دليل أحداث نهاية الأسبوع: مريم صالح وموسيقى عربية ونوبانور ولايك جيلي - الحياة في كايرو Feature - كايرو 360
 







دليل أحداث نهاية الأسبوع: مريم صالح وموسيقى عربية ونوبانور ولايك جيلي
دليل أحداث نهاية الأسبوع: مريم صالح وموسيقى عربية ونوبانور ولايك جيلي
اصدرت في: 16/01/2014

بعد أسبوع مليان بالأحداث والترقب والجدل، صحيح كان فيه يوم أجازة ظريف في وسط الأسبوع بمناسبة المولد النبوي الشريف، لكن برضه وصلنا للويك إند منهكين وعاوزين فاصل علشان نقدر نواصل، لكن للأسف المراكز الفنية والثقافية بعافية شوية شهر يناير ده والفعاليات مش بالكثافة اللي كنا متوقعينها، لكن فيه أماكن عاملة حفلات وعروض ظريفة هـ تعوضنا عن التقصير اللي حاصل من أماكن ثانية، ونبدأ بالنهارده الخميس:

لأول مرة في مكتبة مصر الجديدة تبدأ مريم صالح عام 2014 بحفلين متتاليين لألبومها الأول "مش بغني". الحفل الأول كان إمبارح الأربعاء والنهارده نفس الحفل، وبـ يفتتح الحفل فريق دروشة اللي بـ يقدم موسيقى الروك/ ميتال والبروجريسيف بكلمات عربية، سعر التذكرة 35 جنيه والحفل هـ يبدأ الساعة 8 مساءً. 

شكرًا مركز المصطبة النشيط، برنامج حفلاته متميز الشهر ده، وبـ يدعوكم الليلة دي لحضور حفل للموسيقى الشعبية للآليء السمراء ونجوم النوبة "فرقة نوبانور". سعر التذكرة 30 جنيه عند الباب وسعر التذكرة عند الحجز المسبق 20 جنيه فقط. 

وفي دار الأوبرا المصرية وعلى المسرح الصغير تقدم فرقة عبد الحليم نويرة للموسيقى العربية ومع استمرار لسلسلة حفلات "صوت بلادي" هـ تقدم حفل بمشاركة نجوم الفرقة والفنانة ريهام عبد الحكيم ويقود الحفل المايسترو صلاح غباشي. أسعار التذاكر: 100 - 75 - 50 جنيه وللطلبة: 75 - 50 - 35 جنيه. 

متوقعين ليلة مطرقعة جديدة من ليالي فريق لايك جيلي النهارده في كايرو جاز كلوب بالمهندسين، لايك جيلي أصبح لهم شعبية كبيرة وجمهور بـ ينتظر حفلاتهم وأغانيهم الكوميدية الجديدة كل فترة، شوفوهم النهارده مع فرقة قص ولزق الساعة 10 مساءً، والحجز ضروري قبل ما تروح. 

النهارده افتتاح مهرجان "البقية تأتي" في مسرح الفلكي، وهو المهرجان السنوي اللي بـ يهتم بفنون المسرح والرقص المعاصر، والليلة دي هـ يتم تقديم عرض رقص معاصر بعنوان "ما تبقى"، وهو رؤية عن ما توصل إليه مجتمعنا الآن من عنف وعدم احترام الآخر. العرض تصميم وإخراج: محمد الديب، سعر التذكرة 5 جنيه، ومستمر من يوم 16 إلى 19 يناير ماعدا الجمعة 17 يناير. 

يوم الجمعة تقدم ساقية الصاوي حفل غنائي للفنان خالد حلمي ونجوم برنامج The Winner Is اللي كان بـ يُذاع مؤخرًا وقدم عدد من المواهب في مجال الغناء. الحفل بقاعة الحكمة وسعر التذكرة 25 جنيه والحفل هـ يبدأ الساعة 8 مساءً. 

ولهواة الموسيقى العربية يوم السبت هـ يبقى فيه حفل للفنان مصطفى حسين في قاعة الحكمة، سعر التذكرة 20 جنيه، والدخول الساعة 7 مساءً. 

دي أهم ترشيحاتنا لخروجات وحفلات الأسبوع ده، نتمنى يبقى فيه وفرة وتنوع أكثر من كدة الأسابيع اللي جاية ومع بداية أجازات نصف العام، نشوفكم على خير كمان أسبوع وما تنسوش تعرفوا الجديد في العاصمة من أجندة موقعنا. 

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
16/01/2014
-