دليل أحداث نهاية الأسبوع: تامر أبو غزالة ومعرض إنترلاب وعلي الحجار ومسار إجباري - الحياة في كايرو Feature - كايرو 360
 







دليل أحداث نهاية الأسبوع: تامر أبو غزالة ومعرض إنترلاب وعلي الحجار ومسار إجباري
دليل أحداث نهاية الأسبوع: تامر أبو غزالة ومعرض إنترلاب وعلي الحجار ومسار إجباري
اصدرت في: 11/04/2013

 السلام عليكم! يا ترى حد عمل حاجة مفيدة الويك إند اللي فات؟ حد حضر أي من المعارض أو الحفلات اللي رشحناها أو حتى اللي مش رشحناها؟ طيب حد شارك في فعاليات مهرجان وسط البلد للفنون المعاصرة (D-CAF) في أي من الساحات الفنية والمراكز الثقافية في منطقة وسط البلد؟ نتمنى تكون الإجابة نعم، مش بس كده؛ تبعثوا لنا كمان تحكوا لنا عن تجاربكم وترشيحاتكم للأماكن والعروض علشان ننشرها ونتكلم عنها لو ما كناش عملنا ده قبل كده. الأسبوع ده امتداد للأسبوع اللي فات الحافل بالأحداث والمهرجانات الثفافية والفنية، أبريل دائمًا شهر فيه حيوية ونشاط علشان الجو حلو وبـ يشجع على الخروج والسفريات السريعة "صد رد" والخروج في الأماكن المفتوحة. تابعونا تجدوا ما يسركم..

قبل أي حاجة النهارده فيه حفل للفنان علي الحجار على المسرح الكبير بدار أوبرا القاهرة بمصاحبة الفرقة القومية العربية للموسيقى بقيادة المايسترو سليم سحاب، أسعار التذاكر 75 - 100 - 150 جنيه، لسه فيه تذاكر ممكن تجيبها من شباك الحجز. الدخول يبدأ من الساعة 8 مساءً. خليكم فاكرين أن حفلات علي الحجار في الأوبرا دائمًا لها مذاق خاص. 

نروح لمهرجان وسط البلد للفنون المعاصرة (D-CAF) ومعرض الفن التفاعلي "إنترلاب القاهرة - دريزدن" أو معرض الذكاء العاطفي الاصطناعي اللي تم افتتاحه الأسبوع ده في مركز مدرار بوسط البلد، العروض يوميًا من 5 مساءً لحد 10 بالليل ماعدا الجمعة في مدرار وفندق ڤيينواز. فكرة إنترلاب فريدة من نوعها وهناك هـ تشوف عروض فنون بصرية رقمية ما حصلتش في مصر قبل كده.

وعلى مسرح الفلكي بوسط البلد يُعرض ضمن فعاليات المهرجان مسرحية end/igne من أداء فرقة "أجواد" وتأليف مصطفى بن فضيل وإخراج خير الدين الأعجم، العرض باللغة الفرنسية مع ترجمة باللغة العربية. المسرحية بـ تناقش فكرة المواطنين اللي بـ يشعلوا النار في أنفسهم احتجاجًا على الحكومات. العرض هـ يبدأ الساعة 8 مساءً.

نروح للمعارض الفنية المستقلة ونقول لكم على معرض مهم تم افتتاحه الأسبوع ده وهو معرض الفنان د. فريد فاضل بعنوان "الخبز والماء" في جاليري كالا للفنون واللي بـ يتضمن مجموعة من أعماله الفنية تتناول مواضيع البحث عن الجمال في الأشياء البسيطة زي الهواء والخبز والمياه وغيرها، المعرض مفتوح من 10 صباحًا لحد 8 مساءً.

يوم الجمعة يقدم فصل الكلاكيت التابع لمركز تنمية المواهب بدار الأوبرا عرض استعراضي على المسرح الكبير بدار أوبرا القاهرة، من إخراج وتصميم أ. ليوني لمعي وإشراف عام: عبد الوهاب السيد، العرض هـ يبدأ الساعة 8 مساءً والتذاكر متوفرة بشباك الحجز.

فرقة مسار إجباري هـ تقدم حفل في قاعة النهر بساقية الصاوي فيه مجموعة من أحلى أغاني سيد درويش وأغاني الألبوم الجديد اللي منتظرينه بفارغ الصبر "اقرأ الخبر". سعر التذكرة 35 جنيه لأعضاء ولغير أعضاء ساقية الصاوي. نوعدكم أنكم هـ تحبوا الحفلة.

بكرة الساعة 7 مساءً تعرض مكتبة صوفي بالزمالك الفيلم الوثائقي Home اللي بـ يتناول صور جوية لـ 54 دولة توضح أن مشاكل الأرض كلها مترابطة، من إخراج يان أرثوز بيرتراند ومن تأليف إيزابيل ديلانوف ويان أرثوز بيرتراند وبطولة جلين كلوس وجاك جامبلين ويان أرثوز بيرتراند، الفيلم من إنتاج 2009. الدخول بحد أدنى للطلبات.

يوم السبت يقدم الفنان والموسيقار الرائع عمر خيرت حفل موسيقي يتضمن مجموعة من المؤلفات الموسيقية في قاعة النهر بساقية الصاوي، سعر التذاكر 100 جنيه أول وثاني صف، 80 جنيه ثالث ورابع صف، 60 جنيه جلوس و40 جنيه وقوف، ادخل على صفحة الحدث واحجز تذكرتك أونلاين.

تامر أبو غزالة اللي قدم لنا أغاني جامدة زي "أه من الأخوان" و"خبر عاجل" و"مهرجان البلاعات" و"تخبط" هـ يقدم حفل غنائي في مركز درب 17 18، سعر التذكرة 35 جنيه والحفل هـ يبدأ الساعة 8 مساءً يوم السبت.

ممكن تتابعوا أخبار مهرجان D-CAF من أجندة موقعنا لحد يوم 28 أبريل، وتابعوا كمان حفلات كايرو جاز كلوب وأفتر 8 وعدد من أماكن السهر والكاريوكي، واحجز مكانك من خلالنا، كله موجود على أجندة كايرو 360.. وأجازة لطيفة..

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
11/04/2013
-