دليل كايرو 360 للتحرك في طرق وشوارع القاهرة وقت المظاهرات والمسيرات - الحياة في كايرو Feature - كايرو 360
 







دليل كايرو 360 للتحرك في طرق وشوارع القاهرة وقت المظاهرات والمسيرات
دليل كايرو 360 للتحرك في طرق وشوارع القاهرة وقت المظاهرات والمسيرات
اصدرت في: 05/03/2013
لما أصبحت المظاهرات والمسيرات والاعتصامات وما يصاحبها من قطع طرق وتعطيل مرور أو إبطائه من سمات حياتنا اليومية في العاصمة وباقي المحافظات، لاقينا أن من واجبنا كدليل للحياة في القاهرة أننا نساعد قرائنا على تفادي مشكلة المرور بسبب التجمعات وغلق الطرق، أو على الأقل الحد من آثارها بمحاولة شرح طرق بديلة ممكن اللجوء لها في حال تعثر سير المركبات في الطرق الرئيسية. وأكيد كل واحد فينا له مصلحة هـ يحتاج يقضيها في أوقات المظاهرات وفي وسط كل الزخم والأحداث الساخنة اللي بقيت شكل روتيني للحياة في مصر من أكثر من سنتين فاتوا، وأصبح على الناس التكيف مع الوضع والتعامل معاه كأمر واقع لحد ما ترجع الأمور لطبيعتها في يوم من الأيام ويرجع الشارع ملكية عامة تستخدمه وسائل النقل والمواصلات ليس إلا، ويرجع الرصيف للمواطنين المشاة مش للباعة الجائلين والفرشات.
يوم الجمعة هو اليوم الأصعب من حيث المسيرات اللي تقريبًا بـ تشمل كل مناطق القاهرة والجيزة وشوارعها الرئيسية، وبمجرد ما تقرأ في الصحف أو تشوف في برنامج تليفزيوني خريطة تحرك المسيرات من المساجد المختلفة ونقاط التقائها ونقاط نهايتها هـ تتخيل أن شوارع العاصمة كلها هـ تبقى مغلقة ومش هـ يبقى فيه موطئ لقدم "مش عربية" في أي من الشوارع الرئيسية المذكورة في خريطة المسيرات. لكن الحقيقة أنت تقدر تتحرك بقدر عالي من السلاسة في أوقات بعينها وفي شوارع موزاية للشوارع اللي فيها مسيرات بشرط أنك تبقى عارف تمشي فيها إمتى وهـ توصلك لحد فين.
عادة المسيرات بـ تبقى نقطة نهايتها ميدان التحرير أو قصر الاتحادية في مصر الجديدة، بـ تنطلق من مساجد مصطفى محمود في شارع جامعة الدول العربية، ومن دوران شبرا لشارع الجلاء للتحرير، ومن السيدة زينب لشارع القصر العيني للتحرير. أما المسيرات اللي بـ توصل في النهاية لقصر الاتحادية بـ تخرج من التحرير لدار القضاء العالي ثم ميدان رمسيس بمسجد الفتح، لغمرة والعباسية ومسجد النور، وبـ تقابل هناك مسيرات قادمة من شارع بورسعيد والسيدة عائشة ومنشأة ناصر وبـ تمشي بعد كده في شارع الخليفة المأمون لحد القصر الجمهوري من مدخل شارع الميرغني. مسيرات من مسجد رابعة العدوية "طريق النصر" وأخرى من مساكن شيراتون مرورًا بالألف مسكن تصل ميدان الحجاز ثم المريلاند ومنها للاتحادية، وأخيرًا مسيرات من ميدان المطرية والزيتون تصل روكسي في مصر الجديدة.
أحيانًا بـ يتم الإعلان عن مسيرات من منطقة عرب المعادي وميدان الحرية بـ تمشي على كورنيش النيل وصولًا للتحرير، وأحيانا من ميدان الجيزة مرورًا بالدقي وتصل للتحرير، في النهاية إحنا حبينا نوضح أن مافيش مكان ما تمش تغطيته من قبل المتظاهرين في محاولة لتشجيع –وأحيانًا إجبار- سكان المناطق المختلفة على المشاركة في الفعاليات الثورية. لكن بالرغم من كده تفضل هناك طرق للسير وقضاء المصالح هـ نقولها لكم حالًا.
