دليل أحداث نهاية الأسبوع: عمر خيرت ولايك جيلي وأوريجين - الحياة في كايرو Feature - كايرو 360
 







دليل أحداث نهاية الأسبوع: عمر خيرت ولايك جيلي وأوريجين
دليل أحداث نهاية الأسبوع: عمر خيرت ولايك جيلي وأوريجين
اصدرت في: 27/06/2013

أسبوع عصيب وأزمة وقود وترقب غير عادي للمشهد السياسي واللي هـ يحصل بكرة وبعده ولحد يوم 30 وما بعده، ربنا يحفظ مصر وأهلها ويوفقهم للي فيه الخير، هـ نكون متفائلين قدر الإمكان وندعوكم للاستمتاع بآخر ويك إند في شهر يونيو وآخر ويك إند قبل المعمعة ونقدر نقول قبل "المجهول" لأن ده التعبير الأدق. لحسن الحظ فيه النهارده واليومين الجايين عدد كبير من الأحداث الثقافية والحفلات الموسيقية الخطيرة، كأن كله قرر يقدم أجمل ما عنده قبل "المجهول" اللي قولنا عليه. شوفوا اختياراتنا من أجندة كايرو 360 للأجازة دي ونتمنى أنكم تلاقوا حاجات ظريفة تعملوها من خلالنا.

الليلة دي سهرة مميزة منتظراكم هـ تبدأها فرقة "لايك جيلي" في ظهورها لأول مرة على مسرح كايرو جاز كلوب بأغانيهم الكوميدية والساخرة، وبعدهم واحدة من أعظم فرق الـUndergroundفي مصر "وسط البلد" اللي مش محتاجين نقول أكثر من اسمهم علشان تعرفوا إيه اللي هـ يقدموه، سهرة جامدة جدًا لازم تحجزوا قبلها عن طريق الاتصال بـ 01068804764. 

وبعد فترة توقف يُقام على المسرح الكبير بدار أوبرا القاهرة حفل بعنوان "كوكب الشرق" هـ تقدم فيه الفنانة ريهام عبد الحكيم بمصاحبة فرقة كوكب الشرق الموسيقية بقيادة المايسترو محمد الموجي مجموعة من أروع أغاني الست أم كلثوم، سعر التذكرة 35 - 50 - 75 جنيه للطلبة ولغير الطلبة 50 - 75 - 100 جنيه، ومتاحة لدى شباك الحجز.

والليلة دي كمان في ساقية الصاوي هـ تقدم فرقة"المولوية المصرية"بقيادة الفنان عامر التوني حفل في قاعة النهر. تأسست الفرقة سنة 1994 على يد منشدها عامر التوني اللي حاول يطرح التراث المصري للعالم للتأكيد على خصوصية مصر وتفردها بين الأمم، سعر التذكرة 15 جنيه لأعضاء ولغير أعضاء ساقية الصاوي.

ولعشاق الفنان عمر خيرتبـ نفكركم بحفل يقدم الفنان والموسيقار الشهير الليلة دي في دار أوبرا جامعة مصر للعلوم والتكنولوجيا MUST واللي هـ يعزف فيه مجموعة من أعماله الرائعة، والدخول بالملابس الرسمية.

وآخر حفل هـ نقول لكم عليه النهارده الخميس هو حفل على مسرح الجنينة بحديقة الأزهر لفرقتي أوريجينوميديك. الفرقتين بـ يقدموا موسيقى الميتال الممزوجة بالنغمات والغناء الشرقي، والفرقتين لهم معجبين كثير بـ يحبوا نوع المزيكا اللي بـ يقدموه، سعر التذكرة 20 جنيه والدخول الساعة 8 مساءً.

بدءًا من يوم 20 يونيو اللي فات تستضيف ساحة "آرت اللوا" للفنون معرض تصوير بعنوان "نهاية العالم" للفنان محمد المصري المصور الصحفي، يتناول مشروع المعرض صور من النزاعات المسلحة وحوادث التطهير العرقي من أماكن مختلفة من العالم وخلال فترات مختلفة. المعرض مستمر لحد يوم 7 يوليو اللي جاي وننصحكم بزيارته ومشاهدة الصور المختلفة.

بكرة على مسرح الجنينة يُقام حفل للفنانة المصرية نهى طهاللي هـ تقدم أغاني من ألحانها وتأليفها ويليها الفنان السوري خاطر ضوا اللي بـ يدرس في بيت العود العربي واللي هـ يقدم أغاني متأثرة بالتراث الصوفي والأغاني الجبلية والحلبية، سعر التذكرة 10 جنيه والدخول الساعة 8 مساءً.

وفي أيام السبت والاثنين والأربعاء تواصلفرقة التنورة التراثيةتقديم عروضها الفنية الاستعراضية في وكالة الغوري، تقدم الفرقة العرض بمصاحبة آلات الموسيقى الشعبية التراثية زي الربابة والسلامية والمزمار والصاجات والطبلة مع أداء راقص من اللفيف "الراقص الأساسي" ومن حوله الحناتية "الراقصين الفرعيين" وبـ يعزفوا على آلة الإيقاع (المزهر)، في الاستعراض يمثل اللفيف الشمس ومن حولها الكواكب المتمثلين في الحناتية على حسب التصور الصوفي لرقصة التنورة الصوفية. سعر التذكرة 2 جنيه للمصريين و30 جنيه لغير المصريين.

ويوم السبت كمان هـ يكون موعدكم مع فرقة إسكندرانية جديدة هي "كراكيب"اللي هـ تظهر لأول مرة على مسرح كايرو جاز كلوب وهـ يقدموا لنا أغاني بـ تتناول قضايا سياسية واجتماعية، ويليهم اللي دائمًا منور كايرو جاز كلوب الفنان النوبي محمد بشير في سهرة أغاني فلكلورية بصوته المميز، الحجز ضروري.

بـ نفكركم أن دي مش كل حاجة ممكن تتعمل أيام الخميس والجمعة والسبت، القوا نظرة على أجندة موقعناواكتشفوا فيه إيه ثاني ممكن يتعمل في القاهرة وماتضيعش أي فرصة للاستمتاع طول ما تقدر تعمل ده..ادعوا لمصر..والقاهرة بالتحديد ..

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
27/06/2013
-