دليل أحداث نهاية الأسبوع: مهرجان القاهرة للجاز وساوند كلاش والأرملة الطروب ومعارض فنية - الحياة في كايرو Feature - كايرو 360
 







دليل أحداث نهاية الأسبوع: مهرجان القاهرة للجاز وساوند كلاش والأرملة الطروب ومعارض فنية
دليل أحداث نهاية الأسبوع: مهرجان القاهرة للجاز وساوند كلاش والأرملة الطروب ومعارض فنية
اصدرت في: 21/03/2013
يوم عظيم النهارده! بجد بـ نحب يوم عيد الأم جدًا، جايز علشان بـ يفكرنا بأيام الطفولة وحفلات المدرسة وأغاني صفاء أبو السعود وسعاد حسني، والتحويش والتضييق علشان نعرف نجيب هدية عليها القيمة لست الحبايب! مش عارفين؛ بس هو يوم مرتبط معانا بذكريات حلوة وبـ نستناه من السنة للسنة علشان نعبر لأمهاتنا عن امتناننا وتقديرنا اللي مش بـ نقدر نعبر عنه بشكل مثالي طوال أيام السنة وسط زحمة الحياة وإيقاعها اللي بقى سريع بشكل مرعب. بـ نفكركم قبل ما تعملوا أي حاجة الويك إند ده توفوا أمهاتكم حقها، وآبائكم طبعًا علشان بـ يزعلوا ويغيروا أحيانًا! ومافيش مانع أنكم تدوروا على خروجة مناسبة وتعزموهم عليها بره البيت أو تحضروا عرض موسيقى ظريف، وهـ نقول لكم دلوقت على شوية اقتراحات لأحداث الأسبوع فيه منها المناسب للعائلات.
لو كنت اشتركت في مسابقة كايرو 360 كان ممكن تكسب 10 تذاكر لحفلة وسط البلد وكايروكي اللي بـ يرعاها «رد بُل – Red Bull»، الحفل النهارده الساعة 6 مساءً في كايرو فيستيفال سيتي في التجمع الخامس بمجمع الفطيم بالقرب من أكاديمية الشرطة، بس قبل ما تروح اسأل نفسك أنت هـ تشجع أي فرقة منهم لأن الحفلة اسمها Sound Clash ومتوقع أنها تبقى مباراة حامية بين الفرقتين اللي بـ يعتبروا من أهم الفرق المصرية في العشر سنوات الأخيرة، احجزوا تذكرتكم دلوقت عن طريق موقع تذكرتي أو اتصلوا بـ 0237496162
الحدث ده مناسب جدًا للأمهات اللي بـ تحب المطبخ ومهووسة بالشيفات المشاهير. للسنة الثانية على التوالي الشيف العالمي بوبي تشين كان موجود في القاهرة في أجواء احتفالية في فيرمونت النايل سيتي في مطاعم سايجون ونابا جريل إمبارح الأربعاء، والنهارده فيه ليلة عشاء مع الشيف نفسه وندوة دردشة وتبادل خبرات، لمزيد من المعلومات والحجز اتصلوا بـ 01226936331.
النهاردة كمان حفل افتتاح مهرجان القاهرة لموسيقى الجاز في حديقة الأزهر. وحفل الافتتاح هـ يكون فيه الفنان البرازيلي جيلبرتو جيل مع عدد من الموسيقيين من أنحاء العالم زي دينا الوديدي (مصر) وتريو علي فاروق (مصر/ كندا) ورباب فيوجن (المغرب) وكريستينا تومي (ألمانيا)، تُقام العروض على مسرحي الجنينة والمسرح الرئيسي في حديقة الأزهر، والدخول الساعة 7 مساءً.
من المعارض الفنية اللي تم افتتاحها الأسبوع ده معرض مجمع بعنوان "مفترق الطرق" في قاعة بيكاسو للفن ويضم أعمال لعدد من الفنانين زي عبد العزيز الجندي وعبد الرحيم شاهين وعفت حسني وعلي دسوقي ومحمود حامد ونرمين الحكيم. مواعيد العرض يوميًا ماعدا يوم الأحد وحتى يوم 26 مارس.
وفي جاليري المشربية معرض للفنانة هالة أبو شادي بعنوان "على أرض غابتي" اللي بـ توضح فيه تأثير التراث على مجتمعات البحر المتوسط زي مفهوم الدين والوطن والممنوع والنوع والحقيقة، الرمز والصور ولهجات المصريين استوحت منها الفنانة أعمالها على مدار سنتين واستخدمت صور لها ولأصدقائها على مواقع التواصل الاجتماعي. مواعيد العرض يوميًا من الساعة 11 صباحًا لـ 8 مساءً ماعدا الجمعة.
يوم الجمعة تتواصل حفلات مهرجان القاهرة موسيقى الجاز ويُقام حفل فرقة إفتكاسات في حديقة الأزهر على المسرح الرئيسي الساعة 5 مساءً ضمن فعاليات المهرجان وتُقام عدد من الحفلات على مسرحي الجنينة والمسرح الرئيسي لعدد من الفنانين من دول مختلفة وهم: تريونيل كاولي (إنجلترا) وميتكو روسيف (بلغاريا) وgmho (النمسا) وKJ Denhert من الولايات المتحدة وفرقة ميجيل أمادو من البرتغال. تفاصيل أكثر عن عروض المهرجان على أجندة موقعنا.
ومن عروض دار الأوبرا المميزة الأسبوع ده، بكرة الجمعة هـ تقدم فرقة أوركسترا أوبرا القاهرة حفل أوبرا الأرملة الطروب للموسيقار الألماني فرانز ليهار على المسرح الكبير بدار أوبرا القاهرة، التذاكر متاحة لدى شباك الحجز والدخول بالملابس الرسمية.
يوم السبت يوم ختام مهرجان القاهرة لموسيقى الجاز وفيه عروض على مسرح مركز درب 17 18 الثقافي بمدينة الفسطاط، وده هـ يكون حفل لفريق بلو نوتس (مصر) وسابرين & دوم دو (مصر وهولندا وبولندا). الحفل ده هـ يبدأ الساعة 4 العصر.
وحفل الختام هو الحفل الأهم والأروع للموسيقار زياد رحباني على المسرح الرئيسي بحديقة الأزهر. دي مش أول زيارة للفنان اللبناني الكبير لمصر، وحفلاته بـ تحقق نجاح وإقبال جماهيري غير عادي. الرحباني هـ يبدأ الساعة 9:30 مساءً على المسرح الرئيسي، ويسبقه عدد من الحفلات لمغنيين من دول مختلفة زي رباعي أرك ستانتون (الولايات المتحدة) وثلاثي رمبراندت (هولندا) وداينيوس بولاوسكاس (ليتوانيا) وناماستي (فرنسا).
نتمنى أن ترشيحاتنا تنال إعجابكم الأسبوع ده، وكل سنة وكل أم طيبة، وما تنسوش تدوروا على أنشطة كثير ممكن تعملوها من خلال أجندة موقعنا، ونشوفكم الأسبوع اللي جاي في آخر ويك إند في شهر مارس.
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
21/03/2013
-