دليل كايرو 360 لأماكن تقديم المنح الفنية والمادية لأصحاب الأفكار والمشاريع المميزة (جزء 2) - الحياة في كايرو Feature - كايرو 360
 







دليل كايرو 360 لأماكن تقديم المنح الفنية والمادية لأصحاب الأفكار والمشاريع المميزة (جزء 2)
دليل كايرو 360 لأماكن تقديم المنح الفنية والمادية لأصحاب الأفكار والمشاريع المميزة (جزء 2)
اصدرت في: 18/11/2013

بالنسبة لناس كثير فكرة المشاريع الخاصة مخاطرة مرعبة جدًا، وحاجة مش ممكن يفكروا فيها، ولقب "رائد أعمال" بالنسبة لهم محمل بكثير من المخاطر والأزمات والمخاوف اللي بـ يهربوا منها بوظيفة منتظمة على طريقة "نص العمى ولا العمى كله" لكن ناس كثير مش بـ تستسلم، وبـ تأخذ المخاطرة وتبدأ مشاريعها، علشان الناس دول فيه جهات كثير مصرية وعربية بـ تقدم منح ودعم لهم عشان يقدروا يكلموا ويقفوا على رجلهم. اتكلمنا عن بعضهم في موضوع قبل كده وقولنا لكم إزاي ممكن الواحد يتواصل معاهم ويحصل على العروض السخية اللي هم بـ يقدموها، ودى أماكن ثانية جديدة فى "الجزء 2" من موضوعنا:

 

شكرة: 

شكرة اسم مكون من نصفين: "شارك" و"فكرة"، اللي لما يندمجوا يبقوا "شكرة"، اللي هي مكان بـ يقدم حاجة اسمها "تمويل جماعي"، القائمين على المكان بـ يشرحوا فكرة التمويل الجماعي ده وبـ يقولوا أنه ببساطة مجموعة من رؤوس الأموال الصغيرة من عدد كبير من المستثمرين، تصب في مشروع واحد، وده طبعًا بـ يزود إمكانية الحصول على التمويل وبـ يقلل المخاطر اللي ممكن تدور حول رأس المال، أو الاستثمار وبـ تخلي الحصول على الأموال أسهل كثير.

الناس اللي في "شكرة" فاهمين كويس المشكلة اللي بـ يقابلها أي مبدع عنده فكرة وإرادة، لكن عنده أزمة في أنه يعمل خطة عمل واقعية، وأنه يكون عندهم مهارات لإنجاح الشغل، وإرشاد من ناس أكبر، فاهمين الموضوع، والأهم هو التمويل، البنوك بـ تعتبر المشاريع دي مخاطرة، وأصحاب رؤوس المال بـ يعتبروا الأفكار دي حاجات صغيرة أوي مش قد المقام.

"شكرة" بقى وظيفتها أنها تعمل برنامج للشركات الناشئة علشان تساعدهم يقدموا أفكارهم بطريقة مهنية ناجحة، ومن خلال البرنامج يقدروا المستثمرين أنهم يختاروا الشركات الناشئة اللي تعجبهم هـ يمولوها.

شكرة كمان بـ تساعد أصحاب رؤوس المال الكبيرة أنهم يساهموا في مشاريع كثير، وفي استثمارات متنوعة، وده بـ يقلل المخاطر، شكرة كمان قبل عرض أي فكرة، بـ تقدم برنامج تعليم المبدعين عند الحاجة، لزيادة نسبة نجاح الشركة، وأن التمويل المطلوب مبني على خطة عمل مدروسة كويس، من الآخر شكرة بـ تقيم تقييم مبدئي، ولما يحصل هيكلة قانونية وتمويل للشركات الناشئة بـ توفر مرشدين علشان الشركات تنمو صح، وبـ توفر حاجة اسمها آليات المستثمرين لمتابعة تطور شركاتهم لحماية حقوقهم.

لو عجبتك الطريقة الخاصة بـ "شكرة" ممكن تزور صفحتهم على الفيسبوك، أو تعرف أكثر وتتواصل معاهم من خلال البيانات الواردة على موقعهم الإلكتروني.

 

تمكين كابيتل: 

ما حدش راح عند "تمكين كابيتل" إلا ورجع مبسوط، على الرغم من عدم وجود صفحات رسمية لهم على الفيسبوك أو تويتر، وذكرهم على شبكة الإنترنت ضعيف، حتى الموقع الإلكتروني بتاعهم مافيهوش وسيلة للاتصال المباشر أو إيميل أو شروط واضحة للناس اللي عاوزة تتعاون معاهم، لكن من خلال المعلومات اللي جمعناها عرفنا أن "تمكين كابيتال" مكان مهم جدًا للناس اللي عاوزة تبدأ مشروعاتهم، يقدروا يروحوا لهم على عنوانهم الجديد في شارع الأمير وليد بن ثنيان آل سعود، عمارة رقم 14، عمارات شيراتون، بلوك رقم 1163 بمصر الجديدة.

طارق فهيم، وشريكه إيهاب الفولي، ناس ناجحة وبـ تشتغل في صمت، أسسوا "تمكين" ومولوها من مالهم الخاص، بعدين دعمتهم شركات ثانية، ، تمكين مش بـ تدور على شركات ناشئة، قد ما بـ تدور على أعمال ناجحة، يعني لو كنت شركة وعاوز تكمل بنجاح بـ يساعدوك، مقابل امتلاك 25% إلى 45% من الشركات اللي بـ تستثمر فيها، لكن في المقابل هم بـ يمدوا الشركات دي برأس مال يوصل لـ 50 ألف و250 ألف دولار، وده تقريبًا من أعلى الأرقام اللي بـ يتيحها حد.

