دليل كايرو 360 لخروجات ممكن تمارس فيها أنشطة في القاهرة - الحياة في كايرو Feature - كايرو 360
 







دليل كايرو 360 لخروجات ممكن تمارس فيها أنشطة في القاهرة
دليل كايرو 360 لخروجات ممكن تمارس فيها أنشطة في القاهرة
اصدرت في: 11/03/2013

كابتن.. كابتن.. هو كله أكل؟ مافيش حركة شوية؟ السؤالين دول دائمًا بـ نسألهم لنفسنا مع أصحابنا لما لقينا أن أغلب خروجاتنا عبارة عن الغذاء في نهاية الأسبوع في مطعم جديد أو زيارة لكافيه جديد، وفي الشتاء زي ما أنتم عارفين الوزن بـ يزيد بالرغم أن الأبحاث أثبتت أن الإنسان بـ يحرق دهون أكثر في فصل الشتاء (غريبة شوية)، قررنا أننا النهارده نكلمكم عن الأماكن القاهرية اللي تقدروا تخرجوا فيها وتمارسوا أنواع متعددة من الأنشطة والأكل مش عنصر رئيسي في الموضوع وتبقى فرصة علشان نطبق المثل المصري الأصيل "الحركة بركة".

أفريكا سفاري بارك

في الكيلو 65 على طريق مصر إسكندرية الصحراوي هـ تلاقوا أفريكا سفاري بارك اللي بـ تتيح لكم فرصة مشاهدة حيوانات برية بـ تتجول بحرية كأنها في موطنها الطبيعي، "أفريكا سفاري بارك" من الأماكن اللي مافيش زيها اثنين في القاهرة وأول حديقة حيوانات مفتوحة في مصر، كمان فيه زي فندق صغير هـ تحسوا كأنكم عايشين في الغابات الاستوائية في أفريقيا مع وجود مطعم "الزامبيزي" لو حد حابب يأخذ وجبة خفيفة أو ثقيلة، الحديقة بـ تقدم عدد من الأنشطة زي الرحلة النهرية اللي من خلالها الزوار يقدروا يشوفوا التماسيح والقرود وأنواع مختلفة من الطيور، والكهف اللي بـ يحتوي على أكثر من نوع مختلف للزواحف والطيور والحيوانات النادرة لكن المتوحش منها بـ يكون داخل قفص زجاجي، بالنسبة للأنشطة الترفيهية هـ تقدروا تلعبوا رياضات متنوعة زي الصيد وتنس الطاولة وكرة القدم والبلياردو وغيرها من الألعاب، سعر دخول السيارة 250 جنيه تشمل رحلة السفاري والرحلة النهرية والكهف وللمجموعات بداية من 28 شخص، 40 جنيه للفرد ويمكن تأجير أتوبيس صغير بـ 350 جنيه وتقدروا تعرفوا مزيد عن الحديقة من خلال الموقع الرسمي.

دريم بارك

بداخل مدينة دريم لاند في مدينة 6 أكتوبر هـ تلاقوا دريم بارك اللي تعتبر من أهم وأشهر مدن الملاهي في القاهرة، دريم بارك مازالت محافظة على مستواها ودائمًا هـ تلاقوا فيها الجديد واللي يعجبكم وتقدروا تقولوا من الخروجات اللي الأكل فيها هـ يكون ضدكم مش معكم، المدينة بـ تحتوي على عدد من الألعاب المشهورة زي الصاروخ وقطار الموت وقطار الشرق وقطار الظلام وألعاب كثيرة مش لأصحاب القلوب الضعيفة لكن المدينة ما نسيتهومش وهـ تلاقوا ألعاب هادئة زي السفينة والسيارات التصادمية وألعاب هادئة يعني تقدروا تقولوا أن دريم بارك مدينة شاملة لأصحاب القلوب المغامرة وأصحاب القلوب الضعيفة، التذكرة أسعارها بـ تتراوح من 59.99 جنيه لـ 129.99 جنيه، تقدروا تتواصلوا وتعرفوا كل الجديد عن دريم بارك من خلال موقعهم الرسمي

أرابيان نايتس

"ركوب الخيل عز".. الصراحة مش عارفين هل دي مقولة أو مثل ولا إيه بالضبط بس فعلًا ركوب الخيل من الأنشطة الجميلة اللي لها تأثير أجمل على الحالة النفسية والبدنية للإنسان، في الكيلو 48 على طريق القاهرة الفيوم الصحراوي هـ تلاقوا نادي "أرابيان نايتس – Arabian Knights" اللي بـ يقدم عدد من الأنشطة أهمها ركوب الخيل، كمان النادي بـ يقدم رحلات سفاري بالبيتش باجي في صحراء الفيوم الرائعة بالقرب من بحيرة قارون، تقدروا تقولوا أن أرابيان نايتس من أهم الأماكن اللي تقدروا تقضوا فيها وقت رائع ما بين ركوب خيل ورحلات سفاري تجنن، لو حابين تعرفوا أكثر زوروا الموقع الرسمي.

القرية الفرعونية

في شارع البحر الأعظم هـ تجدوا القرية الفرعونية اللي من أهم المزارات في محافظة الجيزة وأهميتها وشهرتها في أنكم تقدروا تشوفوا ممثلين في أزياء وإكسسوارات الفراعنة كمان وهم بـ يمارسوا الطقوس اليومية زي الزراعة والتحنيط وغيرها، القرية بـ تنظم عدد من الأنشطة الترفيهية زي الرحلة النيلية في مركب القرية الفرعونية غير عدد من مهرجانات الألوان اللي بـ يُنظموا كل فترة وورش تعليم النحت والرسم وغيره من الفنون الفرعونية لمختلف الأعمار، القرية بـ تنظم برامج مختلفة للمجموعات وللأفراد وللأجانب والمصريين وتقدروا تتواصلوا مع القرية عن طريق الموقع الرسمي.

