دليل أحداث نهاية الأسبوع: نيفين علوبة وأمير عيد ومحاضرات بسام الشماع ومعارض فنية - الحياة في كايرو Feature - كايرو 360
 







دليل أحداث نهاية الأسبوع: نيفين علوبة وأمير عيد ومحاضرات بسام الشماع ومعارض فنية
دليل أحداث نهاية الأسبوع: نيفين علوبة وأمير عيد ومحاضرات بسام الشماع ومعارض فنية
اصدرت في: 02/01/2014

ثاني أيام 2014 ومتفائلين إلى حد ما ومش عارفين لو فيه مبرر للتفاؤل ده، بس أهي سنة جديدة.. أي حاجة جديدة بـ تبقى لطيفة، لسه لها رونقها وبهجتها، شطارتنا أننا نحافظ على رونقها ده لأطول وقت ممكن. وبالنسبة لأجندة كايرو 360 الأسبوع ده فهي متخمة بالأحداث زي ما اتعودنا بسبب موسم الامتحانات اللي فيه وأن المراكز الثقافية لسه بـ تعد العدة لأجازات نصف السنة وقبلها عيد الميلاد المجيد، لكن طبعًا الموجود يسد وهـ نقول لكم حالًا على كام حاجة ممكن تعملوها في الويك إند ده.

نبدأ بالليلة دي، الخميس وحفل أمير عيد المغني الرئيسي في فرقة كايروكي، هـ يقدم النهارده حفلة بمفرده على مسرح قاعة النهر بساقية الصاوي. أمير بـ يعزف جيتار وبـ يؤلف أغانيه بنفسه، ومن المتوقع أن تشهد الحفلة حضور جماهيري كبير خاصة من جمهور الفريق الأصلي، التذكرة بـ 35 جنيه والحفل يبدأ الساعة 8 مساءً. 

مركز الإبداع الفني في دار الأوبرا هـ يعرض فيلم روائي قصير بعنوان (نجم كبير) بطولة الفنان محمود قابيل، تأليف وإخراج "روجينا بسالي"، الدعوة عامة والفيلم هـ يبدأ الساعة 6 مساءً.

وفي نفس التوقيت ينظم قطاع صندوق التنمية الثقافية وبالتحديد في مركز طلعت حرب الثقافي بالسيدة نفيسة أمسية شعرية بمناسبة الاحتفال بالذكرى الـ 85 لميلاد الشاعر الراحل صلاح جاهين، مع كل من الشعراء أمين حداد، ورجب الصاوي، وبمشاركة عدد من الشعراء الشباب منهم أيمن مسعود، وأحمد عبدالجواد، وحسام جويلي، وسالم الشهباني. 

باقي 8 أيام على نهاية معرض ماراثون الصورة بمصر 2013/2014 في مركز درب 17 18 الثقافي واللي بـ يقدم مجموعة الصور الفائزة اللي انتقاها كل من المصور الصحفي مصعب الشامي والمصور ياسر علوان من بين 1021 صورة فوتوغرافية، تقدمت بها للماراثون جميع المحافظات المشاركة، وخلال افتتاح المعرض تم توزيع الجوائز لأول مجموعتين من الصور نالت أعلى درجات خلال التحكيم.

وزي كل أول خميس في الشهر ميعادنا النهارده مع حفل أم كلثوم في مسرح الساقية للعرائس بقاعة الحكمة الساعة 7 مساءً. التذاكر بـ 5 جنيه للأعضاء وبـ 15 لغير الأعضاء. 

نروح لدار الأوبرا المصرية والفرقة القومية للموسيقى العربية اللي هـ تقدم حفل على المسرح الكبير لمجموعة من مؤلفات الفنانين العمالقة بقيادة سليم سحاب، التذاكر متاحة في شباك الحجز، والدخول الساعة 8 مساءً. 

يوم الجمعة هـ يبقى فيه ليلة موسيقية مع أوركسترا الساقية الوتري وأغنيات عيد الميلاد المجيد تحييها الفنانة نيفين علوبة في قاعة الحكمة بساقية الصاوي، سعر التذكرة 15 جنيه للأعضاء و25 جنيه لغير الأعضاء. 

يوم السبت الدكتور بسام الشماع هـ يقدم المحاضرة رقم 99 فى سلسلة إعادة كتابة التاريخ بأيدٍ مصرية، والندوة يومها هـ تكون بعنوان "عبقرية تعامد الشمس على معابد مصر القديمة" وهـ تكون في قاعة الكلمة والدعوة عامة. 

وفي إطار برنامج "لقاء مع أغنية" اللي بـ يعقد في متحف أم كلثوم في المنيل، يوم السبت هـ يبقى فيه لقاء مع أغنية "الأولة في الغرام" وهي واحدة من روائع كوكب الشرق، ويقدم اللقاء الدكتورة نهلة مطر مدير متحف أم كلثوم. 

ممكن تختم خروجاتك في الويك إند بشوية ضحك وتحضر عرض الستاند أب كوميدي لوليد أبو المجد في قاعة الحكمة بساقية الصاوي، سعر التذكرة 20 جنيهًا والدخول الساعة 7 مساءً. 

الجو اتحسن كثير والخروج بالليل بقى له معنى، خاصة مع شوية الروقان اللي في الشوارع بفضل الامتحانات، نتمنى نشوفكم في عدد من الحفلات والفعاليات اللي ذكرناها، أو حتى أي حاجة غيرها من الموجودة على أجندة موقعنا، وأجازة سعيدة.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
02/01/2014
-