دليل أحداث نهاية الأسبوع: نغم صالح، وباليه كسارة البندق، ويحيي خليل، وحادثة موسيقية في البلاكون - الحياة في كايرو Feature - كايرو 360
 







دليل أحداث نهاية الأسبوع: نغم صالح، وباليه كسارة البندق، ويحيي خليل، وحادثة موسيقية في البلاكون
دليل أحداث نهاية الأسبوع: نغم صالح، وباليه كسارة البندق، ويحيي خليل، وحادثة موسيقية في البلاكون
اصدرت في: 26/12/2013

كل رأس سنة وأنتم طيبين، ده آخر أسبوع فى آخر شهر فى السنة، لكن للأسف بقى لنا ييجي 3 سنين مافيش رأس سنة بـ تعدي على القاهرة أو مصر عامة إلا لما يكون فيها أحداث مؤسفة أو انفجارات وجرحى وقتلى، ربنا يحفظ مصر وشعبها ويعدي الأيام الصعبة دي على خير.. للأسف فكرة أننا نقول لكم الأسبوع ده على أماكن تخرجوا فيها فى الظروف دي صعب شوية، حتى أن فيه أماكن كثيرة لغت أو أجلت الأحداث الفنية بتاعتها حدادًا على الأحداث الجارية هـ نذكرهم لكم كلها:

النهارده الخميس الموافق 26 ديسمبر في مركز شبابيك هـ تقدم المطربة "نغم صالح" والمطرب "علي الهلباوي" والشعراء المتميزين "مايكل عادل" و"خليل عز الدين" يوم في حب عمنا أحمد فؤاد نجم، سعر التذكرة 20 جنيهًا.

كمان في دار الأوبرا المصرية اليوم هـ تقدم فرقة باليه أوبرا القاهرة وأوركسترا أوبرا القاهرة باليه كسارة البندق في القاعة الرئيسية، سعر التذاكر 50 - 75 - 100 جنيهًا، وللطلبة 35 - 50 – 75 جنيهًا، لمزيد من المعلومات اتصلوا بـ 27390114 - 27398114، خلوا بالكم العروض من يوم 24 إلى 30 ديسمبر ماعدا يوم 26 ديسمبر.

الحفلتين اللى تم تأجيلهم النهارده الاثنين فى دار الأوبرا وهما: احتفالية كوكب الشرق، وحفل فرقة أوبرا القاهرة بمصاحبة عازف البيانو الإنجليزى جريج مارتن. أما المعرض الأول لصالون برنامج "الأتيليه" بالتعاون مع الفنان د. طه القرني لعرض أعمال 74 فنان من كبار الفنانين المشاركين اللي أثروا الحركة التشكيلية تم تأجيله فقط يومي 25، 26 ديسمبر لكن مكمل الأيام اللى بعدها، الدعوة عامة.

يوم الجمعة الموافق 27 ديسمبر فيه حفل موسيقى للفنان يحيى خليل في دار الأوبرا المصرية على المسرح الصغير، سعر التذكرة 30 جنيهًا، أما "بلاكون لاونج" هـ يقدم تجربة موسيقية تحت عنوان "حادثة موسيقية في البلاكون" بمشاركة دجيت، علي طالباب، محمد عادل، عبدالله المنياوي، سعر التذكرة 25 جنيه، ولمزيد من المعلومات اتصل بــ 01229314690.

العروض اللى بـ تتعمل فى الشارع رجعت من ثاني، "مشروع فن" هـ يكونوا موجودين في شارع إسماعيل محمد أمام هارديز في الزمالك علشان يقدموا يوم مختلف جدًا مع أتيكيت باند وستوديو شابلن ومزيكا طوال الوقت وهـ يبقى فيه ألوان ورسم بالطباشير للكبار والأطفال، وكل ده مجانًا، لمزيد من المعلومات زور الرابط.

وزي كل شهر جمهور ساقية الصاوي زي ما له ميعاد مع كوكب الشرق أم كلثوم مع مسرح الساقية للعرائس برضه له ميعاد مع العندليب الأسمر عبد الحليم حافظ العروسة الماريونت بقاعة النهر، سعر التذكرة للأعضاء 5 جنيه ولغير الأعضاء 15 جنيه.

وأخيرًا يوم السبت الموافق 28 ديسمبر فيه حفلتين أولهم لـ "فرقة كيان" فى بيكيا مدينة نصر بعد النجاح الكبير اللي حققته في بيكيا المعادي مؤخرًا، ليلة مع الموسيقى والمرح، سعر التذكرة 25 جنيهًا.

الحفلة الثانية هـ تقدمها فرقة "سلالم إكس" بقاعة النهر بساقية عبد المنعم الصاوي، سعر التذكرة 30 جنيه.

لو كنتم لسه ما اشتريتوش هدايا رأس السنة لأهلكم أو أصدقائكم نشرنا لكم "دليل آخر دقيقة تسوق في القاهرة"، وكمان فيه دليل للأماكن اللى ممكن تخرج فيها يوم رأس السنة والعروض اللى بـ تقدمها، ما تنسوش تتابعوا الأجندة كمان علشان فيه أماكن ثقافية بـ تعلن على آخر لحظة جدولها للعام الجديد بسبب الأحداث الملخبطة اللى بـ تضطر البعض أنهم يأجلوا أو يلغوا حفلات من جدولهم.

نتمنى لكم رأس سنة هادئة وسعيدة!

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
إنجي البطراوي
حرر بواسطة:
إنجي البطراوي
تاريخ النشر:
26/12/2013
مدير تحرير موقع كايرو 360 العربي. نشيطة جدًا بـ تحب الشغل، وبـ تهتم بالتفاصيل، دائمًا بـ تضيف روح إيجابية للفريق ومش بـ تفوت فرصة أنها تضحك اللى حولها! بـ تصرف نصف مرتبها على عصير البرتقال والآيس كريم!