دليل أحداث نهاية الأسبوع: كايروكي وقرار إزالة وبازارات ومعارض فنية - الحياة في كايرو Feature - كايرو 360
 







دليل أحداث نهاية الأسبوع: كايروكي وقرار إزالة وبازارات ومعارض فنية
دليل أحداث نهاية الأسبوع: كايروكي وقرار إزالة وبازارات ومعارض فنية
اصدرت في: 09/05/2013

مساء الخير! بسرعة أجازة من ثاني بعد 3 أيام شغل اتحطوا غلط بعد أجازة أعياد الربيع وعيد العمال، وبالمناسبة السعيدة دي "اللي هي الأجازة اللي جاءت بسرعة" بـ نقول لكم كل ويك إند وأنتم طيبين وربنا يجعل أيامنا كلها أجازات.. من غير شر طبعًا.

عدد كبير من المعارض الفنية تم افتتاحها اليومين اللي فاتوا ولسه هـ تنطلق فعاليات بعض المعارض بدءًا من النهارده، تقريبًا ده أكثر أسبوع تم فيه افتتاح معارض فنية من أول السنة دي 2013، وكلها معارض مميزة بـ نرشحها لكم لزيارتها.

المصورة هالة الخوصي هـ تقدم معرض تصويري بعنوان "رحلة حول غرفتي" اللي بـ يأخذ عنوانه من عنوان كتاب "رحلة حول غرفتي" لإكسافيير دي مايستر اللي بـ يقضي أسبوعين في غرفة نومه وبـ يوصفها كأنه ما شافهاش قبل كده، في ربيع وصيف 2012 ليلى رجعت لبدايتها كمصورة وبدأت تصور كل يوم من حياتها ومنطقتها في وسط البلد بالقاهرة وده اللي هـ تشوفوه في المعرض، الافتتاح الليلة دي الساعة 7 مساءً في جاليري المشربية، والعرض يوميًا ماعدا الجمعة . 

وجاليري مصر هـ يستضيف معرض للفنانة شيماء صبحي تحت عنوان "هجين"، المعرض تم افتتاحه أمس الساعة 7 مساءً وهو مستمر لحد يوم 23 مايو والعرض يوميًا ماعدا السبت.

وضمن الاحتفال بالعيد الخامس لتأسيس جاليري المسار للفنون المعاصرة يستضيف الجاليري المعرض الأول للفنان أحمد فريد بعنوان "تنوع حضري" اللي استلهم الفنان أعماله من التنوع الحضري الموجود في مدينة القاهرة، الافتتاح كان يوم الثلاثاء الماضي والمعرض مستمر لحد يوم 30 مايو يوميًا ماعدا الجمعة.

بيت الرصيف في المعادي بقى واجهة كثير من عشاق المزيكا والفرق الموسيقية مؤخرًا في المعادي، فرقة قرار إزالة هـ تعمل حفلة هناك الليلة دي. قرار إزالة بـ تقدم لنا أغاني بكلمات تساعد على تدعيم الأفكار الإيجابية ومناقشة القضايا الاجتماعية والفلسفية والنفسية، وأهم حاجة أن وراء كل ده موسيقى روك، يعني روك بالعربي وباند جديد في مكان مميز وسعر التذكرة 20 جنيه.

ونختم يوم الخميس اللي هو النهارده بمسرح الجنينة اللي هـ يستضيف حفل جديد ضمن البرنامج الصيفي المميز، حفل النهارده مع شربل روحانا وفرقة بيروت للموسيقى الشرقية. يعتبر شربل من القليلين اللي ساهموا في تشكيل فن العزف على العود وقدم مع فرقة بيروت أكثر من 100 حفلة في آسيا وأوربا وأفريقيا، وقبلهم هـ يقدم لاعب البركشن أيمن مبروك ولاعب العود أحمد ماهر مع لاعب الأكورديون وائل السيد نوع جديد من الموسيقى من ابتكارهم لكن بـ يحمل روح موسيقى الجاز، سعر التذكرة 20 جنيه، لمزيد من المعلومات اتصلوا بـ 0223637081 .

يوم الجمعة ميعاد كل مجانين فرقة كايروكي وحفلهم المنتظر في ساقية الصاوي، مش محتاجين نقول لكم تفاصيل أكثر من أن واحد من أجمد الفرق في القاهرة هـ يكونوا موجودين في قاعة النهر بساقية الصاوي، سعر التذكرة 35 جنيه، للمزيد من المعلومات عن التذاكر والحجز اتصلوا بـ 01008425387.

تيفولي دوم في الشيخ زايد لسه بـ يحتفل بشم النسيم وبـ يدعوكم لتقضية يوم ممتع بمناسبة أعياد الربيع في بازار الربيع اللي هـ يضم مجموعة منتجات لمصممين مختلفين مع مسابقات وأنشطة مرحة للأطفال بكرة وبعده.

"نن سنتر" بـ يعطيكم الفرصة علشان تتسوقوا وتشوفوا أحسن منتجات المزارعين والحرفيين المستقلين في فرصة لتدعيمهم على الإنتاج بشكل أكبر، ما تتأخروش علشان تلحقوا المنتجات الطازجة، الكلام ده يوم السبت اللي هو بعد بكرة.

يوم السبت كمان يستضيف جاليري المسار للفنون المعاصرة أول معرض للفنان المميز طارق منتصر تحت عنوان "ترابيزة الحياة" اللي بـ يضم مجموعة متنوعة من أعمال فنية تشمل عناصر طبيعية وعناصر من صنع الإنسان، الافتتاح في الساعة 7 مساءً، العروض يوميًا ماعدا الجمعة.

نتمنى لكم أجازة ظريفة وما تنسوش أن الدنيا حر وأن أي خروجات بالنهار محتاجة أخف لبس في الدولاب عندكم، وبالليل الجو بقى ربيعي وحلو جدًا علشان لسه مافيش رطوبة. نشوفكم على خير الأسبوع اللي جاي وتابعوا باقي الأحداث الثقافية والفنية من على أجندة موقعنا، مع السلامة..

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
09/05/2013
-