يبقى الطريق الدائري هو الحل السحري لكل المشاوير في أوقات التظاهرات، نادرًا ما يتم قطع أو تعطيل الطريق الدائري. لو كنت في القاهرة الجديدة أو المعادي أو المقطم ممكن تستخدم دائري القطامية للوصول لمناطق كورنيش النيل ومنها لوسط البلد، أو المنيب ومنها للجيزة، وفي الاتجاه الآخر ناحية طريق السويس والرحاب أو لمساكن شيراتون أو لمدينة السلام والمرج وما بعدها. أو تستخدم نزلة الأوتوستراد ومنها لميدان السيدة عائشة والأباجية والقلعة ومدينة نصر أو إلى طرة وحلوان. طريق الأوتوستراد كمان من أكثر الطرق حيوية ومش بـ يتعطل إلا في أضيق الحدود، وقت التجمع أمام مسجد رابعة العدوية أو بالقرب من منطق السيدة عائشة، وده بـ يبقى في الوقت من الساعة 2 إلى 3 عصرًا أيام الجمعة، وكثافة المتظاهرين مش بـ تبقى عالية قوي في المسيرات يعني ممكن المركبات تتحرك وسطها بشكل بطئ.
طريق صلاح سالم بـ يبقى شغال ومش بـ يتعطل نهائيًا إلا بالقرب من القصر الجمهوري بمنطقة الكوربة في الاتجاه القادم من ناحية القلعة، ولأوقات قصيرة جدًا خلال اليوم، غالبًا قبل الساعة 4 عصرًا. لكن بداية من كوبري المطار اللي بـ يودي على مساكن شيراتون الطريق بـ يبقى ممتاز.
يبقى كده أكبر 3 محاور في العاصمة شغالين بنسبة 85 % في ذروة المسيرات. فاضل مداخل الأحياء والمناطق اللي مش قريبة من المحاور دي. شارع البحر الأعظم مثالي لو عاوز تدخل الدقي ومنه للعجوزة والمهندسين. نفق الأزهر بديل جيد جدًا من وسط البلد لمدينة نصر ومصر الجديدة والعكس، خاصة لو فيه مسيرات على كوبري أكتوبر، أو لو تم قطعه من أعلى ميدان عبد المنعم رياض زي ما بـ يحصل مؤخرًا. ممكن تستخدم كوبري أكتوبر من صلاح سالم أو طريق النصر لحد نزلة رمسيس أو شبرا أو العكس لأن نادرًا ما بـ يتم تعطيل الكوبري في الجزء ده. بالنسبة لمصر الجديدة، شارع أبو بكر الصديق اللي بـ يمشي فيه ترام مصر الجديدة بـ يبقى فاضي ويسمح بمرور السيارات حتى لو فيه مسيرات، وممكن توصل من خلاله لكل ميادين وشوارع مصر الجديدة وأطراف مدينة نصر والنزهة.
كان فيه يوم جمعة وحيد حصل فيه تظاهر واشتباكات بمنطقة كوبري القبة عند قصر القبة، لو أنت فوق الكوبري نفسه فأنت في الأمان سواء في اتجاه الوايلي أو في اتجاه مدينة نصر عن طريق كوبري الفنجري. القلق كله بـ يبقى تحت الكوبري عند البوابة الرئيسية.
في المعادي الوضع هادئ زي الحي نفسه، والأمر مش هـ يزيد عن مسيرة محدودة من ميدان الحرية تطلع على كورنيش المعادي، في اتجاه ماسبيرو أو اتجاه المحكمة الدستورية العليا، لكن الكورنيش بـ يفضل شغال بس بـ يبقى أبطأ شوية. داخل المعادي نفسها مافيش أي حاجة.
فيه أماكن لسه حمى المظاهرات ما وصلتهاش، أو بـ تكون فيها فعاليات في أضيق الحدود زي مدينة 6 أكتوبر "ممكن عند مدينة الإنتاج الإعلامي بدون تعطيل للمرور" ومدينة الشيخ زايد وطريق المحور المؤدي لهم. وكمان أجزاء كثير من مصر الجديدة والمعادي والزمالك.
في حال قطع مترو الأنفاق في محطة السادات زي ما بـ يحصل عادة، ممكن بدل ما تخرج على ميدان التحرير تتوجه لخط (شبرا – الجيزة) في نفس المحطة وتخرج من أي محطة ثانية غير السادات تفاديًا لمزيد من الزحمة والخطورة.
نتمنى لكم رحلات آمنة داخل القاهرة وكل واحد يعرف يقضي مشاويره وسط الجنون اللي بـ تشهده شوارع مصر وربنا يعديها على خير.
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
وليد أبوعرب
حرر بواسطة:
وليد أبوعرب
تاريخ النشر:
05/03/2013
محرر مساعد سابق - بـ يحب الخروج، دماغه فى الفرق الموسيقية وبـ يلعب مزيكا، بـ يحب يكون عنده معرفة عن كل شيء، بـ يزهق بسرعة! ما بـ يحبش تويتر.