دليل أحداث نهاية الأسبوع: مسار إجباري وعمرو حاحا ومحمود الليثي وكوميدي نايت - الحياة في كايرو Feature - كايرو 360
 







دليل أحداث نهاية الأسبوع: مسار إجباري وعمرو حاحا ومحمود الليثي وكوميدي نايت
دليل أحداث نهاية الأسبوع: مسار إجباري وعمرو حاحا ومحمود الليثي وكوميدي نايت
اصدرت في: 25/07/2013

رمضان بـ يعدي علينا هوا ! ده مش كلام أغاني ولا إعلانات، دي حقيقة وعايشينها، فجأة عدى نصف رمضان ولقينا نفسنا بـ نحسب عملنا إيه مفيد في الشهر الكريم غير المسلسلات والأكل ومتابعة أحوال البلد السياسية، بـ نفكركم وبـ نفكر نفسنا أنه شهر المغفرة والعتق من النار، يعني اللي ما استغلش النصف الأول يلحق نفسه في النصف الثاني وربنا يتقبل منا جميعًا.

الأسبوع ده دار الأوبرا قررت أنها تلغي كل العروض على مسارحها من يوم 25 يونيو لحد يوم 6 أغسطس، ونفس الكلام لمركز آرت اللوا الثقافي لحد آخر رمضان، نظرًا للظروف الأمنية والأحداث اللي بـ تشهدها البلاد، قرار كويس لحد ما نعرف رأسنا من رجلنا والبلد تستقر شوية، وعلى النقيض عدد من المراكز الثقافية بـ يقدم عدد من الفعاليات الممتعة في أماكن مختلفة من العاصمة وبـ يدعو كل الناس أنها تشارك وتحضر في أجواء رمضانية مصرية أصيلة.

 النهارده الخميس فيه عدد كبير من الحفلات والأمسيات المميزة، أولها في جاز مايت قلعة الجاز في الزمالك بـ ينظم سهرة جاز خطيرة مع ناتالي سابا وأسامة سيد ويحيى سانتانت مع ضيف الحفل على الدرامز جمال فهيم، فيه حد أدنى للطلبات 50 جنيه وللحجز ولمزيد من المعلومات اتصلوا بـ 0227370521، وبـ ندعوكم لتجربة حاجة جديدة وهي اللي هـ تكون في مركز "المقر" اللي بـ ينظم كورس لغة إشارة علشان نعرف نتعامل مع أخواننا وأخواتنا من الصم والبكم، كورس مفيد ما يتفوتش، المحاضرة مجانية، سعر الدخول 15 جنيه.

يوم رمضاني 100% منتظركم في بيت الرصيف مع فرقة من أهم فرق إسكندرية وهي مسار إجباري اللي هـ يفطروا معكم وبعدها يوقعوا الألبوم وتبدأ الحفلة 10 مساءً، سعر التذكرة 30 جنيه، ولهواة موسيقى المهرجانات فيه حفل رمضاني في شبابيك مع المغني الشعبي والدي جي عمرو حاحا في سهرة رمضانية جامدة، الحضور مجانًا، وحفل شعبي ثاني في ياسو لاونج في الجيزة اللي هـ يستضيف واحد من أهم المغنيين الشعبيين وهو محمود الليثي، للحجز اتصلوا بـ 01111102311 / 01140277767.

يستضيف مسرح الجنينة بحديقة الأزهر حفل للفنانة التونسية نوال بن كريم في إطار حفلات وعروض مهرجان "حي"، سعر التذكرة 20 جنيه بخلاف تذكرة دخول الحديقة، وتستضيف وكالة الغوري فرقة عمدان النور في حفل موسيقي تقدم خلاله الفرقة أجمل الأغاني المصرية المعاصرة بموسيقى عربية وكلمات حديثة.

يوم الجمعة لو قررت تروح في حتة ممكن تحضر حفل الفنانة الفلسطينية سناء موسى على مسرح الجنينة بحديقة الأزهر في إطار حفلات وعروض مهرجان "حي"، سعر التذكرة 20 جنيه ولمزيد من المعلومات اتصلوا بـ 0223625057 أو زوروا الموقع الرسمي للمهرجان.

ويوم السبت بيت الرصيف محضر لكم ليلة كوميدية مليانة باللعب والضحك مع محمد مرجان ومصطفى السيد ومينا نادر ووليد أبو المجد، كمان هـ تيجي لكم الفرصة علشان تلعبوا بالمايك وتستعرضوا موهبتكم أمام الجمهور، سعر الدخول 20 جنيه.

تابعوا أجندة كايرو 360 علشان تعرفوا الأحداث الثقافية الثانية وتعرفوا لو فيه حاجة ثانية اتلغت لأي ظروف، هـ نوافيكم بالأخبار أول بأول. أجازة سعيدة عليكم إن شاء الله.. ورمضان كريم.. وتحيا مصر..

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
25/07/2013
-