أكوا بارك

الصيف جاي يعني الفرهدة والقريفة والتوتر وغيره من اللي أنتم عارفينه وبـ نواجهه في فصل الصيف اللطيف، أكوا بارك في الكيلو 31 طريق مصر إسماعيلية الصحراوي بجوار أكاديمية المستقبل بـ يعرض مجموعة من الأنشطة والألعاب المائية المفيدة في فصل الصيف الحار. اعرف تفاصيل أكثر عن المكان من موقعهم الإلكتروني.

فاميلي لاند

مدينة ترفيهية بشكل جديد ده اللي تقدروا تقولوه عن "فاميلي لاند" الموجودة في 11 أبراج عثمان بالمعادي، المدينة بداخلها عدد من الأنشطة زي البولينج والتزلج على الجليد وأنشطة مرحة كثيرة، كمان سينما فاميلي، يعني المدينة مهما كان تعريفكم للمرح هـ تلاقوه في فاميلي لاند. اتصلوا على 02-25243200, 02-25243400, 02-25243300.

حديقة الأزهر

إذا ذٌكرت الأنشطة ذُكرت حديقة الأزهر، في شارع صلاح سالم وبعد قلعة صلاح الدين بشوية هـ تجدوا حديقة الأزهر على مساحة 74 فدان من المساحة الخضراء وعلى مدار السنة بـ يُقام عدد كبير من الأنشطة من الحفلات على مسرح الجنينة هناك التابع لمؤسسة المورد الثقافي أو على المساحات الخضراء الواسعة، ومهرجانات الألوان وجلسات التأمل ومحاضرات وندوات، ببساطة حديقة الأزهر واحدة من أهم المناطق في القاهرة اللي بـ تستضيف عدد كبير من الأنشطة، تقدروا تتابعوا حديقة الأزهر على الفيسبوك وتتابعوا الموقع الرسمي.

C.O.D.E paint Ball

حد فاكر أيام كاونتر سترايك وكول أوف ديوتي وميدال أوف أونار والشغل الحربي والأفلام الحربية اللي أكلت دماغنا من أواخر التسعينيات لغاية دلوقتي، دلوقتي في مصر هـ تقدروا تلعبوا كول أوف ديوتي في C.O.D.E paintball في المعادي بالهضبة الوسطى بجوار نادي إي زي أمام كارفور المعادي اللي بـ يعطيكم الفرصة أنكم تعيشوا الحياة الحربية بملابس الجيش المموهة بس ما تقلقوش مفيش رصاص حي ولا خرطوش، الذخيرة هـ تكون عبارة عن ألوان ومفيش لا قدر الله قتل ولا حاجة والفكرة كلها أزاي أن فريق واحد من الفرق المشتركة في اللعبة يوصل للعلم الكبير ويعلن فوزه وده طبعًا بعد ما يكونوا كل الفرق غرقت بعضها بالألوان، اليوم بـ يبقى مليان بالنشاط والحركة وفرصة كويسة أننا ننقل الحماس اللي عندنا من دراعات البلاي ستيشن إلى أرض الواقع ونشوف بقى الشغل الحربي على أرض الواقع، المكان بـ يقدم خصومات وعروض حلوة تقدروا تتابعوها عن طريق الصفحة على الفيسبوك أو عن طريق الموقع الرسمي.

رحلات السفاري

ربنا أنعم علينا بنعم كثيرة إحنا مش عارفين نستخدمها او نوظفها صح يعني مثلًا إحنا عندنا ¾ أثار العالم ومع ذلك هـ تلاقوا دول كثيرة متفوقة عن مصر في المجال السياحي. النعم مش بس الأثار كمان المناظر الطبيعية اللي تجنن بداية من عجائب الله في الصحراء الغربية وسيناء والصحراء الشرقية، بس زي ما بـ يقول القول المأثور أن تأتي متأخرًا خيرًا من ألا تأتي أصلًا، لاحظنا وجود شركات سياحة كثيرة في الفترة الأخيرة تعتمد على السياحة الداخلية عن طريق تنظيم رحلات سفاري ومن قبلهم شباب هواة كانوا بـ ينظموا الرحلات، بسبب وجود أكثر من شركة سياحة في المجال ما لاقيناش أفضل من موقع هيئة تنشيط السياحة اللي بـ يساعدكم على اختيار أماكن تناسب رحلة السفاري ومش محتاجين أكثر من سيارة دفع رباعي وبعض المستلزمات زي الأكل والشرب والخيام وملابس مناسبة وبيتش باجي ده لو حابين تنظموها بنفسكم، أما توفيرًا للفلوس الكثيرة اللي ممكن تدفعوها في رحلة من تنظيمكم ممكن تعتمدوا على شركة من شركات سياحة كثير بـ تنظم الرحلات دي ومتوسط الأسعار يتراوح بين 300 – 1000 جنيه للرحلة الواحدة معتمدة على عدد الأيام والمكان اللي هـ تروحوه

نتمنى أنكم تستمتعوا بالأماكن اللي قدرنا نرشحها لكم ولو وجدتم أماكن جديدة ما تترددوش في أنكم تقولوا لنا عليها.

مزيد من الصور
  • دليل كايرو 360 لخروجات ممكن تمارس فيها أنشطة في القاهرة
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
محمد نصر
حرر بواسطة:
محمد نصر
تاريخ النشر:
11/03/2013
منسق تحريري بالموقع العربي، دماغه مطرقعة وخيالية، بـ يحب القراءة والسفر، مدمن شوكولاتة، بـ يحب سبونج بوب وأيرون مان.