دليل أحداث نهاية الأسبوع: أوبرا عايدة ونصير شمة وتريو عمرو صلاح ومريم صالح - الحياة في كايرو Feature - كايرو 360
 







دليل أحداث نهاية الأسبوع: أوبرا عايدة ونصير شمة وتريو عمرو صلاح ومريم صالح
دليل أحداث نهاية الأسبوع: أوبرا عايدة ونصير شمة وتريو عمرو صلاح ومريم صالح
اصدرت في: 23/05/2013

السلام عليكم! أخبار الحر والشمس إيه؟ وأخبار قطع الكهرباء عندكم إيه؟ إحنا اكتشفنا أن أحسن طريقة نواجه بها قطع الكهرباء هي أنك تبقى في الشارع معظم الوقت، في أماكن عامة ومطاعم وكافيهات ومراكز ثقافية ومسارح، صحيح النور بـ يقطع في الأماكن دي لكن غالبًا بـ يبقوا عاملين حسابهم وعندهم مولدات كهرباء. فشعار المرحلة هو استغل أي تكييف أو أي مروحة، في أي مكان، واشحن تليفونك و"تابلتك" كويس علشان هو اللي هـ يسليك في وحدتك وفي غياهب الظلام.

الويك إند ده في رأينا هو ويك إند الأوبرا؛ دار الأوبرا المصرية فيها عروض متميزة وقوية جدًا، وإحنا بـ نرشح لكم بشدة دار الأوبرا الأسبوع ده وهـ نقول لكم على أسماء العروض ومواعيدها حالًا.

الليلة دي الخميس هـ تقدم الفنانة وعازفة البيانو مريم المملوك حفل موسيقي على المسرح الصغير بدار أوبرا القاهرة. يتضمن الحفل عزف على آلة البيانو بمشاركة مطربة الميتزو سوبرانو نوريستا الميرغني، يضم الحفل أروع الألحان والمؤلفات الموسيقية لكل من فريدريك تشوبان وباولو توستي وفيرناندو أوبرادورس ونهلة ماتا وجورج جيرشوين. سعر التذكرة 10 جنيه ومتاحة لدى شباك الحجز، والحفل هـ يبدأ الساعة 8 مساءً.

وفي نفس التوقيت في ساقية الصاوي يقدم الفنان نصير شمة حفلًا جديدًا في قاعة الحكمة يعزف من خلاله أجمل مقطوعات الموسيقى العربية على العود، سعر التذكرة 50 جنيه لأعضاء ولغير أعضاء ساقية الصاوي.

وضمن فعاليات برنامج الصيف بمسرح الجنينة بحديقة الأزهر يستضيف المسرح الفنانة مريم صالح بأغانيها الجامدة جدًا اللي حققت من خلالها نجاح كبير في السنتين الأخيريتين بعد أن اشتهرت بتقديم أغاني الشيخ إمام اللي تأثرت به من صغرها. سر التذكرة 10 جنيه ولمزيد من المعلومات اتصلوا بـ 0223637081

ولو عاوزين تروحوا معارض فنية بـ نفكركم بمعرض بعنوان "توق ومكر وميلاد متعسر" بـ يستضيف جاليري التاون هاوس وهو أول معرض فردي للفنانة دعاء علي واللي يعتبر العرض الأول في القاهرة لسلسلة أعمال فيديو بعنوان "التحولات: في أربع متتاليات" مع مجموعة من الرسومات وعمل نحتي ونصوص مركبة استلهمتها دعاء من القصيدة الشهيرة "التحولات (مسخ الكائنات)" لأوفيد اللي بـ تحكي عن أربعة أشخاص يشاركوا تجاربهم عن الحب والخسارة، الافتتاح كان من أسبوعين تقريبًا، العروض يوميًا ماعدا أيام الجمعة والسبت لحد يوم 6 يونيو.

يوم الجمعة هو اليوم الكبير في دار الأوبرا المصرية، هـ تقدم فيه فرقة أوركسترا أوبرا القاهرة بمشاركة فرقة باليه أوبرا القاهرة وكورال أوبرا القاهرة "أوبرا عايدة" للموسيقار العالمي ج. فيردي بقيادة المايسترو ناير ناجي على المسرح الكبير بدار أوبرا القاهرة، أسعار التذاكر 50 - 75 - 100 جنيه وللطلبة 35 - 50 - 75 جنيه ومتاحة لدى شباك الحجز، الحضور بملابس رسمية.

وعلى المسرح الصغير بدار الأوبرا تقدم الفنانة خلود شرارة حفل ريسيتال فلوت وهارب يضم أحلى المؤلفات الموسيقية على الآلتين، التذاكر متاحة لدى شباك الحجز.

والأجواء الأوبرالية وصلت ساقية الصاوي كمان وبكرة هـ يكون فيه حفل لفرقة كورال كابيلا نوفا الأمريكية في قاعة النهر، يضم الحفل مقطوعات موسيقية تراثية وبطابع عصري لدول شمال أفريقيا زي الإنشاد الصوفي والتراث الشعبي، كمان يضم الحفل أغاني لفرقة الشيكر الأمريكية بصبغتها التراثية والرقصات المميزة، سعر التذكرة 15 جنيه لأعضاء ساقية الصاوي و20 جنيه لغير الأعضاء.

وفي قاعة الحكمة يقدم ثلاثي الجاز بقيادة عمرو صلاح حفل موسيقى جاز في بساقية الصاوي، الفريق اسمه Amr Salah Trio وسعر التذكرة 30 جنيه لأعضاء ولغير أعضاء ساقية الصاوي.

 يوم السبت تقدم فرقة أوركسترا القاهرة السيمفوني حفلًا جديد على المسرح الكبير بدار الأوبرا القاهرة، تعزف الأوركسترا خلاله مقطوعات من كلاسيكيات الموسيقى العالمية بقيادة المايسترو مينا ذكري مع عازف الفيولين السوليست حسن شرارة. الحفل بعنوان Night at the Ball والتذاكر متاحة لدى شباك الحجز.

وأخيراً ما تفوتوش بازارات الصيف اللي بـ تعملها Cairo Flea Market في ديزاينوبوليس في طريق مصر/الإسكندرية الصحراوي، فرصة تشوفوا بضائع وسلع مش هـ تشوفوها في أي مكان ثاني، لمزيد من المعلومات اتصلوا بـ 01006009918 - 01001558158 - 01008958444 أو ارسلوا على info@CairoFleaMarket.com.

جدول الأحداث الفنية والثقافية مزدحم جدًا الأجازة دي، ننصحكم تلقوا نظرة علي أجندة كايرو 360 جايز تلاقوا حاجة تعجبكم غير اللي كتبنا عنها فوق، أجازة سعيدة ونشوفكم كمان أسبوع.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
23/05/2013
-