دليل كايرو 360: إزاى تقضوا يومكم في رمضان - الحياة في كايرو Feature - كايرو 360
 







دليل كايرو 360: إزاى تقضوا يومكم في رمضان
دليل كايرو 360: إزاى تقضوا يومكم في رمضان
اصدرت في: 14/07/2013

"رمضان جانا، وفرحنا به بعد غيابه، وبقاله زمان، غنوا وقولوا شهر بطوله أهلًا رمضان".. أغنية الفنان الراحل محمد عبد المطلب تقدر تجيبكم من آخر الدنيا وتفكركم أن شهر رمضان وصل حتى لو كانت بلدنا في أزمة وفتنة ربنا يعدينا منها على خير وتكون مصر في حال أحسن اللي شهر رمضان فيها طعمه مختلف عن أي بلد في العالم وده لأن الـ 90 مليون هـ تلاقيهم فرحانين به أيًا يكن دينه لأن دي طبيعتنا والـsoftware المصري اللي ربنا خلقنا به "رباني"، رمضان السنة دي هـ يكون مميز هـ ينورنا في شهر 7 وكمان عدد ساعات الصيام 16 ساعة ونصف، بـ ندعي ربنا أنه يجازينا خير على الصيام والقيام.

كل واحد في رمضان بـ يقضيه بطريقته وده على حسب ظروفه سواء كان بنت أو ولد، بـ يدرس أو بـ يشتغل، وغيره...، ودائمًا الشكوى المتكررة "أن الوقت في رمضان بـ يضيع ومش قادرين نستغله" وده يا حلوين علشان عاوزين تعلموا 100 حاجة في وقت واحد وبـ تتقلوا في الأكل، سألنا عدد من أصدقائنا وحاولنا نجمع لكم طريقة معقولة تعرفوا تقضوا بها شهر رمضان وتستفيدوا من روحانيات وأنشطة الشهر الكريم.

كلنا منتظرين إعلان دار الإفتاء المصرية عن بداية شهر رمضان والصبح بـ نشوف رأي الفلكيين ويقولوا رأيهم إيه، خلاص عرفنا إمتى؟ يبقى نجهز نفسنا علشان نصلي أول صلاة تراويح في المسجد وبعدها نقعد شوية مع أصدقائنا ونتسحر السحور التقليدي فول وزبادي مع حبة حبشتكنات.

أنشطة رمضان تقريبًا ثابتة مش بـ تتغير وهي يا إما قعدة حلوة على القهوة اللي على الناصية أو في قهوة من القهاوي الموجودة في القاهرة الإسلامية اللي شهرتها أشهر من نار على علم أو خروج في خيمة من الخيم الرمضانية بعد الإفطار والسحور فيها أو السحور في واحد من مطاعم السحور المشهورة زي البرنس أو الجحش أو حبايب السيدة وغيره، أو لو أنتم من جمهور التليفزيون يبقى لازم تشوفوا دليلنا لمسلسلات وبرامج رمضان.

لكن ده ما يمنعش أننا نستفيد في نهار رمضان بأشياء مفيدة لنا عقليًا وروحيًا، وفيه أكثر من طريقة هـ نقولها لكم:

فيه ناس بـ تبدأ يومها بالنوم وخصوصًا لو كانت ظروفهم بـ تخليهم في البيت في النهار، والأغلب أن كل الناس بـ تصحى متأخر في رمضان وده طبيعي، بعد الصحيان من النوم على آذان المغرب والإفطار المتين تبدأ عودة الأنشطة الليلية، كمان فيه شوية أنشطة تقدروا تعملوها في وقت الصيام علشان تستغلوه أفضل استغلال زي:

 

القراءة:

لو ظروفكم هـ تخليكم في البيت في نهار رمضان وأنتم صايمين مافيش أحسن من القراءة علشان تغذوا عقولكم أكثر وتبقى في كامل قوتها والقراءة هنا مش بس القرآن الكريم لكن ممكن تقرأوا حاجات كثيرة تفيدكم سواء كانت مؤلفات دينية أو روايات أو كتب علمية.

 

الرياضة:

فيه دراسات كثيرة جدًا على الرياضة في شهر رمضان وخصوصًا وقت الصيام وهل يا ترى الأفيد قبل الإفطار ولا بعده، أغلب اللي اتفق عليه الناس أن التدريب قبل الصيام هـ يخليكم تحرقوا من الكتلة العضلية لتعويض الطاقة اللي محتاجها الجسم، أما لو كنتم عاوزين تحرقوا الدهون فممارسة الرياضة بحساب مع متابعة تقدروا تحققوا هدفكم في الصيام، لكن من الأفضل أنكم ما تملأوش بطنكم جامد وتمارسوا الرياضة بشكل طبيعي، صلاة التراويح تعتبر طبعًا نوع من أهم أنواع الرياضة الروحية والبدنية وكمان العقلية في حالة وجود درس ديني كويس يفيدكم، وأكيد ما تنسوش الدورات الرمضانية اللي بـ ننتظرها من السنة للسنة، ولو معاكم فريق ورونا نفسكم.

 

التسامح:

مافيش أحسن من التسامح في شهر الخير والبركة، يا ريت ما تبقاش الأحداث السياسية سبب في أنكم تخسروا صديق في حالة نرفزة مالهاش لازمة.

 

الخير:

عن الرسول الكريم محمد (صلى الله عليه وسلم) أجود الناس، وكان أجود ما يكون في رمضان حين يلقاه جبريل، وكان بـ يلقاه في كل ليلة من رمضان فيدارسه القرآن، فلرسول الله صلى الله عليه وسلم أجود بالخير من الريح المرسلة". رواه البخاري، نتعلم من الرسول الكريم ونكثر من أفعال الخير في رمضان وأظن مؤسسات الخير "ما شاء الله" مافيش أكثر منها في بلدنا، ربنا يحميها ويكثر من خيرها.

 

في النهاية بـ نتمنى أنكم تقضوا رمضان على خير ويكون فعلًا شهر البركة والرحمة عليكم وعلى بلادنا وعلى كل البشر، وما تنسوش تحافظوا على عباداتكم وصحتكم البدنية لأن الصيام هدفه أننا نبقى بصحة أحسن مش وزننا يزيد ونعاني من عسر الهضم.

دمتم بود ورمضان كريم!

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
محمد نصر
حرر بواسطة:
محمد نصر
تاريخ النشر:
14/07/2013
منسق تحريري بالموقع العربي، دماغه مطرقعة وخيالية، بـ يحب القراءة والسفر، مدمن شوكولاتة، بـ يحب سبونج بوب وأيرون مان.