شغل تمكين، شغل على كبير، لكنهم كمان مش ناسيين الشركات الجديدة اللي لسه بـ تقول يا مسهل، بـ يقدموا لهم قروض تساعد الشركات الناشئة دي في مراحل التأسيس لحد ما تبقى شركة بصحيح.

 

إنجاز: 

لو كنت لسه هـ تبدأ شغلك، ومش معاك غير فكرة، يبقى حلك مع إنجاز مصر، اللي بـ تساعد الشباب على مستويين: الأول أنهم يكونوا موظفين مبدعين وكويسين ومؤهلين لسوق العمل، والثاني أنهم يكونوا رواد أعمال يقدروا يبدأوا مشاريعم الخاصة، هـ نتكلم هنا عن المستوى الثاني الخاص برواد الأعمال، واللي علشانهم انطلق برنامج "انطلاقتي الريادية لريادة الأعمال" وده بـ يقدم للمشاركين إرشادات بدء المشروع الخاص.

إنجاز بـ تحط مجموعة شروط للناس اللي هـ تساعدهم في البرنامج ده، زي أن السن يكون بين 20 و25 سنة، ويكون عندهم استعداد يغيروا طريقة حياتهم علشان يحققوا حلمهم، ويكونوا قادرين يتجاوزوا 3 خطوات: الأولى أن يتم بناء فريق عمل بحد أقصى خمسة أفراد، ويتم تقديم الفكرة على صفحة "إنجاز" على الفيسبوك، ممكن تكون من بين 120 فريق محظوظ هـ تختارهم علشان يقدموا مشوارهم، وفي معسكر تدريب هـ تقدم لكم كل حاجة تساعد على تطوير الأفكار واستكمالها وتساعد على مقابلة ناس كثير حققوا أحلامهم وعملوا مشاريعهم الخاصة، وفي المرحلة دي الفرصة بـ تكون لسه متاحة لجذب مزيد من أفراد فريق العمل، المرحلة الثانية بقى هي بناء المشروع ودي هـ يكمل فيها 30 مشروع بس، كل فريق هـ يكون له مستشار يساعده ويكون فيه تدريب مكثف على مبادئ العمل، وتأسيس شركة، وساعتها هـ تكون فرصة الشغل على المشروع كبيرة، على آخر المرحلة دي كل حاجة بـ تكون وضحت وفرق العمل بـ تكون قادرة تقدم أفكارها للشركات الكبيرة علشان تأخذ تمويل لمشاريعها، أما آخر مرحلة هي البداية لسبع فرق بس هـ يتم اختيارهم علشان تمولهم إنجاز مصر بنفسها، ويبدأوا شغلهم، وهـ توفر لهم مستشارين، ومكاتب عمل وتدريب في شركات كبيرة تساعدهم على لقاء مستثمرين كبار ممكن يفيدوهم، لو عاوزين تعرفوا أكتر عن إنجاز ممكن تزوروا موقعهم الإلكتروني.

 

صلتك: 

كل الجهات السابقة مصرية، لكن أحيانًا بـ يكون فيه فرص أفضل لو الواحد فكر بصورة أكبر وخرج بره الدائرة، مش وحش لما نكون عارفين أن فيه جهات ممولة للمشروعات بره مصر، صحيح الفرص مش كبيرة أوي لكن المحاولة مش هـ تضر أبدًا، "صلتك" واحد منهم، المكان ده ساعد ناس كثير من الأردن واليمن ومصر.

"صلتك" شايف أن الحكومات مش هـ تقدر تواجه تحديات الشباب العربي لوحدها، ولا القطاع الخاص، وأن الموضوع محتاج جهود مشتركة من الشركات والمنظمات غير الحكومية والحكومات والجامعات والمؤسسات المالية ووسائل الإعلام وغيرها.

"صلتك" بـ تتعاون مع مجموعة واسعة من المنظمات الحكومية وغير الحكومية علشان تدعم المشاريع، بـ تحاول تحسن أوضاع الشباب العربي بـ تسهيل الوصول لرأس المال، وفرص تطوير الأفكار، وتعزيز ريادة الأعمال، لو مهتم بأنك تحاول معاهم ممكن تبعث لهم على إيميل media@silatech.com، "صلتك" مؤسسة قطرية بدأت سنة 2008 بمبادرة من الشيخة موزا بنت ناصر، لو عاوز تعرف أكثر ممكن تزور موقعهم.

 

ذو مال:

ودي جهة عربية ثانية بـ تقدم دعم مادي للمشروعات اللي عندها طموح، ومبتكرة، بـ تقدم تمويل قيمته 5 آلاف دولار أو أقل حسب الرئيس التنفيذي عبد الله عبسي.

ذو مال بـ تقدم التمويل والدعم للشركات الناشئة، في نطاقات محدودة، وبـ تعتمد على نظام التبرعات، لو عاوزين معلومات أكثر عن ذو مال، وكيفية الحصول على تمويل ودعم منها ممكن تزوروا موقعهم الإلكتروني أو صفحتهم على الفيسبوك.

مزيد من الصور
  • دليل كايرو 360 لأماكن تقديم المنح الفنية والمادية لأصحاب الأفكار والمشاريع المميزة (جزء 2)
  • دليل كايرو 360 لأماكن تقديم المنح الفنية والمادية لأصحاب الأفكار والمشاريع المميزة (جزء 2)
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
18/11/2013
-