومحتاج يجمع لها 80 بالونة. أو ابنتك نفسها قوي في العروسة اللي محتاجة منها 60 بالونة. هـ تحدد لطفلك مجموعة مهمات يعملها -مثلاً يغسل أسنانه، يرتب حجرته، يخلص الواجب أول ما ييجي من المدرسة.. إلخ- وكل مهمة من دول تحدد لها مجموعة بالونات مكافأة. وبمجرد ما الطفل يكمل عدد البالونات اللي محتاجها هـ يلاقي الهدية بتاعته جاءت له لغاية باب البيت.
ومن خلال العملية كلها هـ تقدر تخلي طفلك يقضي على الإنترنت وقت أقل ويكون له أنشطة أكثر في الواقع ويبقى فيه بينكم تواصل أكثر ومواضيع مشتركة من أول ما يختار اللعبة اللي نفسه فيها لحد ما توصل له الهدية عند باب البيت ملفوفة بشكل جذاب، والأهم من ده أنك هـ تعلم ابنك أو ابنتك إزاي يعتمد على نفسه ويخطط كويس ويبذل مجهود علشان يحقق هدفه، هـ يتعلم أنه دائمًا يبص للأمام، ويفكر في نتيجة اختياراته، ومع كل هدية بـ توصله ثقته في نفسه هـ تزيد."
الموقع مش بس بـ يعلم الطفل أنه لما يعمل تصرفات كويسة هـ يتكافئ عليها، الموقع كمان بـ يعلمه أنه يبقى عنده أهداف يحققها و to-do-listلها وقت محدد علشان تخلص وده بـ يعلم الأطفال احترام الوقت والتنظيم. الطفل كمان لما يكبر يقدر يشوف كل إنجازاته اللي حققها مع سويتي هيفن وده بـ يخليه واثق في نفسه وحاسس أنه طفل إيجابي. بعد ما الطفل يحقق المهام إللي أهله طالبينها بـ توصله الهدية اللي اختارها وقدر يوصلها ومعاها شهادة من الموقع وده علشان يحس بالقيمة المعنوية للي عمله مش بس القيمة المادية.
الموقع بـ يتكون من عدة أقسام مختلفة. أول قسم هو محل اللعب وده اللي معروض فيه الألعاب المختلفة اللي الأب والام ممكن يكافئوا الطفل منها. الميزة أن الألعاب مُصنفة بكذا تصنيف منهم تصنيف على حسب السعر وده مفيد في أن الأب والأم يقدروا يختاروا range الهدايا اللي عاوزينها تظهر لأولادهم وبالتالي مش هـ يحصل أن الطفل يتمنى لعبة فوق إمكانيات الأب والأم.
القسم الثاني هو ركن الآباء وده قسم عبارة عن مقالات ونصائح بـ يحررها فريق Sweety Heaven وكمان ممكن أن الأبناء يدخلوا بنفسهم ويفضفضوا سوا أو يحكوا تجربتهم مع الموقع. بعد كده هـ نلاقي قسم "كيف يعمل" وده اللي بـ يشرح التسلسل المفترض اتباعه علشان الآباء يقدروا يطبقوا الفكرة مع الأبناء.
تقدروا تزوروا الموقع أو صفحتهم على الفيسبوك.
مزيد من الصور
  • Sweetyheaven.com: كافئوا أولادكم بشكل جديد
  • Sweetyheaven.com: كافئوا أولادكم بشكل جديد
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
شيماء الجمال
حرر بواسطة:
شيماء الجمال
تاريخ النشر:
18/02/2013
بـ تقضي وقتها ما بين الكتابة والعيال والمطبخ وشراء طلبات البيت.. مهتمة بشكل خاص بالكتابة عن كل ما يخص الأم والطفل، بـ تحب الكب كيك زي ما بـ تحب أولادها بالضبط، بـ تعتبر الإنترنت هو الصديق الأوفى في الحياة.